துணைவேந்தர்கள் நியமனம்: தமிழக அரசின் அரசாணையை திரும்பப் பெற ஆளுநர் ரவி மீண்டும் வலியுறுத்தல்!

சேலம் பெரியார் பல்கலைக்கழகம், அண்ணா பல்கலைக்கழகம், திருச்சி பாரதிதாசன் பல்கலைக்கழகம் ஆகியவற்றுக்கு துணைவேந்தரை தேர்ந்தெடுப்பதற்காக தமிழ்நாடு அரசு அமைத்த தேடுதல் குழுவிற்கான அரசாணையை ரத்து செய்ய ஆளுநர் ஆர்.என் ரவி உத்தரவிட்டுள்ளார்.

சென்னை:தமிழ்நாட்டில் உயர் கல்வித்துறையின் கீழ் உள்ள 13 பல்கலைக்கழகங்களுக்கு துணைவேந்தர் நியமனம் செய்வதில் ஆளுநர் மற்றும் அரசு இடையே தொடர்ந்து மோதல் போக்கு நிலவு வருகிறது. தமிழ்நாடு அரசு பல்கலைக்கழகங்களின் வேந்தர் என்ற பதவியில் இருந்து தமிழ்நாடு ஆளுநரை நீக்கிவிட்டு முதலமைச்சரை நியமனம் செய்வதற்கான சட்ட மசோதாக்களை நிறைவேற்றி ஆளுநருக்கு அனுப்பியது. ஆனால் அந்த மசோதாக்களுக்கு ஆளுநர் ஒப்புதல் அளிக்காமல் கிடப்பில் போட்டார். இதுகுறித்து தமிழ்நாடு அரசு சென்னை உயர்நீதிமன்றத்தில் வழக்கு தொடர்ந்தது.

இந்த நிலையில் சட்ட மசோதாக்களுக்கு ஒப்புதல் அளிப்பது குறித்து தமிழ்நாடு ஆளுநர் ஒரு நிகழ்ச்சியில் பேசும்போது, பணம் தொடர்பான மசோதாக்களுக்கு உடனடியாக ஒப்புதல் அளிக்கப்படுகிறது எனவும், மத்திய மாநில அரசின் பொது பட்டியலில் உள்ள கல்வி சம்பந்தமான மசோதாக்களுக்கு ஒப்புதல் அளிப்பதற்கு மத்திய அரசின் அனுமதியும் கேட்கப்பட்டுள்ளதாக தெரிவித்தார்.

இந்த நிலையில் துணைவேந்தர்கள் நியமனம் செய்வதில் தமிழ்நாடு ஆளுநர்‌ ஆர் என் ரவி, பல்கலைக்கழக மானிய குழுவின் உறுப்பினரை சேர்க்க வேண்டும் என வலியுறுத்துவதாகவும், தமிழ்நாடு பல்கலைக்கழக சட்டங்களின்படி பல்கலைக்கழக மானிய குழுவின் உறுப்பினரை சேர்க்கத் தேவையில்லை எனக்கூறி, தமிழ்நாடு அரசு தொடர்ந்த வழக்கு தற்போது உச்சநீதிமன்றத்தில் நிலுவையில் உள்ளது.

தமிழ்நாட்டில் பாரதியார் பல்கலைக்கழகம், தமிழ்நாடு ஆசிரியர் கல்வியியல் பல்கலைக்கழகம், சென்னை பல்கலைக்கழகம், அண்ணா பல்கலைக்கழகம், அண்ணாமலை பல்கலைக்கழகம், மதுரைக் காமராசர் பல்கலைக்கழகம் ஆகியவற்றில் துணைவேந்தர் பணியிடங்கள் காலியாக உள்ளன.

மேலும் திருச்சிராப்பள்ளி, பாரதிதாசன் பல்கலைக்கழக துணைவேந்தர் பதவி பிப்ரவரி மாதமும், ,சேலம், பெரியார் பல்கலைக்கழக மே மாதம் முடிவுறவுள்ளது. இவர்களுக்கு ஏற்கனவே கடந்த ஆண்டு தமிழ்நாடு ஆளுநர் ஓராண்டு பதவி நீட்டிப்பு வழங்கியுள்ளார்.

தமிழ்நாடு ஆளுநர் ஆர்.என்.ரவி அலுவலகத்தால் 18 ஆம் தேதி வெளியிடப்பட்ட செய்திக்குறிப்பில், 'அண்ணாமலை பல்கலைக்கழகத்திற்கு புதிய துணைவேந்தர் நியமனம் செய்வது தொடர்பாக அமைக்கப்பட்ட மூன்று பேர் அடங்கிய தேடுதல் குழு (Search Committee) பல்கலைக்கழக மானியக் குழுவின் 2018 ஆம் ஆண்டைய நெறிமுறைகள் மற்றும் உச்சநீதிமன்ற தீர்ப்பினையும் மீறுவதாக உள்ளது என தெரிவித்து, மேற்படி அரசாணையை திரும்ப பெறவும், தேடுதல் குழுவில் நான்காவது நபராக பல்கலைக்கழக நிதிநல்கைக் குழுவின் தலைவரால் பரிந்துரைக்கப்பட்ட உறுப்பினரை சேர்க்க வேண்டும்' என்று வலியுறுத்தி இருந்தார்.

இதற்கு பதில் அளிக்கும் விதமாக உயர் கல்வித்துறை அமைச்சர் கோவி செழியன் வெளியிட்ட அறிக்கையில், 'பல்கலைக்கழகங்கள் மற்றும் கல்லூரிகளில் ஆசிரியர் மற்றும் இதர கல்வி பணியாளர்களை நியமனம் செய்வதற்கு குறைந்தபட்ச தகுதிகள் மற்றும் உயர்கல்வியில் தரத்தினை பராமரிப்பதற்கான நடவடிக்கைகள் குறித்து நெறிமுறைகளை பல்கலைக்கழக மானியக் குழு நெறிமுறைகள், 2018 (UGC Regulations 2018) மூலம் வெளியிட்டது.

பல்கலைக்கழக மானியக் குழுவால் வெளியிடப்படும் நெறிமுறைகளானது பல்கலைக்கழக மானியக் குழுவால் மாநில அரசிற்கு பரிந்துரைப்பது வழிகாட்டுதல்களே (Only recommendations) தவிர, அவற்றை ஏற்பது என்பது மாநில அரசின் முடிவிற்கு உட்பட்டதாகும். எனவே அந்த நெறிமுறைகளை ஏற்பதற்காக, அந்த நெறிமுறைகளில் பல்கலைக்கழக துணைவேந்தரை தேர்வு செய்வதற்காக அமைக்கப்படும் தேடுதல் குழுவினை குறித்து குறிப்பிடப்பட்டுள்ள நெறிமுறை 7.3 (ii) –இல் சார்ந்த பல்கலைக்கழகங்களின் சட்டவிதிகளின்படியே தேர்வுக்குழு அமைக்கப்படும் என உயர்கல்வித்துறை மூலம் ஆணைகள் வெளியிடப்பட்டுள்ளன' எனத் தெரிவித்திருந்தார்.

இந்த நிலையில் தமிழ்நாடு ஆளுநர் ஆர் என் ரவி இன்று வெளியிட்டுள்ள செய்திக்குறிப்பில், 'சேலம் பெரியார் பல்கலைக்கழகம், திருச்சி பாரதிதாசன் பல்கலைக்கழகம் மற்றும் அண்ணா பல்கலைக்கழகத்திற்கு துணைவேந்தரை தேர்ந்தெடுப்பதற்காக பல்கலைக்கழக மானியக் குழுவின் பிரதிநிதி இல்லாமல் தமிழக அரசு பிறப்பித்துள்ள அரசாணையை திரும்ப பெற வேண்டும் என்று உத்தரவிட்டுள்ளார்.

பல்கலைக்கழக மானிய குழுவின் விதிமுறை மற்றும் நீதிமன்ற தீர்ப்பின் அடிப்படையில் துணைவேந்தர் தேர்ந்தெடுப்பதற்கான தேடுதல் குழுவில் பல்கலைக்கழக மானியக் குழுவின் பிரதிநிதியை சேர்க்காமல் இருப்பது விதிமுறை மீறலாகும் மற்றும் நீதிமன்ற தீர்ப்புக்கு முரணாகும் என ஆளுநர் ஆர் என் ரவி வெளியிட்டுள்ள அறிக்கையில் சுட்டிக்காட்டி உள்ளார்.

எனவே அண்ணா பல்கலைக்கழகம் பாரதிதாசன் மற்றும் சேலம் பெரியார் பல்கலைக்கழகங்களுக்கான துணைவேந்தரை தேர்ந்தெடுப்பதற்கான தேடுதல் குழுவில் பல்கலைக்கழக மானிய குழுவின் பிரதிநிதியை சேர்க்க வேண்டும்' என தனது அறிக்கையில் தெரிவித்துள்ளார்.

துணைவேந்தரை தேர்ந்தெடுப்பதற்கான தேடுதல் குழுவில் பல்கலைக்கழக மானிய குழு பிரதிநிதியை சேர்ப்பது குறித்த விவகாரத்தில் தொடர்ந்து தமிழ்நாடு அரசுக்கும் ஆளுநருக்கும் இடையான போக்கு மேலும் உச்சக்கட்டத்தை எட்டியுள்ளது.