புதுச்சேரி:புதுச்சேரியைச் சேர்ந்த 9 வயது சிறுமி கடந்த மார்ச் 2ஆம் தேதி மாயமானார். 3 நாட்கள் கழித்து பாலியல் வன்கொடுமை செய்யப்பட்டு படுகொலை செய்யப்பட்டார். இச்சம்பவம் நாடு முழுவதும் அதிர்வலையை ஏற்படுத்தியது. இந்தக் கொலை சம்பவம் குறித்து முத்தியால்பேட்டை போலீசார், பாலியல் பலாத்காரம் மற்றும் கொலை வழக்குப்பதிவு செய்து, அதே பகுதியைச் சேர்ந்த விவேகானந்தன் (59), கருணாஸ் (19) ஆகிய இருவரை கைது செய்தனர்.
தொடர்ந்து, இந்த வழக்ககை சீனியர் எஸ்.பி. கலைவாணன், எஸ்.பி. லட்சுமி சவுஜன்யா தலைமையிலான சிறப்பு புலனாய்வுக் குழு விசாரிக்க உத்தரவிடப்பட்டது. இச்சம்பவத்தால், முத்தியால்பேட்டையில் பணியாற்றிய இன்ஸ்பெக்டர் தனசெல்வம், சப் இன்ஸ்பெக்டர் ஜெயகுருநாதன் மற்றும் 32 கான்ஸ்டபிள்கள் அனைவரும் ஒட்டுமொத்தமாக இடமாற்றம் செய்யப்பட்டனர். சிறப்பு விசாரணைக் குழு, சிறுமி கொலை செய்யப்பட்ட இடத்தில் கிடைத்த தடயங்கள், பெற்றோர் ரத்த மாதிரிகள், கைது செய்யப்பட்ட இருவரின் ரத்த மாதிரிகளை சேகரித்து தடய அறிவியல் பரிசோதனைக்கு அனுப்பி வைத்தது.
மேலும், இந்த வழக்கு சம்பந்தமாக கைது செய்யப்பட்டு சிறையில் இருந்த கருணாஸ் மற்றும் விவேகானந்தன் இருவரையும், இரண்டு நாட்கள் காவலில் எடுத்து விசாரித்து வாக்கு மூலங்களையும் பதிவு செய்தனர். சிறுமியின் பிரேதப் பரிசோதனை அறிக்கைகள், தடயவியல் ஆய்வக பரிசோதனைகள் மற்றும் டி.என்.ஏ அறிக்கைகளும் பெறப்பட்டது.