பொள்ளாச்சியில் வெளுத்து வாங்கிய மழை.. சாக்கடை நீர் வெளியேறியதால் பொதுமக்கள் அவதி! - Pollachi Rain

Pollachi Rain: பொள்ளாச்சி பகுதிகளில் பெய்த கனமழையால் பல்வேறு இடங்களில் மழை தேங்கியும், மரம் சாய்ந்தும், சாக்கடை நீர் தேங்கியதாலும் பொதுமக்கள் அவதிக்குள்ளாகினர்.

கோயம்புத்தூர்: தமிழகத்தின் பல்வேறு மாவட்டங்களில் இன்று கனமழை பெய்யக்கூடும் என வானிலை ஆய்வு மையம் தெரிவித்திருந்தது. அதன்படி, கோவையில் காலை முதல் மேகமூட்டம் காணப்பட்ட நிலையில், மாலை சுமார் இரண்டு மணி நேரம் பல்வேறு பகுதிகளில் பரவலாக மழையும், ஓரிரு பகுதிகளில் கனமழையும் பெய்தது.

குறிப்பாக, சிங்காநல்லூர், காந்திபுரம் ரயில் நிலையம், டவுன்ஹால், உக்கடம் உள்ளிட்ட பகுதிகளில் கனமழை பெய்ததால், பல்வேறு இடங்களில் மழை நீர் தேங்கியது. மேலும் சில இடங்களில் சாக்கடை நீர் வெளியேறியதால் பொதுமக்கள் கடும் சிரமத்திற்கு உள்ளாகினர்.

லங்கா கார்னர் பாலம், அவிநாசி மேம்பாலம் அடியில் மழை நீர் தேங்கியதால் போக்குவரத்து தடை செய்யப்பட்டது. தொடர்ந்து, மாநகராட்சிப் பணியாளர்கள் மழை நீரை அகற்றும் பணியிலும், மழைநீரில் அடித்து வரப்பட்ட குப்பைகளை அகற்றும் பணிகளிலும் ஈடுபட்டனர்.

கனமழையின் காரணமாக மாவட்ட ஆட்சியர் அலுவலகத்தில் வாகன நிறுத்தும் இடத்தில் இருந்த மேற்கூரை சரிந்து வாகனங்கள் மீது விழுந்தது. மேலும், இ எஸ் ஐ பகுதியில் பேருந்து நிறுத்தம் சாய்ந்தது. ஆர் எஸ் புரம் பகுதியில் மரம் சாய்ந்து வாகனம் ஒன்றின் மேல் விழுந்தது.

மேலும், சிங்காநல்லூர் பகுதியில் பெய்த கனமழையின் காரணமாக, பேருந்து நிலையத்திற்குள் மழை நீர் குளம் போல் தேங்கியதால் பயணிகள் அவதிக்குள்ளாகினர். மேலும், இது போன்று பல்வேறு சிரமங்களைச் சந்தித்து வருவதால் மாநகராட்சி நிர்வாகமும், மாவட்ட நிர்வாகமும் இணைந்து இதற்கு ஒரு நிரந்தரத் தீர்வு காண வேண்டும் என்பதே கோவை மக்களின் வேண்டுகோளாக உள்ளது.

இதையும் படிங்க:மறு உத்தரவு வரும் வரை நீர்நிலைகளுக்குச் செல்லக்கூடாது.. நெல்லை ஆட்சியர் எச்சரிக்கை! - Tirunelveli Rain