ஆசிரியர்களுக்கான பொது மாறுதல் கலந்தாய்வு; 82,479 ஆசிரியர்கள் விண்ணப்பம்! - Teacher Transfer Consultation

Teacher Transfer Consultation: ஆசிரியர்களுக்கான பொது மாறுதல் கலந்தாய்வில் 82 ஆயிரத்து 479 ஆசிரியர்கள் பணியிட மாறுதல் பெறுவதற்கு விண்ணப்பித்துள்ளனர்.

சென்னை:நடப்பு கல்வியாண்டிற்கான ஆசிரியர் பொது மாறுதல் கலந்தாய்விற்கு 82 ஆயிரத்து 479 விண்ணப்பங்கள் கல்வியியல் மேலாண்மை தகவல் முறைமை (EMIS) இணையதளத்தின் வழியாக ஆசிரியர்கள் விண்ணப்பித்துள்ளனர் என பள்ளிக் கல்வித் துறை தெரிவித்துள்ளது.

நடப்பு கல்வியாண்டில் பொது மாறுதல் கலந்தாய்வில் பங்கேற்க விருப்பமுள்ள ஆசிரியர்கள் தங்களது EMIS ID உள்நுழைவின் மூலம் இணைய வழியாக விண்ணப்பங்களை பூர்த்தி செய்து, மே 25ஆம் தேதி வரை விண்ணப்பிக்க பள்ளிக்கல்வித் துறையால் கால அவகாசம் அளிக்கப்பட்டு இருந்தது.

அதன் அடிப்படையில், மே 25ஆம் தேதி வரை தொடக்கக் கல்வி இயக்ககத்தின் கீழ் பணிபுரியும் ஆசிரியர்களில், 18 ஆயிரத்து 920 விண்ணப்பங்கள் இடைநிலை ஆசிரியர் மாறுதலுக்கும், 9 ஆயிரத்து 295 விண்ணப்பங்கள் பட்டதாரி ஆசிரியர் மாறுதலுக்கும், 5 ஆயிரத்து 814 விண்ணப்பங்கள் தொடக்கப் பள்ளித் தலைமையாசிரியர் மாறுதலுக்கும். 1,640 விண்ணப்பங்கள் நடுநிலைப் பள்ளித் தலைமையாசிரியர் மாறுதலுக்கும் என மொத்தம் 35 ஆயிரத்து 669 விண்ணப்பங்கள் பதிவிடப்பட்டுள்ளன.

பள்ளிக் கல்வி இயக்கக நிருவாகத்தின் கீழ் செயல்படும் பள்ளிகளில் பணிபுரியும் ஆசிரியர்களில் 25 ஆயிரத்து 711 விண்ணப்பங்கள் பட்டதாரி ஆசிரியர் மாறுதலுக்கும், 17 ஆயிரத்து 296 விண்ணப்பங்கள் முதுகலை பட்டதாரி ஆசிரியர் மாறுதலுக்கும், 1,186 விண்ணப்பங்கள் உயர்நிலைப் பள்ளித் தலைமையாசிரியர் மாறுதலுக்கும், 1,452 விண்ணப்பங்கள் மேல்நிலைப் பள்ளித் தலைமையாசிரியர் மாறுதலுக்கும், 176 விண்ணப்பங்கள் உடற்கல்வி இயக்குநர் (நிலை1) மாறுதலுக்கும், 989 விண்ணப்பங்கள் இடைநிலை மற்றும் இதர ஆசிரியர்கள் மாறுதலுக்கும் என மொத்தம் 46 ஆயிரத்து 810 விண்ணப்பங்கள் பதிவிடப்பட்டு உள்ளன.

தொடக்கக் கல்வி இயக்ககம் மற்றும் பள்ளிக் கல்வி இயக்கக நிர்வாகத்தின் கீழ் பணிபுரியும் ஆசிரியர்களிலிருந்து மொத்தம் 82 ஆயிரத்து 479 விண்ணப்பங்கள் பதிவிடப்பட்டு உள்ளன. தொடக்கக் கல்வி இயக்கக நிர்வாகத்தின் கீழ் பணிபுரியும் ஆசிரியர்களில் இருந்து 16 ஆயிரத்து 183 விண்ணப்பங்கள் ஒன்றியத்திற்குள் மாறுதலுக்கும், 6 ஆயிரத்து 448 விண்ணப்பங்கள் கல்வி மாவட்டத்திற்குள் மாறுதலுக்கும், 6 ஆயிரத்து 185 விண்ணப்பங்கள் மாவட்டத்திற்குள் மாறுதலுக்கும், 6 ஆயிரத்து 853 விண்ணப்பங்கள் மாவட்டம் விட்டு மாவட்டம் மாறுதலுக்கும் விண்ணப்பிக்கப்பட்டு உள்ளது.

பள்ளிக் கல்வி இயக்கக நிர்வாகத்தின் கீழ் பணிபுரியும் ஆசிரியர்களில் இருந்து 27 ஆயிரத்து 750 விண்ணப்பங்கள் மாவட்டத்திற்குள் மாறுதலுக்கும், 19 ஆயிரத்து 60 விண்ணப்பங்கள் மாவட்டம் விட்டு மாவட்டம் மாறுதலுக்கும் விண்ணப்பிக்கப்பட்டு உள்ளது. இவ்விண்ணப்பங்கள், தொடர்புடைய அலுவலர்களால் கூர்ந்தாய்வு செய்யப்பட்ட பின்னர் பதவிவாரியாக முன்னுரிமைப் பட்டியல் வெளியிடப்பட்ட மாறுதல் கலந்தாய்வு நடத்தப்படும். கலந்தாய்வு நடைபெறும் நாள் விரைவில் அறிவிக்கப்படும்.

மேலும், உயர்நிலைப் பள்ளித் தலைமையாசிரியர்கள், மேல்நிலைப் பள்ளிகளில் பணிபுரியும் முதுகலை பட்டதாரி ஆசிரியர்களுக்கு மேல்நிலைப் பள்ளித் தலைமை ஆசிரியர் பதவி உயர்வுக்கான கலந்தாய்வு நடைபெறும் நாள் விரைவில் அறிவிக்கப்படும் என பள்ளிக் கல்வித் துறை சார்பில் தெரிவிக்கப்பட்டு உள்ளது.