கோயம்புத்தூர்: கோவை அவினாசி சாலை பீளமேடு ஹட்கோ காலனியைச் சேர்ந்தவர் பழனிச்சாமி - கிருத்திகா தம்பதியினர். பழனிசாமி தமிழ்நாடு மின்சார வாரியத்தில் பணியாற்றி வரும் நிலையில், இவர்களுக்கு 10 வயதில் பிரணவிகா என்ற மகள் உள்ளார். வார இறுதி நாளான ஞாயிற்றுக்கிழமை பழனிச்சாமி குடும்பத்துடன் சத்தியமங்கலம் சாலையில் உள்ள பிரபல மாலில் பாடம் பார்க்கச் சென்றுள்ளார்.
படம் துவங்கும் முன்னர் திரையரங்கில் போதைப் பொருள் தடுப்பு தொடர்பாகப் பொதுமக்களுக்கு விழிப்புணர்வு வாசகங்கள் ஒளிபரப்பு செய்யப்பட்டுள்ளது. அதில், "புகைப்பிடித்தால் புற்றுநோய் உருவாகும் மற்றும் உயிரைக் கொள்ளும்" என்ற வாசகம் வந்துள்ளது. இதனைப் பார்த்த பிரணவிகா, இதுகுறித்து தன் தந்தையிடம் கேள்வி எழுப்பியுள்ளார்.
மேலும் அந்த விளம்பரம் எழுத்துப் பிழையுடன் வருவதால் இதனைப் பார்க்கும் பல லட்சம் மக்களும், குழந்தைகளும் எழுத்துப் பிழையுடனே அதனை எழுத வாய்ப்புள்ளதாகக் கருதி திரையரங்கு மேலாளரிடம் இதுகுறித்து முறையிட்டுள்ளனர். அதற்கு "இந்த படத்தின் காப்பி மும்பையிலிருந்து வந்துள்ளது. அதனை தங்களால் மாற்ற இயலாது" என அவர் கூறியுள்ளார். இதனைத் தொடர்ந்து வீட்டிற்கு வந்த மாணவி இதுகுறித்து தமிழக முதலமைச்சர் மு.க.ஸ்டாலினுக்கும், துணை முதலமைச்சர் உதயநிதி ஸ்டாலினுக்கும் எழுத்துப் பிழையைச் சுட்டிக் காட்டி இன்று காலை கடிதம் அனுப்பியுள்ளார்.