‘என் கணவர் முகத்தை காட்டுங்க’.. குவைத் தீ விபத்தில் சிக்கியவரின் மனைவி கண்ணீர் மல்க கோரிக்கை! - Kuwait fire accident

Kuwait Fire Accident: குவைத் தீ விபத்தில் உயிரிழந்த தமிழர்களில் தனது கணவரும் இருப்பதாகக் கூறும் சென்னை ராயபுரத்தைச் சேர்ந்த பெண், அவர் குறித்த உண்மையான தகவலை அளிக்க வேண்டும் என கண்ணீர் மல்க அரசுக்கு கோரிக்கை விடுத்துள்ளார்.

சென்னை:குவைத் நாட்டில் புலம்பெயர்ந்த தொழிலாளர்கள் அதிகமாக வசிக்கும் மங்காஃப் பகுதியில் உள்ள கட்டிடத்தில் ஏற்பட்ட தீ விபத்தில் 40 இந்தியர்கள் உள்பட 49 பேர் உயிரிழந்துள்ளனர். இதில் 19 பேர் கேரளாவை சேர்ந்தவர்கள் என்றும் 5 பேர் தமிழர்கள் என்றும் தகவல் வெளியாகியுள்ள நிலையில், கூடுதலாக இரண்டு பேர் என மொத்தம் 7 பேர் பலியாகியுள்ளதாக தகவல் வெளியாகியுள்ளது.

சிவசங்கரன் (Image Credit : ETV Bharat Tamilnadu)

மேலும், தீ விபத்தில் காயமடைந்தவர்கள் மருத்துவமனையில் சிகிச்சை பெற்று வருகின்றனர். இவர்களில் பலரது நிலமை கவலைக்கிடமாக உள்ளதால் பலி எண்ணிக்கை மேலும் அதிகரிக்கும் என்று அஞ்சப்படுகிறது. இதற்கிடையே, தீ விபத்தில் உயிரிழந்தவர்களின் உடலை இந்தியாவிற்கு கொண்டு வரவும், மேலும் அங்கு சிக்கியுள்ளவர்களை மீட்கவும் மத்திய அரசு நடவடிக்கை எடுத்து வருகிறது.

இந்த நிலையில், குவைத் தீ விபத்து தொடர்பாக அயலக வாழ் தமிழர்கள் நலத்துறை அமைச்சர் செஞ்சி மஸ்தானுடன் முதலமைச்சர் மு.க.ஸ்டாலின் இன்று ஆலோசனையில் ஈடுபட்டார். அயலக தமிழர் நலத்துறை எடுத்துவரும் நடவடிக்கைகள் குறித்து அமைச்சர் செஞ்சி மஸ்தானிடம் முதலமைச்சர் மு.க.ஸ்டாலின் கேட்டறிந்தார்.

இதனிடையே, குவைத் தீ விபத்தில் தமிழகத்தில் ராமநாதபுரம் மாவட்டத்தைச் சேர்ந்த கருப்பணன், சின்னத்துரை, வீராசாமி மாரியப்பன், செஞ்சியை சேர்ந்த முகமது ஷெரீப், தஞ்சையைச் சேர்ந்த புனாஃப் ரிச்சர்டு ராய் ஆகியோர் உயிரிழந்துள்ளதாக ஏற்கனவே தகவல் வெளியாகியுள்ள நிலையில், கூடுதலாக இரண்டு பேர் இறந்துள்ளதாக தகவல் தற்போது வெளியாகியுள்ளது.

இது தொடர்பாக இந்திய தூதரகம் அதிகார பூர்வமான தகவல் கொடுக்காத நிலையில் தமிழ் சங்கங்கள் மூலமாக தகவல் பெறப்பட்டு வருவதாக அமைச்சர் செஞ்சி மஸ்தான் தெரிவித்திருந்தார். மேலும் இந்திய தூதரகம் அதிகார பூர்வமாக தகவல் கொடுத்துள்ள பிறகு இறந்தவர்களின் உடல் உறவினர்களிடம் ஒப்படைக்கும் பணி தீவிரப்படுத்தும் என மேலும் கூறினார்.

சென்னை ராயபுரத்தை சேர்ந்த சிவசங்கரன் என்பவர் குவைத் நாட்டில் பணிபுரிந்து வருகிறார் என்றும், இவர் விபத்து நடந்த கட்டிடத்தில் தங்கி இருந்தார் என்றும் கூறப்படுகிறது. இந்நிலையில் தீ விபத்து நடந்த நாளில் இருந்து சிவசங்கரன் தொலைபேசியை எடுக்காமல் இருந்துள்ளார். இதன் காரணமாக அச்சத்தில் இருந்த குடும்பத்தினர், குவைத்தில் இருக்கும் சிவசங்கரனின் நண்பர்களுக்கு முயற்சி செய்தனர்.

இதில் முதலில் இறந்தவர்களின் பெயர்களில் சிவசங்கரனின் பெயர் இல்லை என கூறிய அவர்கள் இறுதியில் மூச்சு திணறல் ஏற்பட்டு சிவசங்கர் இறந்ததாக சிவசங்கரனின் மனைவிக்கு தெரிவித்துள்ளனர். இந்த தகவல் கிடைத்த பிறகு, அழுது புலம்பும் சிவசங்கரனின் மனைவி ஹேம குமாரி, இறந்ததாக கூறப்படும் தனது கணவரின் முகத்தை தனக்கு காட்ட வேண்டும் என அரசுக்கு கோரிக்கை விடுத்துள்ளார்.

இதையும் படிங்க:குவைத் தீ விபத்து; 5 தமிழர்கள் உயிரிழப்பா? அமைச்சர் செஞ்சி மஸ்தான் விளக்கம்! - kuwait fire accident