தூத்துக்குடி:திருச்செந்தூர் சுப்பிரமணிய சுவாமி திருக்கோயிலில் இன்று (ஞாயிற்றுக்கிழமை) பாமக தலைவர் அன்புமணி ராமதாஸ் மற்றும் அவரது மனைவி சௌமியா அன்புமணி ஆகியோர் சாமி தரிசனம் செய்ய வந்திருந்தனர். முன்னதாக, துலாபாரத்தில் எடைக்கு எடை அரிசியை தானமாக கொடுக்கும் நிகழ்வு நடந்தது. அதில், 780 கிலோ அரிசி தானமாக வழங்கப்பட்டது. தொடர்ந்து, திருச்செந்தூர் வள்ளி குகை பின்புறம் உள்ள பகுதியில் சத்ரு சம்ஹார யாகம் நடத்தினர்.
அதனைத் தொடர்ந்து செய்தியாளர்களைச் சந்தித்த அன்புமணி ராமதாஸ், "வன்னியர் இட ஒதுக்கீடு குறித்து தமிழக அரசு பிஆர்ஓக்கள் மூலம் தவறான தகவலை அளித்துள்ளது. தவறான தகவல் அளித்துள்ள முதலமைச்சர் மு.க.ஸ்டாலினுக்கு பாமக சார்பில் கடும் கண்டனங்களைத் தெரிவித்து கொள்கிறேன். மேலும், இதேபோல தமிழக அரசு தொடர்ந்து செய்து கொண்டிருந்தால், அடுத்த 18 மாதத்தில் மீண்டும் சட்டமன்றத் தேர்தல் வர இருக்கிறது. அதில் நாங்கள் யார் எனக் காண்பிக்கக்கூடிய காலம் வரும் என்றார்.
அதைத் தொடர்ந்து, கடந்த டிசம்பர் மாதம் தென் மாவட்டங்களில் பெய்த பெருவெள்ளத்தைச் சமாளிக்க மத்திய அரசு போதிய நிதி வழங்காதது குறித்து செய்தியாளர்கள் கேட்ட கேள்விக்கு, மத்திய அரசு இதுபோன்ற காலங்களில் கண்டிப்பாக உதவி செய்யத்தான் வேண்டும். ஆனால், மாநில அரசு கடந்த பட்ஜெட் நிதியாண்டில் ரூ.18 லட்சம் கோடி தாக்கல் செய்தது. அதில், ஒரு ரூ.2 ஆயிரம் கோடியை பேரிடர் காலத்தில் பயன்படுத்த வேண்டிய தொகைக்காக ஒதுக்கினால் தமிழக அரசே இதனைச் சமாளிக்கலாம்.