ஒருநாள் கிரிக்கெட்: தென் ஆப்பிரிக்காவை ஒயிட்வாஷ் செய்த இந்திய மகளிர்! - Ind w vs SA w 3rd oneday cricket

தென் ஆப்பிரிக்க மகளிர் அணிக்கு எதிரான மூன்றாவது மற்றும் கடைசி ஒருநாள் கிரிக்கெட் போட்டியில் இந்திய மகளிர் 6 விக்கெட் வித்தியாசத்தில் வெற்றி பெற்று ஒயிட் வாஷ் செய்தனர்.

பெங்களூரு:இந்தியா சுற்றுப்பயணம் மேற்கொண்டு உள்ள தென் ஆப்பிரிக்க மகளிர் அணி தலா 3 போட்டிகள் கொண்ட ஒருநாள் மற்றும் டி20 கிரிக்கெட் போட்டிகள் மற்றும் ஒரேயொரு டெஸ்ட் கிரிக்கெட் தொடரில் விளையாடி வருகிறது. முதலிலி ஒருநாள் கிரிக்கெட் போட்டிகள் தொடங்கிய நிலையில், முதல் இரண்டு ஆட்டங்களில் முறையே இந்திய மகளிர் அணி 143 ரன்கள் மற்றும் 4 ரன்கள் வித்தியாசத்தில் வெற்றி பெற்றது.

இந்நிலையில், இவ்விரு அணிகளுக்கு இடையிலான மூன்றாவது மற்றும் கடைசி ஒருநாள் கிரிக்கெட் போட்டி பெங்களூருவில் இன்று (ஜூன்.23) நடைபெற்றது. டாஸ் வென்ற தென் ஆப்பிரிக்க அணியின் கேப்டன் லாரா வோல்வார்ட் பேட்டிங்கை தேர்வு செய்தார். அதன்படி முதலில் களமிறங்கிய தென் ஆப்பிரிக்கா வீராங்கனைகள் லாரா மற்றும் தஸ்மின் பிரிட்ஸ் அபாரமாக விளையாடி அணிக்கு நல்ல தொடக்கத்தை அமைத்துக் கொடுத்தனர்.

முதல் விக்கெட்டுக்கு இந்த ஜோடி 102 ரன்கள் சேர்த்தது. 61 ரன்கள் விளாசிய கேப்டன் லாரா, இந்திய வீராங்கனை அருந்ததி ரெட்டியின் பந்துவீச்சில் அவரிடமே கேட்ச் கொடுத்து ஆட்டமிழந்தார். அதன் பின் களமிறங்கிய தென் ஆப்பிரிக்க வீராங்கனைகள் யாரும் பெரிய அளவில் சோபிக்கவில்லை.

சொற்ப ரன்களில் ஆட்டமிழந்து அடுத்தடுத்து வெளியேறினர். சிறிது நேரம் மட்டுமே நீடித்த மற்றொரு தொடக்க வீராங்கனை தஸ்மின் பிரிட்ஸ் தன் பங்குக்கு 38 ரன்கள் அடித்து கொடுத்து ஆட்டமிழந்தது. இறுதிக் கட்டத்தில் நாடின் டி கிளெர்க் (26 ரன்) மற்றும் மிக்கே டி ரெய்டர் (26 ரன்) ஆகியோ நம்பிக்கை அளிக்கும் வகையில் விளையாடி அணி 200 ரன்களை கடக்க உதவினர்.

50 ஓவர்கள் முடிவில் தென் ஆப்பிரிக்க அணி 8 விக்கெட் இழப்புக்கு 215 ரன்கள் குவித்தது. இந்திய அணி தர்ப்பில் அருந்ததி ரெட்டி மற்றும் தீப்தி ஷர்மா ஆகியோர் தலா 2 விக்கெட்டுகளை வீழ்த்தினர். ஸ்ரெயங்கா பாடீல் மற்றும் பூஜா வஸ்தரகர் ஆகியோர் தலா 1 விக்கெட்டுகளை வீழ்த்தினர்.

தொடர்ந்து 216 ரன்கள் எடுத்தால் வெற்றி என்ற இலக்கை நோக்கி இந்திய மகளிர் அணி விளையாடியது. பெரிதும் எதிர்பார்க்கப்பட்ட தொடக்க வீராங்கனை ஷபாலி வர்மா 25 ரன்களில் ஆட்டமிழந்து ஏமாற்றம் அளித்தார். அவரைத் தொடர்ந்து களமிறங்கிய பிரியா புன்யா தன் பங்குக்கு 28 ரன்கள் எடுத்து வெளியேறினார்.

இதனிடையே மற்றொரு தொடக்க வீராங்கனை ஸ்மிரிதி மந்தனாவுடன், கேப்டன் ஹர்மன் பிரீத் கவுர் ஜோடி சேர்ந்தார். அபாரமாக விளையாடிய இந்த ஜோடி தென் ஆப்பிரிக்க பந்துவீச்சை சிதறடித்தது. ஏதுவான பந்துகளை அடிக்கடி எல்லைக் கோட்டுக்கு அனுப்பிய இருவரும் குழுமியிருந்த ரசிகர்களை உற்சாக வெள்ளத்தில் ஆழ்த்தினர்.

அபாரமாக விளையடிய தொடக்க வீராங்கனை ஸ்மிரிதி மந்தனா 90 ரன்கள் விளாசிய நிலையில் ஆட்டமிழந்தார். அவரைத் தொடர்ந்து கேப்டன் ஹர்மன்பிரீத் கவுரும் 42 ரன்களில் ஆட்டமிழந்து வெளியேறினார். கடைசி கட்டத்தில் ஜேமியா ரோட்ரிக்ஸ் மற்றும் ரிச்ச கோஷ் ஆகியோர் அணியின் வெற்றியை உறுதி செய்தனர்.

40.4 ஓவர்கள் முடிவில் 4 விக்கெட் இழப்புக்கு இந்திய மகளிர் அணி 220 ரன்களை எடுத்து 6 விக்கெட் வித்தியாசத்தில் அபார வெற்றி பெற்றது. இந்த வெற்றியின் மூலம் மூன்று போட்டிகள் கொண்ட ஒருநாள் கிரிக்கெட் தொடரை 3-க்கு 0 என்ற கணக்கில் கைப்பற்றி தென் ஆப்பிரிக்க அணியை இந்திய மகளிர் ஒயிட் வாஷ் செய்தனர்.

இதையும் படிங்க:"ஆஸ்திரேலியாவை வீழ்த்தியது ஆப்கான் மக்களின் கிரிக்கெட் ஆர்வத்தை தூண்டும்"- லால்சந்த் ராஜ்புத்! - Aus vs Afg T20 World Cup Super 8