டெல்லி:பாரீஸ் ஒலிம்பிக் போட்டியில் கலந்து கொண்ட இந்திய மல்யுத்த வீராங்கனை வினேஷ் போகத் இன்று நாடு திரும்பினார். காலை 10.30 மணிக்கு டெல்லி விமான நிலையம் வந்த அவருக்கு ரசிகர்கள் உற்சாக வரவேற்பு அளித்தனர். சக மல்யுத்த வீரர் வீராங்கனைகள் பஜ்ரங் பூனியா, சாக்ஷி மாலிக் ஆகியோர் பூங்கொத்து கொடுத்து வினேஷ் போகத்தை வரவேற்றனர்.
விமான நிலையத்தில் திரண்ட ஆயிரக்கணக்கான ரசிகர்கள் மேள தாளங்கள் முழங்க கோஷங்கள் எழுப்பி வினேஷ் போகத்தை கொண்டாடி தீர்த்தனர். தொடர்ந்து திறந்தவெளி காரில் தோன்றிய வினேஷ் போகத், ஊர்வலமாக அழைத்துச் செல்லப்பட்டார். நண்பர்கள் பஜ்ரங் பூனியா, சாக்ஷி மாலிக் உறவினர்களுடன் திறந்த வெளி காரில் பயணித்த வினேஷ் போகத் கண்ணீர் மல்க அனைவருக்கும் நன்றி தெரிவித்தார்.
தொடர்ந்து செய்தியாளர்களிடையே பேசிய வினேஷ் போகத், ஒட்டுமொத்த உலகத்திற்கும் நன்றி கூற கடமைப்பட்டுள்ளேன். அனைவருக்கும் நன்றி தெரிவித்துக் கொள்கிறேன் என்று கூறினார். தொடர்ந்து பேசிய சாக்ஷி மாலிக், நாட்டுக்கான பணியை வினேஷ் நிறைவேற்றி உள்ளார். வெகு சிலருக்கு மட்டுமே நாட்ட்டை பெருமைப்படுத்தும் வாய்ப்பு கிடைக்கும். அவருக்கான மரியாதையை நாம் வழங்க வேண்டும் என்று கூறினார்.