சென்னை: உடலுறவு என்பது ஆண், பெண் என இருபாலருக்கும் பொதுவான ஒரு விஷயம். ஆனால், உடலுறவு குறித்தோ அல்லது அதன் மீதான ஆர்வம் குறித்தோ ஆண்கள் பேசும் அளவுக்கு, பெண்களால் வெளிப்படையாகப் பேச முடியாது. அப்படி பேசினால் அந்த பெண்ணிற்கு ஆபாசமான ஒரு முத்திரை குத்திவிடும் சமூகத்தில்தான் நாம் இன்றும் வாழ்ந்துகொண்டு இருக்கிறோம்.
இது குறித்து WebMD இணையதளப் பக்கத்தில் பாலியல் குறித்த மருத்துவ ஆராய்ச்சியாளர்களின் ஆய்வுக் கட்டுரை ஒன்று வெளியாகி உள்ளது. அதில், ஆண்கள் மற்றும் பெண்களுக்கு இருக்கும் தனிப்பட்ட பாலியல் விருப்பங்கள் மற்றும் இருபாலருக்குமான மாறுபட்ட கருத்து உள்ளிட்ட பல்வேறு விஷயங்கள் அதில் குறிப்பிடப்பட்டுள்ளது.
அதில் ஆண்களை விட பெண்களின் உடலுறவு ரீதியான எண்ணங்கள் உடலோடு இல்லாமல் மனதளவில் பிணைக்கப்பட்டு உள்ளதாகவும், ஆண்களுக்கு அப்படி இல்லை எனவும் கூறப்பட்டுள்ளது. இடம், சூழல், மனநிலை உள்ளிட்ட அனைத்தும் மகிழ்ச்சியை ஏற்படுத்தும் சூழலில் மட்டுமே ஒரு பெண்ணால் முழுமையான உடலுறவில் இருக்க முடியும் எனவும் கூறப்பட்டுள்ளது.
இது ஒரு பக்கம் இருக்க, உடலுறவில் ஆர்வம் ஏற்படுத்தும் ஹார்மோன்கள், ஆண்களை விட பெண்களுக்குத்தான் அதிகம் சுரப்பதாகவும், இதனால் பாலியல் ஈடுபாட்டில் பெண்கள் மிகுந்த தேடல் கொள்வார்கள் எனவும் ஆய்வு கூறுகிறது. ஆனால், பெண்கள் தங்களுக்கு இருக்கும் பாலியல் உணர்வுகளை வெளிப்படையாக கணவரிடம் கூட கூற முடியாத சமூக கட்டமைப்பில் வாழ்ந்துகொண்டு இருப்பதால், இன்றுவரை இது தொடர்பான பிரச்சினையை பெண்கள் எதிர்கொள்கிறார்கள் எனவும் ஆய்வாளர்கள் கூறியுள்ளனர்.