த்ரிஷா ரியாக்‌ஷன் முதல் பிரதீப் ரங்கநாதனின் ஃபேன் பாய் மொமெண்ட் வரை.. கில்லி ரீரிலீஸ் கொண்டாட்டம்! - ghilli re release

Ghilli Rerelease: இன்று கில்லி திரைப்படம் ரீரிலீஸ் ஆனது குறித்து நடிகை த்ரிஷா தனது எக்ஸ் பக்கத்தில் பதிவிட்டுள்ளார். மேலும், இயக்குநரும், நடிகருமான பிரதீப் ரங்கநாதன், கில்லி படத்தை திரையரங்கில் பார்த்து ஆரவாரம் செய்த வீடியோவை பகிர்ந்துள்ளார்.

சென்னை: கடந்த 2004ஆம் ஆண்டு தரணி இயக்கத்தில் விஜய், த்ரிஷா, பிரகாஷ் ராஜ் உள்ளிட்டோர் நடித்து வெளியான திரைப்படம் கில்லி. தெலுங்கில் மகேஷ் பாபு நடிப்பில் வெளியான ஒக்கடு படத்தின் அதிகாரப்பூர்வ ரீமேக் படமாக கில்லி உருவாக்கப்பட்டது. இப்படத்திற்கு வித்யாசாகர் இசையமைத்திருந்தார். அவர் இசையில் இப்படத்தில் இடம்பெற்ற அனைத்துப் பாடல்களும் மிகப்பெரிய வெற்றியைப் பெற்றது.

குறிப்பாக அப்படி போடு, அர்ஜுனரு வில்லு ஆகிய பாடல்கள் இன்றுவரை பலரது விருப்பப் பாடலாக உள்ளது. கில்லி வெளியான போது ஹவுஸ்புல் காட்சிகளுடன் மெகா ஹிட்டானது. கில்லி வெளியாகி 20 ஆண்டுகள் ஆன நிலையில், இன்று உலகம் முழுவதும் மீண்டும் ரீ ரிலீஸ் செய்யப்பட்டுள்ளது. அமெரிக்கா உள்ளிட்ட நாடுகளிலும் சேர்த்து, இப்படம் கிட்டத்தட்ட 600க்கும் மேற்பட்ட திரையரங்குகளில் வெளியிடப்பட்டுள்ளது.

கில்லி ரீ ரிலிஸ் ஆனதை முன்னிட்டு விஜய் ரசிகர்கள் அனைத்து இடங்களிலும் ஆட்டம் பாட்டத்துடன் கொண்டாடி வருகின்றனர்.‌ ஞாயிற்றுக்கிழமை வரை கில்லி திரைப்படம் வெளியாகியுள்ள திரையரங்குகளில் அனைத்து காட்சிகளும் ஹவுஸ் ஃபுல் ஆகியுள்ளன. முதல் நாள் மட்டும் கிட்டத்தட்ட 7 கோடி வரை வசூல் கிடைக்கும் என்று எதிர்பார்க்கப்படுகிறது. அவ்வாறு வசூல் சாதனை படைக்கும் பட்சத்தில், இதுவரை வெளியான ரீ ரிலீஸ் படங்கள் செய்யாத சாதனையாக இது இருக்கும்.

கில்லி படத்தில் விஜய்யின் வீடு இருக்கும் பகுதி, லைட் ஹவுஸ் எல்லாமே செட் போட்டு எடுக்கப்பட்டதாகவும், மொத்த செட் 7 ஏக்கர் பரப்பளவு கொண்டது என இயக்குநர் தரணி சமீபத்தில் கூறி இருந்தார். ஆனால், இப்போது வரை அந்த செட் இருக்கும் இடம் குறித்த சஸ்பென்ஸ் நீடித்து வருகிறது. மேலும், இன்று கில்லி ரீரிலீஸ் செய்யப்பட்டது குறித்து த்ரிஷா தனது எக்ஸ் தளப் பக்கத்தில் வெளியிட்டுள்ள பதிவில், “வாழ்க்கை ஒரு வட்டம். முதல் நாள், முதல் காட்சிக்கு அப்போது இருந்த உற்சாகம் இன்று மீண்டும் கிடைத்துள்ளது” என கூறியுள்ளார்.

இந்த நிலையில், இயக்குநரும், நடிகருமான பிரதீப் ரங்கநாதன், ரீரிலீஸ் செய்யப்பட்ட கில்லி படத்தைப் பார்த்து ஆரவாரம் செய்த வீடியோ ஒன்றினை தனது எக்ஸ் தளப் பக்கத்தில் பகிர்ந்துள்ளார்.

இதையும் படிங்க:த்ரிஷா முதல் பிரதீப் வரை.. மக்களவைத் தேர்தலில் ஆப்செண்ட் ஆன திரைப்பிரபலங்கள் யார்? - ரவுண்ட் அப்! - TN Lok Sabha Election Vote