சென்னை: ஸ்டுடியோ கிரீன் ஞானவேல் ராஜா தயாரிப்பில் சிவா இயக்கத்தில் சூர்யா, பாபி தியோல், திஷா படானி, நடராஜன் சுப்ரமணியன், ஜெகபதி பாபு உள்ளிட்ட பலர் நடித்துள்ள திரைப்படம் ‘கங்குவா’. பெரும் பொருட்செலவில் தயாரிக்கப்பட்டுள்ள இத்திரைப்படம் தமிழ், தெலுங்கு, கன்னடம், மலையாளம், ஹிந்தி என பல்வேறு மொழிகளில் வரும் அக்டோபர் 10ஆம் தேதி வெளியாகிறது. சிவா இயக்கத்தில் படப்பிடிப்பு பல மாதங்களாக நடைபெற்று வருகிறது. சிவா தன்னுடைய குடும்ப சென்டிமென்ட் கதையில் இருந்து விலகி ஃபேண்டஸி ஜானரில் இந்த படத்தை உருவாக்கியுள்ளார்.
இந்த படத்தில் சூர்யா இரட்டை வேடங்களில் நடித்துள்ளதாக கூறப்படும் நிலையில், அவரது பிறந்தநாளை முன்னிட்டு படத்தின் முதல் பாடல் 'ஆதி நெருப்பே, ஆறாத நெருப்பே' பாடல் வெளியானது. தேவி ஸ்ரீ பிரசாத் கங்குவா படத்திற்கு இசையமைத்துள்ள நிலையில், முதல் சிங்கிள் கலவையான விமர்சனங்களை பெற்றது. ஏ.ஆர்.முருகதாஸ் இயக்கத்தில் சூர்யா நடித்த 'ஏழாம் அறிவு' படத்திற்கு பிறகு ரசிகர்கள் மத்தியில் கங்குவா படத்திற்கு எதிர்பார்ப்பு அதிகரித்துள்ளது.