சென்னை: பிரபல பாடலாசிரியர் சினேகன், கன்னிகா ஜோடி தங்களுக்கு குழந்தை பிறக்கப் போவதாக அறிவித்துள்ளனர். பிரபல பாடலாசிரியர் சினேகன் 1997ஆம் ஆண்டு தமிழ் சினிமாவில் 'புத்தம் புது பூவே' என்ற படத்தில் தனது முதல் பாடலை எழுதினார். பின்னர் 2001இல் வெளியான 'பாண்டவர் பூமி' படத்தில் சினேகன் எழுதிய பாடல்கள் "அவரவர் வாழ்க்கையில்", "தோழா தோழா" ஆகிய பாடல்கள் மிகவும் பிரபலமானது.
இதனைத்தொடர்ந்து 'மௌனம் பேசியதே' படத்தில் "ஆடாத ஆட்டமெல்லாம்", 'சாமி' படத்தில் "கல்யாணம் தான் கட்டிகிட்டு", 'ஆட்டோகிராஃப்' படத்தில் "ஞாபகம் வருதே" உள்ளிட்ட பாடல்கள், 'ராம்' படத்தில் "ஆராரிராரோ", 'ஆடுகளம்' படத்தில் "யாத்தே" உள்ளிட்ட பல ஹிட் பாடல்களை எழுதியுள்ளார். கமல்ஹாசன் தொகுத்து வழங்கிய பிக்பாஸ் முதல் சீசனில் சினேகன் பங்கேற்று மேலும் பிரபலமடைந்தார்.
இதனைத்தொடர்ந்து கமல்ஹாசன் மக்கள் நீதி மய்யம் தொடங்கிய போது அக்கட்சியில் இணைந்து தேர்தலில் போட்டியிட்டார். 2019ஆம் ஆண்டு நாடாளுமன்ற தேர்தலில் சிவகங்கை தொகுதி, கடந்த 2021ஆம் ஆண்டு சட்டமன்ற தேர்தலில் சென்னை, விருகம்பாக்கம் தொகுதியில் போட்டியிட்டார். இந்நிலையில் கடந்த 2021ஆம் ஆண்டு சினேகன் தனது நீண்ட நாள் காதலியான கன்னிகாவை திருமணம் செய்து கொண்டார்.