சென்னை: தமிழ் சினிமாவில் முன்னணி நடிகர்களில் ஒருவராகத் திகழ்பவர் விஜய். இவர் தற்போது இயக்குநர் வெங்கட் பிரபு இயக்கத்தில் 'கோட்' திரைப்படத்தில் நடித்து வருகிறார். இந்த படத்தை ஏஜிஎஸ் நிறுவனம் தயாரிக்கிறது. இந்த படத்திற்கு யுவன் சங்கர் ராஜா இசையமைக்கிறார். இந்த படம் வருகின்ற செப்.5 ஆம் தேதி விநாயகர் சதுர்த்தியை முன்னிட்டு வெளியாகும் எனப் படக்குழு அறிவித்துள்ளது.
இந்த படத்தில் மீனாட்சி சவுத்ரி, பிரசாந்த், பிரபுதேவா, லைலா, வைபவ், மோகன் உள்ளிட்ட பல நடிகர்கள் நடித்துள்ளனர். சித்தார்த்த நுனி ஒளிப்பதிவாளராக பணியாற்றி வருகிறார். இதில் விஜய் இரட்டை வேடத்தில் நடிக்கிறார் என்றும் கூறப்படுகிறது. தற்போது இப்படத்தின் படப்பிடிப்பு பணிகள் ரஷ்யாவில் நடைபெற்று வருவதாகக் கூறப்படுகிறது.
இந்நிலையில் தமிழ் வருடப் புத்தாண்டை முன்னிட்டு, கோட் திரைப்படத்தின் முதல் பாடல் நாளை(ஏப்.14) வெளியாகும் என அர்ச்சனா கல்பாத்தி தனது எக்ஸ் பக்கத்தில் முதல் பாடலின் ப்ரோமோ வெளியிட்டு பதிவிட்டுள்ளார். மேலும், படத்தின் இயக்குநர் வெங்கட் பிரபு தனது எக்ஸ் பக்கத்தில் 'நாளை சம்பவம் உறுதி' எனவும் பதிவிட்டுள்ளார்.