ஹைதராபாத்: தெலுங்கு திரையுலகில் 'மெகா ஸ்டார்' என அழைக்கப்படும் நடிகர் சிரஞ்சீவி கின்னஸ் உலக சாதனை படைத்துள்ளார். தனது 45 வருட திரையுலக வாழ்வில் 156 படங்களில், 537 பாடல்களுக்கு, 24,000 நடன அசைவுகள் செய்து உலக சாதனை படைத்துள்ளார். நடிகர் சிரஞ்சீவியின் நடன அசைவுகள் அவர் நடிக்க தொடங்கிய காலகட்டத்திலிருந்து ரசிகர்கள் மத்தியில் மிகவும் பிரபலம்.
1978ஆம் ஆண்டில் சினிமாவில் நடிக்க தொடங்கிய சிரஞ்சீவி, ருத்ரா வீணா, தாகூர், சுவயம் குருஷீ, ஸ்டாலின், கேங் லீடர் உள்ளிட்ட பல படங்களில் நடித்துள்ளார். மேலும் ஒன்றிய அரசு சிரஞ்சீவிக்கு பத்ம விபூஷன் விருது வழங்கி கௌரவித்தது. உலக சாதனை படைத்தது குறித்து நடிகர் சிரஞ்சீவி கூறுகையில், "நான் கின்னஸ் உலக சாதனை படைப்பேன் என எதிர்பார்க்கவில்லை. இத்தனை வருட திரை வாழ்வில் நடனம் எனது வாழ்வில் ஒரு அங்கமாக மாறியது," என்றார்.