சென்னை: நடிகர் அருண் விஜய், பாலா இயக்கத்தில் ’வணங்கான்’ படத்தில் நடித்த அனுபவம் குறித்து தனது எக்ஸ் பக்கத்தில் நெகிழ்ச்சியுடன் பதிவிட்டுள்ளார். வி ஹவுஸ் புரோடக்சன்ஸ் நிறுவனம் மற்றும் பி ஸ்டூடியோஸ் நிறுவனம் இணைத்து தயாரித்து பாலா இயக்கத்தில் அருண் விஜய், ரோகினி பிரகாஷ், சமுத்திரகனி, மிஷ்கின் உள்ளிட்ட பலர் நடித்துள்ள திரைப்படம் ’வணங்கான்’.
ஜீ.வி. பிரகாஷ் இசையமைத்துள்ள இப்படத்திற்கு வைரமுத்து பாடல்களை எழுதி உள்ளார். வணங்கான் படத்தின் ஃப்ர்ஸ்ட் லுக் மற்றும் டிரெய்லர் வெளியாகி ரசிகர்கள் மத்தியில் வரவேற்பைப் பெற்றது. இப்படத்திற்கு தணிக்கை குழு யு/ஏ (U/A) தணிக்கை சான்றிதழ் வழங்கியுள்ளது. இந்த படத்தின் டிரெய்லரில் அருண் விஜய் கவனம் பெற்றார். இந்நிலையில் அருண் விஜய் தனது சமூக வலைதள பக்கத்தில் வணங்கான் படத்தில் நடித்த அனுபவத்தை பகிர்ந்துள்ளார்.
அவரது பதிவில், “நான் திரையுலகில் கால் பதித்த காலத்தில் இருந்து, உங்கள் படைப்புகளின் ரசிகனாகவும், உங்களைக் கண்டு வியந்து, நேசித்து, ஒரு நடிகனாக "எனக்கும் இப்படி ஒரு வாய்ப்பு கிடைக்காதா" என ஏங்கியவனுக்கு தங்களின் இயக்கத்தில் பணியாற்ற 'வணங்கான்' படத்தின் மூலம் வாய்ப்பளித்தமைக்கு மனமார்ந்த நன்றிகள்.
நம் படப்பிடிப்பின் பொழுது கூட இக்கதையின் பாதிப்பை நான் முழுமையாக உணரவில்லை. ஆனால் அதனை இப்பொழுது வெள்ளித்திரையில் காண்கையில், என் உணர்ச்சிகளை வெளிப்படுத்த வார்த்தைகள் இல்லை. என் பெற்றோரை பெருமையில் நெகிழ்வடைய செய்தமைக்கு உங்களை வணங்குகிறேன்.