இந்தியா கூட்டணி மக்களவைத் தேர்தலுக்கு மட்டுமா? உமர் அப்துல்லா கேள்வியால் சலசலப்பு

இந்தியா கூட்டணியின் எதிர்காலம், தலைமை பதவி குறித்து தெளிவு தேவை என காஷ்மீர் முதலமைச்சர் உமர் அப்துல்லா கேட்டுள்ளார். மக்களவைத் தேர்தலுக்கு மட்டும் கூட்டணி என்றால் இப்போது அதனை கலைத்து விடலாம் என்றும் கூறியுள்ளார்.

ஜம்மு:இந்தியா கூட்டணியின் தலைமை பதவி, அதன் கொள்கைகள் குறித்து தெளிவு குறைவாக உள்ளது. இந்த கூட்டணி மக்களவைத் தேர்தலுக்கு மட்டும் என்றால், இப்போதைக்கு கூட்டணியை கலைத்து விடலாம் என்றும் உமர் அப்துல்லா கூறியுள்ளார்.

இது குறித்து கருத்துத் தெரிவித்துள்ள ஜம்மு-காஷ்மீர் முதலமைச்சரும், இந்தியா கூட்டணி தலைவர்களில் ஒருவருமான உமர் அப்துல்லா, களத்தில் உள்ள ஆம் ஆத்மி கட்சி, காங்கிரஸ் மற்றும் இதர கட்சிகள் பாஜகவுக்கு எதிராக எவ்வளவு தீவிரமாக பணியாற்றப்போகின்றோம் என்பதை தீர்மானிக்க வேண்டும். டெல்லி சட்டப்பேரவைத் தேர்தல் முடிவுற்ற பின்னர் இந்தியா கூட்டணியில் இடம் பெற்றுள்ள அனைத்து கட்சிகளையும் அழைத்துப் பேச வேண்டும். இந்த கூட்டணி மக்களவைத் தேர்தலுக்கு மட்டும்தான் என்றால், இதனை கலைத்து விடலாம். நாம் தனித்தனியே பணியாற்றலாம். சட்டப்பேரவைத் தேர்தல்களுக்கும் இந்த கூட்டணி பொருந்தும் என்றால், அனைவரும் உட்கார்ந்து ஒருவருக்கொருவர் ஒன்றிணைந்து செயல்பட வேண்டும்.

என் நினைவில் உள்ளவரை கூட்டணிக்கான காலவரம்பு எதுவும் நிர்ணயிக்கவில்லை. இந்தியா கூட்டணி கூட்டம் கூட்டப்படவில்லை என்பதுதான் விஷயம். கூட்டணியின் முக்கியமான தலைமை, கட்சி அல்லது எதிர்கால உத்திக்கான கொள்கை ஆகியவற்றில் தெளிவு இல்லை. இந்த கூட்டணி தொடர்கிறதா என்பதில் தெளிவில்லை. டெல்லி சட்டப்பேரவைத் தேர்தல் முடிவடைந்த உடன் இந்தியா கூட்டணி தலைவர்கள் கூட்டத்தைக் கூட்ட வேண்டும். அப்போதுதான் இதில் தெளிவு பிறக்கும்.

இதையும் படிங்க:ரூ.62,000 சம்பளத்தில் சென்னை மெட்ரோ ரயில் நிறுவனத்தில் வேலை... பெண் பொறியாளர்களுக்கு அழைப்பு...!

டெல்லி தேர்தலில் ஆம் ஆத்மி கட்சிக்கு செல்வாக்கு அதிகரித்திருப்பது குறித்து பற்றி இந்த தருணத்தில் நான் எதுவும் சொல்ல முடியாது. டெல்லி தேர்தலுக்கும் எங்களுக்கும் எந்தத் தொடர்பும் இல்லை. டெல்லி தேர்தலில் ஆம் ஆத்மி கட்சி இரண்டு முறை வென்றுள்ளது. இந்த டெல்லி மக்கள் என்ன தீர்மானிக்கின்றனர் என்பதை பொறுத்து இருந்துதான் பார்க்க வேண்டும்," என்றார்.

இந்த நிலையில் ஜம்மு-காஷ்மீர் சட்டப்பேரவைக்கு புதிதாக தேர்ந்தெடுக்கப்பட்டுள்ள எம்எல்ஏக்களுக்கு பயிற்சி அளிக்கப்படுகிறது. அது குறித்து பேசிய உமர் அப்துல்லா, "இந்த அவையில் பலரும் இதற்கு முன்பு உறுப்பினர்களாக இருந்திருக்கின்றோம். அப்போது மாநில அந்தஸ்து கொண்டதாக ஜம்மு காஷ்மீர் இருந்தது. இப்போதைய நடைமுறை வித்தியாசமாக உள்ளது. எனவே சட்டப்பேரவைக்கு என்ன அதிகாரங்கள் உள்ளது. எப்படி பணியாற்றுவது என்பது குறித்து நாம் புரிந்து கொள்ள வேண்டிய தேவை இருக்கிறது. இந்த பயிற்சி முகாமில் மாநிலங்களவை துணைத் தலைவர் கலந்து கொள்கிறார். மூத்த உறுப்பினர்களின் அனுபவம் பயன் அளிப்பதாக இருக்கும். வரவிருக்கும் கூட்டத்தொடரில் எம்எல்ஏக்கள் மக்கள் குரலை எவ்வாறு எதிரொலிப்பது என்பதில் தெளிவு கிடைக்கும்,"என்றார்.