26 ਸਾਲ ਦੇ ਨਾਇਬ ਤਹਿਸੀਲਦਾਰ ਨੇ UPSC ਦੀ ਪ੍ਰੀਖਿਆ 'ਚ ਹਾਸਿਲ ਕੀਤਾ 174 ਵਾਂ ਰੈਂਕ, ਜਾਣੋ ਦੋ ਵਾਰ ਮਿਲੀ ਹਾਰ ਨੇ ਕਿਵੇਂ ਬਦਲੀ ਗੌਰਵ ਉੱਪਲ ਦੀ ਜ਼ਿੰਦਗੀ... - Gorav Uppal passed the UPSC exam

Gorva Uppal Naib Tehsildar: ਜਦੋਂ-ਜਦੋਂ ਅਸਫ਼ਲਤਾ ਮਿਲਦੀ ਹੈ ਤਾਂ ਨਿਰਾਸ਼ ਹੋਣ ਦੀ ਥਾਂ ਹੋਰ ਸਖ਼ਤ ਤੋਂ ਸਖ਼ਤ ਮਿਹਨਤ ਕਰ ਉਸ ਅਸਫ਼ਲਤਾ ਨੂੰ ਸਫ਼ਲਤਾ 'ਚ ਬਦਲਦਾ ਦੇਖ ਕੇ ਖੁਸ਼ੀ ਦਾ ਕੋਈ ਟਿਕਾਣਾ ਨਹੀਂ ਰਹਿੰਦਾ। ਇਸੇ ਲਈ ਪਹਿਲਾਂ ਕਾਮਯਾਬ ਹੋਣ ਲਈ ਨਾਕਾਮਯਾਬ ਹੋਣਾ ਬੇਹੱਦ ਜ਼ਰੂਰੀ ਹੈ। ਆਖਿਰ ਕਿਵੇਂ ਹਾਸਿਲ ਕੀਤੀ ਇਹ ਕਾਮਯਾਬੀ ਆਓ ਜਾਣਦੇ ਹਾਂ ਨਾਇਬ ਤਹਿਸੀਲਦਾਰ ਗੌਰਵ ਉੱਪਲ ਕੋਲੋਂ...

ਅੰਮ੍ਰਿਤਸਰ: ਅਕਸਰ ਕਿਹਾ ਜਾਂਦਾ ਹੈ ਕਿ ਸਮਾਂ ਬਹੁਤ ਬਲਵਾਨ ਹੈ। ਤੁਸੀਂ ਸਮੇਂ ਦੀ ਜਿਵੇਂ ਵਰਤੋਂ ਕਰਦੇ ਹੋ, ਉਹ ਉਸੇ ਅੰਦਾਜ਼ 'ਚ ਤੁਹਾਨੂੰ ਆਪਣੀ ਕੀਮਤ ਦਾ ਅਹਿਸਾਸ ਕਰਵਾਉਂਦਾ ਹੈ। ਅਜਿਹਾ ਹੀ ਅਹਿਸਾਸ ਸਮੇਂ ਨੇ ਗੋਰਵ ਉੱਪਲ ਨੂੰ ਕਰਵਾਇਆ ਹੈ। 2020 'ਚ ਕੋਰੋਨਾ ਸਮੇਂ ਗੋਰਵ ਨੇ ਜੋ ਜੀਅ ਤੋੜ ਮਿਹਨਤ ਕੀਤੀ ਅੱਜ ਉਸ ਦੀ ਬਦੌਲਤ ਗੋਰਵ ਨੂੰ ਆਪਣੇ ਆਪ 'ਤੇ ਮਾਣ ਮਹਿਸੂਸ ਹੋ ਰਿਹਾ ਹੈ।

ਨਾਇਬ ਤਹਿਸੀਲਦਾਰ ਗੌਰਵ ਉੱਪਲ ਦੇ ਵਿਚਾਰ

ਕਿੰਝ ਮਿਲੀ ਕਾਮਯਾਬੀ: ਦਰਅਸਲ ਦੇਸ਼ ਭਰ 'ਚ ਯੂਨੀਅਨ ਪਬਲਿਕ ਸਰਵਿਸ ਕਮਿਸ਼ਨ (UPSC) ਦੇ ਨਤੀਜੇ ਆ ਚੁੱਕੇ ਹਨ। ਦੇਸ਼ ਭਰ ਵਿੱਚ UPSC ਦੇ ਨਤੀਜੇ ਆਉਣ ਤੋਂ ਬਾਅਦ ਵੱਖ-ਵੱਖ ਰੈਂਕ ਹਾਸਿਲ ਕਰਨ ਵਾਲੇ ਪ੍ਰੀਖਿਆਰਥੀਆਂ 'ਚ ਬੇਹੱਦ ਖੁਸ਼ੀ ਦਾ ਮਾਹੌਲ ਹੈ। ਇਹਨਾਂ ਚੋਣ ਨਤੀਜਿਆਂ ਦੇ ਵਿੱਚ ਤਹਿਸੀਲ ਬਾਬਾ ਬਕਾਲਾ ਸਾਹਿਬ ਵਿੱਚ ਬਤੌਰ ਨਾਇਬ ਤਹਿਸੀਲਦਾਰ ਸੇਵਾਵਾਂ ਨਿਭਾ ਰਹੇ ਗੌਰਵ ਉੱਪਲ ਵੱਲੋਂ ਵੀ 174ਵਾਂ ਰੈਂਕ ਹਾਸਿਲ ਕੀਤਾ ਗਿਆ। ਗੋਰਵ ਨੇ ਦੱਸਿਆ ਕਿ ਇਹ ਸਫ਼ਲਤਾ ਉਸ ਨੂੰ ਪਹਿਲੀ ਵਾਰੀ ਹੀ ਨਹੀਂ ਬਲਕਿ ਤੀਸਰੀ ਵਾਰੀ 'ਚ ਮਿਲੀ ਹੈ।

ਆਪਣੇ ਦੋਸਤਾਂ ਨਾਲ ਖੁਸ਼ੀ ਸਾਂਝੀ ਕਰਦੇ ਹੋਏ ਗੌਰਵ ਉੱਪਲ

ਆਪਣੇ ਦੋਸਤਾਂ ਨਾਲ ਗੌਰਵ ਉੱਪਲ ਦੀ ਤਸਵੀਰ

ਮਾਪਿਆਂ ਦਾ ਸਹਿਯੋਗ: ਉਹਨਾਂ ਦੱਸਿਆ ਕਿ ਪਰਮਾਤਮਾ ਦੀ ਅਪਾਰ ਬਖਸ਼ਿਸ਼ ਅਤੇ ਮਾਤਾ-ਪਿਤਾ, ਸਮੂਹ ਪਰਿਵਾਰ ਦੇ ਸਹਿਯੋਗ ਸਦਕਾ ਅੱਜ ਉਹ ਇਸ ਮੁਕਾਮ ਦੇ ਉੱਤੇ ਹਨ ਅਤੇ ਇਸ ਦੇ ਨਾਲ ਹੀ ਇਸ ਦੌਰਾਨ ਉਹਨਾਂ ਦੇ ਦੋਸਤਾਂ ਵੱਲੋਂ ਸਮੇਂ-ਸਮੇਂ ਦੇ ਉੱਤੇ ਉਹਨਾਂ ਦਾ ਬੇਹੱਦ ਸਾਥ ਦਿੱਤਾ ਗਿਆ । ਜਿਸ ਦੀ ਬਦੌਲਤ ਸਦਕਾ ਅੱਜ ਉਹ ਆਪਣੇ ਇਸ ਟੀਚੇ 'ਤੇ ਪਹੁੰਚ ਸਕਿਆ ਹੈ। ਗੌਰਵ ਉੱਪਲ ਦੀ ਇਸ ਉਪਲਬਧੀ ਦਾ ਪਤਾ ਚੱਲਣ 'ਤੇ ਦਫਤਰ ਪਹੁੰਚ ਕੇ ਇਸ ਖਾਸ ਦਿਨ ਦੀ ਵਧਾਈ ਦਿੱਤੀ ਅਤੇ ਮੂੰਹ ਮਿੱਠਾ ਕਰਵਾਇਆ ਗਿਆ।