ଯାଜପୁର: ଦଣ୍ଡ ମୁକ୍ତ ଅଞ୍ଚଳରେ ଛାତ୍ରଙ୍କୁ ଦଣ୍ଡ । ଦଣ୍ଡ ପୁଣି ଏମିତି ସେମିତି ନୁହେଁ ମରଣାନ୍ତକ ଆକ୍ରମଣ । ଆକ୍ରମଣରେ ଭାଙ୍ଗିଯାଇଛି ହାତ । ଏବେ ସେହି ହାତରେ କିଛି ବି ଲେଖିବା ଅସମ୍ଭବ । ଘଟଣାକୁ ମାସେ ବିତିବାକୁ ବସିଛି ହେଲେ ଛାତ୍ରଙ୍କୁ ଏ ଯାଏଁ ମିଳି ପାରିନାହିଁ ନ୍ୟାୟ। ଆମେ କହୁଛୁ ଯାଜପୁର ସୁକିନ୍ଦା ବ୍ଲକ ବନ୍ଧଗାଁ ଲାଙ୍ଗୁଳା ବାବା ଉଚ୍ଚ ବିଦ୍ୟାଳୟର ଦଶମ ଶ୍ରେଣୀର ଛାତ୍ର ପ୍ରଭାତ ପ୍ରଧାନଙ୍କ କଥା ।
ପ୍ରଭାତ ନ୍ୟାୟ ପାଇବା ପାଇଁ ଥାନାଠୁ ଆରମ୍ଭ କରି ଜିଲ୍ଲା ଶିଶୁ ସୁରକ୍ଷା ୟୁନିଟ୍ ଏବଂ ଜିଲ୍ଲା ପ୍ରଶାସନର ଦ୍ବାରସ୍ଥ ହୋଇ ସାରିଲେଣି। ହେଲେ ମାଡ ମାରିଥିବା ଶିକ୍ଷକ କିମ୍ବା ପିଅନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ହୋଇନାହିଁ। ସେପଟେ ଜିଲ୍ଲା ଶିକ୍ଷାଧିକାରୀଙ୍କ ଠାରୁ ରିପୋର୍ଟ ତଲବ କରିଛନ୍ତି ଭାରପ୍ରାପ୍ତ ଜିଲ୍ଲାପାଳ। ରିପୋର୍ଟ ଆସିବା ପରେ ଯାହା କିଛି କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ଜଣାଇଛନ୍ତି।
ସାମାନ୍ୟ ଏକ ବହିକୁ ନେଇ ଜଣେ ଛାତ୍ରକୁ ମାଡ ମାରି ଗୁରୁତର ଆହତ କରିଛନ୍ତି ଶିକ୍ଷକ ଓ ବିଦ୍ୟାଳୟର ପିଅନ । ଏ ଘଟଣାରେ ଛାତ୍ରର କାନ୍ଧ ହାଡ ଭାଙ୍ଗି ଯାଇଛି । ସ୍ଥାନୀୟ ଗୋଡିସାହି ଗ୍ରାମର ଘନଶ୍ୟାମ ପ୍ରଧାନଙ୍କ ପୁଅ ପ୍ରଭାତ ପ୍ରଧାନ ଳାଙ୍ଗୁଳା ବାବା ଉଚ୍ଚ ବିଦ୍ୟାଳୟରେ ଦଶମ ଶ୍ରେଣୀରେ ପାଠ ପଢେ। ନିଜ ଶ୍ରେଣୀର ଜଣେ ସହପାଠୀଙ୍କ ଏକ ବହି ହଜିଯାଇଥିବା ବେଳେ ପ୍ରଭାତ ସେହି ବହିକୁ ପାଇଥିଲେ।