କଟକ: ବାଲିଯାତ୍ରାକୁ ଜାତୀୟ ମାନ୍ୟତା ପ୍ରସଙ୍ଗରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ପ୍ରତିକ୍ରିୟାକୁ ନେଇ ସୃଷ୍ଟି ହୋଇଛି ଅନେକ ପ୍ରଶ୍ନବାଚୀ । ଜାତୀୟ ମାନ୍ୟତା ବୋଲି କିଛି ବ୍ୟବସ୍ଥା ନଥିବା ମନ୍ତ୍ରୀ କହିଛନ୍ତି । ଏନେଇ କଟକ ସାଂସଦ ଭର୍ତ୍ତୃହରି ମହତାବଙ୍କ ସହ ଧର୍ମେନ୍ଦ୍ର ପ୍ରଧାନ, କେନ୍ଦ୍ର ସଂସ୍କୃତି ମନ୍ତ୍ରୀଙ୍କୁ ଭେଟି ଆଲୋଚନା କରିବା ପରେ ଏକଥା ସ୍ପଷ୍ଟ ହୋଇଥିବା ଧର୍ମେନ୍ଦ୍ର କହିଛନ୍ତି । ବାଲିଯାତ୍ରା ଲାଗି ଫଣ୍ଡ୍ର ଆବଶ୍ୟକତା ଥିଲେ କେନ୍ଦ୍ର ଯୋଗାଇଦେବ ହେଲେ ଜାତୀୟ ମାନ୍ୟତା ବ୍ୟବସ୍ଥା ବୋଲି କିଛି ନାହିଁ ବୋଲି କହିଛନ୍ତି ଧର୍ମେନ୍ଦ୍ର ।
ଧର୍ମେନ୍ଦ୍ର କହିଛନ୍ତି, "ବାଲିଯାତ୍ରାକୁ ଜାତୀୟ ମାନ୍ୟତାର ଆବଶ୍ୟକତା ନାହିଁ। କାରଣ ପ୍ରଧାନମନ୍ତ୍ରୀ ବାଲିରେ ଯେତେବେଳେ ଏହାର କଥା କହୁଛନ୍ତି ମାନ୍ୟତାର ଆଉ ଆବଶ୍ୟକତା ନାହିଁ । କେବଳ ସେତିକି ନୁହେଁ, କେନ୍ଦ୍ର ସଂସ୍କୃତି ମନ୍ତ୍ରୀ ମଧ୍ୟ କହିଛନ୍ତି ଜାତୀୟ ମାନ୍ୟତା ବ୍ୟବସ୍ଥା ବୋଲି କିଛି ନାହିଁ । ରାଜ୍ୟ ସରକାର ଲେଖିକି ଦେଲେ ତାହାର ବିକାଶ ପାଇଁ ଯୋଜନା କରାଯିବାର ବ୍ୟବସ୍ଥା ରହିଛି । ସେହିପରି ଫଣ୍ଡ ଦେବାର କେବଳ ବ୍ୟବସ୍ଥା ରହିଛି । ମାନ୍ୟତାର କୌଣସି ଆବଶ୍ୟକତା ନାହିଁ ବୋଲି କେନ୍ଦ୍ର ସଂସ୍କୃତି ମନ୍ତ୍ରୀ କହିଛନ୍ତି ।" ତେବେ ଧର୍ମେନ୍ଦ୍ର ଆହୁରି ମଧ୍ୟ ଉଦାହରଣ ଦେଇ କହିଛନ୍ତି ଓଡ଼ିଶାର ରଥଯାତ୍ରା, ପ୍ରଭୁ ଜଗନ୍ନାଥ, ବିଭିନ୍ନ ପର୍ବ ଏହାର କୌଣସି ମାନ୍ୟତାର ଆବଶ୍ୟକତା ନାହିଁ।
ଏହା ବି ପଢନ୍ତୁ- Bali Yatra: ବାଲିଯାତ୍ରାକୁ ଜାତୀୟ ମାନ୍ୟତା ଦେବାକୁ ସବୁ ପ୍ରଚେଷ୍ଟାରେ ସିଏମସି
ଐତିହାସିକ ବାଲିଯାତ୍ରାକୁ ଜାତୀୟ ମାନ୍ୟତା ମିଳିବା ପାଇଁ ଚାଲିଥିବା କଳ୍ପନା ଜଳ୍ପନାରେ ପଡ଼ିଲା ପୂର୍ଣ୍ଣଚ୍ଛେଦ । ମାନ୍ୟତା ଦେବା ପାଇଁ ମନା କରିବା ସହ ଏହା ଆମ ବିଭାଗର ଦାୟିତ୍ବ ନୁହେଁ ବୋଲି ଚିଠି ଲେଖିଥିଲା କେନ୍ଦ୍ର ସଂସ୍କୃତି ବିଭାଗ। ଯାହାକୁ ନେଇ ସାମ୍ବାଦିକ ସମ୍ମିଳନୀରେ ସ୍ପଷ୍ଟ କରିବା ସହ ଏହା ବିରୁଦ୍ଧରେ ଆବଶ୍ୟକ ପଡ଼ିଲେ ସାଂସଦରେ କଥା ଉଠାଇବାକୁ ପଛାଇବୁ ନାହିଁ ବୋଲି କହିଥିଲେ କଟକ ମେୟର । ଅନ୍ୟପଟେ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ଏଥିପାଇଁ ସଠିକ ଉପସ୍ଥାପନ କରିନଥିବାରୁ ଏଭଳି ହୋଇଥିବା କଥା କହିଛନ୍ତି ବିଜେପି କଟକ ନଗର ସଭାପତି।