ପ୍ରଚାର ମଇଦାନରେ ଖଡ଼ିଆଳ ବିଜେପି ପ୍ରାର୍ଥୀ, ଆରମ୍ଭ କଲେ 'ହର ଘର ପରିକ୍ରମା ଅଭିଯାନ' - Campaign By Hitesh Kumar Bagarti
Published : Apr 6, 2024, 8:32 PM IST
Campaign By Hitesh Kumar Bagarti: ନୂଆପଡା: ଖଡ଼ିଆଳ ନିର୍ବାଚନ ମଣ୍ଡଳୀରେ ରାଜନୀତି ଉଷ୍ମତା ବଢ଼ିବାରେ ଲାଗିଛି । ବିଜେପି, ବିଜେଡି ପ୍ରାର୍ଥୀ ଘୋଷଣା କରିସାରିଥିବାବେଳେ କଂଗ୍ରେସ ଏଯାଏଁ ପ୍ରାର୍ଥୀ ଘୋଷଣା କରିନାହିଁ । ବିଜେପି ବିଧାୟକ ପ୍ରାର୍ଥୀ ତଥା ପୂର୍ବତନ ଖଡ଼ିଆଳ ବିଧାୟକ ହିତେଶ କୁମାର ବଗର୍ତ୍ତି ଆରମ୍ଭ କରିଛନ୍ତି ପ୍ରଚାର ଅଭିଯାନ । ଆଜି (ଶନିବାର) ବିଜେପି ପ୍ରାର୍ଥୀ ହିତେଶ କୁମାର ବଗର୍ତ୍ତିଙ୍କ ନେତୃତ୍ୱରେ ହର ଘର ଅଭିଯାନ ବୋଡେନ ବ୍ଲକଠାରୁ ଆରମ୍ଭ ହୋଇଯାଇଛି ।
ସେ 'ହର ଘର ପରିକ୍ରମା ଅଭିଯାନ' ଆରମ୍ଭ କରିଛନ୍ତି । ପ୍ରତ୍ୟେକ ଗାଁର ମହିଳା ଓ ପୁରୁଷ ମୃଦଙ୍ଗ ଗିନି ବଜାଇ ସଂକୀର୍ତ୍ତନ କରି ହିତେଶ ବଗର୍ତ୍ତିଙ୍କୁ ସ୍ୱାଗତ କରି ପାଛୋଟି ନେଉଥିବା ଦେଖିବାକୁ ମିଳିଥିଲା । ମଦ ମାଂସ ଟଙ୍କା ପ୍ରଲୋଭନ ଦେଖାଉଥିବା ନେତାଙ୍କ ପ୍ରଲୋଭନରେ ନପଡ଼ି ଉପଯୁକ୍ତ ପ୍ରାର୍ଥୀ ଚୟନ କରି ଭୋଟ ଦେବା ପାଇଁ ସେ ଆହ୍ବାନ କରିଛନ୍ତି । "କୃଷକ, ଶ୍ରମିକ, ବେକାରୀ ସମସ୍ୟା, ଶିକ୍ଷା ସ୍ୱାସ୍ଥ୍ୟ, ଗମନାଗମନ ଆଦି ବିଭିନ୍ନ ଦିଗ ଉପରେ ଦୃଷ୍ଟି ଦେଇ କାମ କରିବି" ବୋଲି ସେ ପ୍ରତିଶ୍ରୁତି ଦେଇଛନ୍ତି ।
ଇଟିଭି ଭାରତ, ନୂଆପଡ଼ା