ହାଇଦ୍ରାବାଦ: ଅଧିକାଂଶ ମହିଳା କର୍ମକ୍ଷେତ୍ର, ସର୍ବସାଧାରଣ ସ୍ଥାନରେ ହିଂସାର ସମ୍ମୁଖୀନ ହୁଅନ୍ତି । ଯଦି ମହିଳାମାନେ ଯୌନ ନିର୍ଯାତନା, ଲିଙ୍ଗଗତ ଭେଦଭାବ ଏବଂ ପାରିବାରିକ ହିଂସା ଭଳି ସମସ୍ୟାର ସମ୍ମୁଖୀନ ହୁଅନ୍ତି, ତେବେ ସେମାନେ ରାଷ୍ଟ୍ରୀୟ ମହିଳା ଆୟୋଗଙ୍କ ନିକଟକୁ ଆସିଲେ ସେମାନଙ୍କୁ ଆଇନଗତ ସହାୟତା ମିଳିବାର ବ୍ୟବସ୍ଥା ରହିଛି । ସିଧାସଳଖ ନ ଯାଇ ମୋବାଇଲ ଫୋନ୍ ମାଧ୍ୟମରେ ଅନଲାଇନରେ ଅଭିଯୋଗ ଦାଖଲ କରାଯାଇପାରିବ । ଜାତୀୟ ମହିଳା ଆୟୋଗର ସହାୟତା ପାଇବାକୁ ଏବଂ ଆପଣ ଅନଲାଇନରେ କିପରି ଅଭିଯୋଗ ଦାଖଲ କରିବେ ତାହା ନିମ୍ନରେ ଜାଣନ୍ତୁ ।
ରାଷ୍ଟ୍ରୀୟ ମହିଳା ଆୟୋଗ (NWC) କଣ ?
ନ୍ୟାସନାଲ କମିଶନ ଫର ମହିଳା ଆକ୍ଟ, 1990 ଅଧୀନରେ ଜାନୁଆରୀ 1992ରେ ମହିଳାମାନଙ୍କ ପାଇଁ ରାଷ୍ଟ୍ରୀୟ ମହିଳା ଆୟୋଗ ଗଠନ କରାଯାଇଥିଲା । ମହିଳା ଆୟୋଗର ଉଦ୍ଦେଶ୍ୟ ହେଉଛି ମହିଳାମାନଙ୍କ ପାଇଁ ସାମ୍ବିଧାନିକ ତଥା ଆଇନଗତ ସଂରକ୍ଷଣର ସମୀକ୍ଷା କରିବା, ମହିଳାମାନଙ୍କୁ ସମାଜରେ ସମାନତା ହାସଲ ନେଇ ସକ୍ଷମ କରିବା; ମହିଳାଙ୍କ ସହ ଜଡ଼ିତ ଅଭିଯୋଗର ସମାଧାନ ଏବଂ ମହିଳାଙ୍କୁ ପ୍ରଭାବିତ କରୁଥିବା ସମସ୍ତ ନୀତି ସମ୍ବନ୍ଧରେ ସରକାରଙ୍କୁ ପରାମର୍ଶ ଦେବା । ମହିଳା ଆୟୋଗକୁ ଅଭିଯୋଗ ଏବଂ ଅନୁସନ୍ଧାନ ସେଲ୍, ଲିଗାଲ୍ ସେଲ୍, PMR ସେଲ୍, ନନ ରେସିଡେଣ୍ଟ ଇଣ୍ଡିଆନ ସେଲ୍ ଏବଂ ଉତ୍ତର ପୂର୍ବ ସେଲ୍ ଭଳି ଅନେକ ବିଭାଗ ରହିଛି ।
କେମିତି ଅନଲାଇନରେ କରିବେ ଅଭିଯୋଗ ?
ଯେଉଁମାନେ ରାଷ୍ଟ୍ରୀୟ ମହିଳା ଆୟୋଗଙ୍କ ନିକଟରେ ଅନଲାଇନରେ ଅଭିଯୋଗ ଦାଖଲ କରିବାକୁ ଚାହୁଁଛନ୍ତି, ସେମାନେ ଆୟୋଗର ଅଫିସିଆଲ୍ ୱେବସାଇଟ୍ http://ncw.nic.in କିମ୍ବା http://ncwapps.nic.inରେ ଦାଖଲ କରିପାରିବେ । ଯଦି ଆପଣଙ୍କର ଅଭିଯୋଗକୁ ସମର୍ଥନ କରିବାକୁ ଆପଣଙ୍କର ଡକ୍ୟୁମେଣ୍ଟ୍ ଅଛି ଆପଣ ସେଗୁଡିକୁ ଅନଲାଇନରେ ଆଟାଚ୍ କରିପାରିବେ ନଚେତ ପୋଷ୍ଟ ମାଧ୍ୟମରେ ପଠାଇ ପାରିବେ କିମ୍ବା ବ୍ୟକ୍ତିଗତ ଭାବରେ ଦାଖଲ କରିପାରିବେ । ହେଲ୍ପଲାଇନ ନମ୍ବର 011-26944880 ଏବଂ 26944883କୁ ମଧ୍ୟ କଲ୍ କରି ସାହାଯ୍ୟ ଲୋଡ଼ିପାରିବେ ।
ମହିଳାଙ୍କ ଅଧିକାରର ଉଲ୍ଲଂଘନର ଯେକୌଣସି ପ୍ରସଙ୍ଗ ରାଷ୍ଟ୍ରୀୟ ମହିଳା ଆୟୋଗରେ ପଞ୍ଜିକୃତ ହୋଇପାରିବ । ଏହାସହ, ମହିଳା ଆୟୋଗ ଅସ୍ପଷ୍ଟ କିମ୍ବା ଅନ୍ୟାନ୍ୟ ପ୍ରସଙ୍ଗ ସହ ଜଡିତ ଅଭିଯୋଗ ଉପରେ ବିଚାର କରିବେ ନାହିଁ । ଅଭିଯୋଗର ସମ୍ପୂର୍ଣ୍ଣ ବିବରଣୀ ମହିଳା ଆୟୋଗଙ୍କ ନିକଟରେ ପ୍ରକାଶ କରାଯିବା ଉଚିତ ।
ଅଭିଯୋଗ ଦାଖଲ ସମୟରେ ଅଭିଯୋଗକାରୀଙ୍କ ନାମ ଏବଂ ଅନ୍ୟାନ୍ୟ ବିବରଣୀ ପ୍ରଦାନ କରାଯିବା ଆବଶ୍ୟକ । ଏଥିସହ ଯଦି ଆପଣ ଅଭିଯୁକ୍ତର ବିବରଣୀ ଜାଣନ୍ତି, ତାହା ମଧ୍ୟ ପ୍ରଦାନ କରିବା ଉଚିତ । ଏହା ସହିତ ଘଟଣାର ସଂକ୍ଷିପ୍ତ ବର୍ଣ୍ଣନା ଏବଂ ପ୍ରତିକାରର ବିବରଣୀ ଯଦି ଥାଏ ତାହା ମଧ୍ୟ ଦାଖଲ କରିବା ଉଚିତ ।
Step 1 : ମହିଳା ଆୟୋଗର ଅଫିସିଆଲ୍ ୱେବସାଇଟ୍ http://ncw.nic.in କିମ୍ବା http://ncwapps.nic.inଖୋଲନ୍ତୁ । ଖୋଲିଥିବା ପୃଷ୍ଠାରେ 'Instructions for online complaint registration' ଉପରେ କ୍ଲିକ୍ କରନ୍ତୁ ।
Step 2:ଦିଆୟାଇଥଇବା ନିର୍ଦ୍ଦେଶାବଳୀ ପଢିବା ପରେ ନିମ୍ନରେ ଦିଆଯାଇଥିବା 'click here for registration of complaint' ଅପସନକୁ ଯାଆନ୍ତୁ ।
Step 3: ଦିଆଯାଇଥିବା ଫର୍ମରେ ଆପଣଙ୍କର ନାମ, ଠିକଣା, ଫୋନ୍ ନମ୍ବର ଏବଂ ଅଭିଯୋଗ ବିବରଣୀ ପ୍ରଦାନ କରନ୍ତୁ । ଯଦି ଆପଣ ସେହି ବ୍ୟକ୍ତିଙ୍କ ବିଷୟରେ ସବିଶେଷ ତଥ୍ୟ ଜାଣିଛନ୍ତି ଯାହାଙ୍କ ବିରୋଧରେ ଅଭିଯୋଗ ଦାଖଲ ହେଉଛି ତାହା ମଧ୍ୟ ପ୍ରଦାନ କରିପାରିବେ । ଘଟଣାର ସମ୍ପୂର୍ଣ୍ଣ ବର୍ଣ୍ଣନା କରିବାକୁ ଆବେଦନ ଫର୍ମ ସହିତ ଏକ ପୃଥକ ସ୍ତମ୍ଭ ପ୍ରଦାନ କରାଯାଇଛି ।
Step 4: ଏହାପରେ captcha କୋଡ ପ୍ରଦାନ କରନ୍ତୁ ଏବଂ 'Submit' ବଟନ୍ ଉପରେ କ୍ଲିକ କରନ୍ତୁ । ଏହାପରେ ଆପଣଙ୍କର ଅଭିଯୋଗ ରାଷ୍ଟ୍ରୀୟ ମହିଳା ଆୟୋଗରେ ପଞ୍ଜିକୃତ ହେବ । ତା’ପରେ ଆପମ ଏକ ରସିଦ ନମ୍ବର ପାଇବେ । ଯଦି ଆପଣଙ୍କର ଅଭିଯୋଗ ରାଷ୍ଟ୍ରୀୟ ଆୟୋଗ ଦ୍ବାରା ଗ୍ରହଣ କରାଯାଏ, ତେବେ ଆପଣ 10ଦିନ ପରେ ଫାଇଲ୍ ନମ୍ବର, ୟୁଜର୍ ଆଇଡି ଏବଂ ପାସୱାର୍ଡ ପାଇବେ । ଯଦି ଅଭିଯୋଗ ପ୍ରତ୍ୟାଖ୍ୟାନ କରାଯାଏ ତେବେ ଅଭିଯୋଗକାରୀଙ୍କୁ ଯଥାଶୀଘ୍ର ସୂଚିତ କରାଯାଏ ।
Step 5: ଏହାରେ ଆପଣ ଦିଆଯାଇଥିବା ୟୁଜର୍ ID ଏବଂ ପାସୱାର୍ଡ ସହିତ ଲଗଇନ୍ କରିପାରିବେ ଏବଂ ଅଭିଯୋଗ ସ୍ଥିତି ଯାଞ୍ଚ କରିପାରିବେ । ଅଭିଯୋଗର ସାମ୍ପ୍ରତିକ ସ୍ଥିତି (current status)କୁ ସିଧାସଳଖ କଲ୍ କିମ୍ବା ଜାତୀୟ ମହିଳା ଆୟୋଗର ୱେବସାଇଟ୍ ମାଧ୍ୟମରେ ଯାଞ୍ଚ କରାଯାଇପାରିବେ । NWC ୱେବସାଇଟରେ ଥିବା 'complaint status' ଅପସନ ଉପରେ କ୍ଲିକ୍ କରି ଏବଂ ଆପଣଙ୍କର ୟୁଜର ID ଏବଂ ପାସୱାର୍ଡ ଦେଇ ଆପଣ ଆପଣଙ୍କର ଅଭିଯୋଗର ସ୍ଥିତି ଦେଖିପାରିବେ ।
ମହିଳା କମିଶନର କଣ ରହିଛି ଦାୟିତ୍ବ ?
- ପୋଲିସର ତଦନ୍ତକୁ ତ୍ବରାନ୍ବିତ କରିବା
- ପ୍ରକ୍ରିୟାକୁ ସୁଗମ ତଥା ତ୍ହରାନ୍ବିତ କରିବାକୁ କର୍ତ୍ତୃପକ୍ଷଙ୍କ ନଜରକୁ ଆଣିବା
- ପରାମର୍ଶ ଏବଂ ଆପୋଷ ବୁଝାମଣା ମାଧ୍ୟମରେ ପାରିବାରିକ ବିବାଦର ସମାଧାନ କରିବା
- କର୍ମକ୍ଷେତ୍ରରେ ଯୌନ ନିର୍ଯାତନା ଅଭିଯୋଗ ଆସିଲେ ଏହାର ତଦନ୍ତ ପ୍ରକ୍ରିୟାକୁ ତ୍ବରାନ୍ବିତ କରିବା, ମହିଳାଙ୍କୁ ନ୍ୟାୟ ପ୍ରଦାନ କରିବାରେ ସହଯୋଗ କରିବା ।
- ମଧ୍ୟସ୍ଥି
- ଯୌନ ନିର୍ଯାତନା ଅଭିଯୋଗର ମାମଲା ତ୍ବରାନ୍ବିତ କରିବା
- ଗୁରୁତର ଅପରାଧିକ ଘଟଣଆରେ ସ୍ପଟ୍ ଅନୁସନ୍ଧାନ, ସାକ୍ଷୀମାନଙ୍କୁ ପରୀକ୍ଷା କରିବା, ପ୍ରମାଣ ସଂଗ୍ରହ କରିବା ଏବଂ ସୁପାରିଶ ସହିତ ରିପୋର୍ଟ ଦାଖଲ କରିବା ପାଇଁ ଅନୁସନ୍ଧାନ କମିଟି ଗଠନ କରିବା
- ମହିଳାମାନଙ୍କୁ ମାଗଣା ଆଇନ ସହାୟତା ପ୍ରଦାନ କରିବା
ମହିଳା କମିଶନ ଅଧିନରେ କେଉଁ ଅପରାଧିକ ଘଟଣା ଆସିଥାଏ ?
- ଦୁଷ୍କର୍ମ /ଦୁଷ୍କର୍ମ ଉଦ୍ୟମ
- ଏସିଡ୍ ଆକ୍ରମଣ
- ଯୌନ ନିର୍ଯାତନା
- ଲିଙ୍ଗଗତ ଭେଦଭାବ
- ଷ୍ଟକିଂ/ସେକ୍ସଆଲ ଗେଜ୍
- ଟ୍ରାଫିକିଂ / ବାଧ୍ୟତାମୂଳକ ବେଶ୍ୟାବୃତ୍ତି
- ମହିଳାମାନଙ୍କର ସମ୍ମାନ ଉପରେ ପ୍ରଶ୍ନବାଚୀ ସୃଷ୍ଟି ହେବା ଘଟଣା
- ମହିଳାଙ୍କ ବିରୋଧରେ ସାଇବର ଅପରାଧ
- ମହିଳାଙ୍କ ପ୍ରତି ପୋଲିସର ଅବହେଳା
- ଘରୋଇ ହିଂସା / ଯୌତୁକ ହିଂସା / ଯୌତୁକ ଜନିତ ମୃତ୍ୟୁ
- ଦ୍ବିତୀୟ ବିବାହ / ବହୁବିବାହ
- ଲିଙ୍ଗ ନିର୍ଦ୍ଧାରଣ କରି ମହିଳା ଭ୍ରୁଣକୁ ନଷ୍ଟ କରିବା (Female feticide)
- କର୍ମକ୍ଷେତ୍ରରେ ଯୌନ ନିର୍ଯାତନା
- ମହିଳାମାନଙ୍କ ପାଇଁ ମାତୃତ୍ବ ସୁବିଧାକୁ ପ୍ରତ୍ୟାଖ୍ୟାନ କରିବା ପ୍ରସଙ୍ଗ |
- ସତୀ କିମ୍ବା ଗୁଣିଗାରେଡି ସନ୍ଦେହରେ ମହିଳାଙ୍କ ଅଧିକାରକୁ ଉଲ୍ଲଂଘନ କରିବା
- ଘରୋଇ ହିଂସା
- ଛାଡପତ୍ର / ଚାଇଲ୍ଡ କଷ୍ଟୋଡି
କେଉଁ ଘଟଣା NWC ଅଧିନରେ ଆସୁନାହିଁ ?
ନିମ୍ନଲିଖିତ ଘଟଣା ନେଇ ରାଷ୍ଟ୍ରୀୟ ମହିଳା ଆୟୋଗ ନିକଟକୁ ଅଭିଯୋଗ ଆସିଲେ, ଏହାକୁ ଆୟୋଗ ପ୍ରତ୍ୟାଖ୍ୟାନ କରିପାରେ । କାରଣ ଉକ୍ତ ଘଟଣା NWC ଅଧିନରେ ଆସିନଥାଏ ।
- ଅଭିଯୋଗ ଯାହା ଅସ୍ପଷ୍ଟ ବା ମିଥ୍ୟା
- ସିଭିଲ ଡିସପୁଟ ସମ୍ବନ୍ଧୀୟ ଘଟଣା
- କୋର୍ଟରେ ବିଚାରଧୀନ ଥିବା ମାମଲା
- ରାଜ୍ୟ ଆୟୋଗ କିମ୍ବା ଅନ୍ୟ କୌଣସି ଆୟୋଗଙ୍କ ନିକଟରେ ଅଭିଯୋଗ ଦାଖଲ ଥିବା ଘଟଣା
- ଅନ୍ୟ କମିଶନଙ୍କ ଦ୍ବାରା ସମର୍ଥିତ ଥିବା ଅଭିଯୋଗ
- ମହିଳା ଅଧିକାରର ଉଲ୍ଲଂଘନ ନ କରିବାର ଅଭିଯୋଗ
