ନୂଆଦିଲ୍ଲୀ:ସରକାରୀ ଟେଲିକମ କମ୍ପାନୀ ଭାରତ ସଞ୍ଚାର ନିଗମ ଲିମିଟେଡ (BSNL) ଭାରତର ପ୍ରଥମ ସାଟେଲାଇଟ-ଟୁ-ଡିଭାଇସ କନେକ୍ଟିଭିଟି ଲଞ୍ଚ କରିଛି । ଏହି ସେବା ଦ୍ବାରା ସ୍ମାର୍ଟଫୋନ ୟୁଜର ନେଟୱର୍କ ସମସ୍ୟା ଥିବା ସ୍ଥାନକୁ ଅତି ସହଜରେ ମେସେଜ, ଭିଡିଓ ଓ ଅଡିଓ କଲ୍ କରିପାରିବେ । ଗତ ମାସ ଅକ୍ଟୋବରରେ ଆୟୋଜିତ ଭାରତ ମୋବାଇଲ କଂଗ୍ରେସ କାର୍ଯ୍ୟକ୍ରମରେ ଏହି ସେବା ସମ୍ପର୍କରେ ଖୁଲାସା ହୋଇଥିଲା । ଏହି ସେବାର ମୁଖ୍ୟ ଉଦ୍ଦେଶ୍ୟ ହେଉଛି ଅପହଞ୍ଚ ଅଞ୍ଚଳରେ ରହୁଥିବା ଲୋକେ ଜରୁରୀ ପରିସ୍ଥିତିରେ କଲ୍ ଓ ମେସେଜ କରିବାକୁ ସୁନିଶ୍ଚିତ କରିବା ।
କେଉଁ ଫୋନରେ ଉପଲବ୍ଧ ଏହି ସେବା ?
ଏହି ସାଟେଲାଇଟ ଯୋଗାଯୋଗ କିଛି ନିର୍ଦ୍ଦିଷ୍ଟ ସ୍ମାର୍ଟଫୋନ ଯେପରିକି ଆଇଫୋନ, ଗୁଗଲ ପିକ୍ସେଲରେ ଉପଲବ୍ଧ ହୋଇସାରିଲାଣି । ଆଗାମୀ ଦିନରେ ବିଏସଏନଏଲ ନିଜ ୟୁଜରଙ୍କୁ ଅପହଞ୍ଚ ଅଞ୍ଚଳରେ ଥିବା ଲୋକଙ୍କ ସହିତ ଫୋନ ଓ ମେସେଜ ଯୋଗେ ଯୋଗାଯୋଗକୁ ସୁନିଶ୍ଚିତ କରିବାକୁ ଯାଉଛି । ଟେଲି ଯୋଗାଯୋଗ ମନ୍ତ୍ରଣାଳୟର ସୂଚନା ଅନୁସାରେ, BSNLର ନୂତନ ସାଟେଲାଇଟ-ଟୁ-ଡିଭାଇସ୍ ସେବା ଭାରତର ଦୂରତମ କୋଣଅନୁକୋଣରେ ସମସ୍ୟା ବିହୀନ ଯୋଗାଯୋଗ ପ୍ରଦାନ କରିବ ।
Viasat ସହ ହାତ ମିଳାଇଛି BSNL:-
ବିଏସଏନଏଲ କାଲିଫର୍ଣ୍ଣିଆର ଏକ ଯୋଗାଯୋଗ ପ୍ରଯୁକ୍ତିବିଦ୍ୟା କମ୍ପାନୀ ଭାଏସାଟ ସହିତ ସହଭାଗିତା ସ୍ଥାପନ କରିଛି, ଯାହାକି ଭାରତର କିଛି ଅଞ୍ଚଳରେ ନିରବଚ୍ଛିନ୍ନ ନେଟୱାର୍କ ପ୍ରବେଶ ପାଇଁ LEO ସାଟେଲାଇଟ୍ ବ୍ୟବହାର କରିବାକୁ ସୁନିଶ୍ଚିତ କରିବ । ମୁଖ୍ୟତଃ ହିମାଚଳ ପ୍ରଦେଶ ଏବଂ ଉତ୍ତରପ୍ରଦେଶର ଟ୍ରେକିଂ ସ୍ଥାନ, ଉତ୍ତର-ପୂର୍ବ ଭାରତର ଦୂର ପାହାଡ଼ ଏବଂ ରାଜସ୍ଥାନର ମରୁଭୂମି ନିକଟବର୍ତ୍ତୀ ଗ୍ରାମଗୁଡିକରେ ଏହି ସେବା ପହଞ୍ଚିବ । ବିଭାଗୀୟ ସରକାର କହିଛନ୍ତି ଯେ ଏହି ସାଟେଲାଇଟ-ଟୁ-ଡିଭାଇସ୍ ସେବା ଏକ ଉଚ୍ଚ ଗୁଣାତ୍ମକ ନେଟୱାର୍କ ବଜାୟ ରଖିବା ଲାଗି ଏହାକୁ ପୂର୍ବରୁ ଚ୍ୟାଲେଞ୍ଜିଂ ସ୍ଥାନଗୁଡ଼ିକରେ ଅନେକ ପରୀକ୍ଷଣ କରାଯାଇ ଲଞ୍ଚ କରାଯାଇଛି । ଏହା ପାଠ ପଢିବା ଏବଂ କଲ୍ କରିବା ପାଇଁ ସର୍ବୋତ୍ତମ ନେଟୱର୍କ ଭାବେ ପ୍ରମାଣିତ ହେବ ।
କେଉଁମାନେ ପାଇବେ ସୁବିଧା ?
ଯଦିଓ ଭାରତରେ ସାଟେଲାଇଟ ଯୋଗାଯୋଗ ବ୍ୟବସ୍ଥା ରହିଛି ଏହା କେବଳ ସାମରିକ ଏବଂ ସରକାରୀ ବ୍ୟବହାରରେ ସୀମିତ ରହିଛି । କିନ୍ତୁ BSNLର ନୂତନ ସେବା ସାଧାରଣ ଜନତାଙ୍କୁ ସେବା ପ୍ରଦାନ କରିବ । ଡିଭାଇସ ସହିତ ସଂଯୁକ୍ତ ନହେବା ପର୍ଯ୍ୟନ୍ତ ଏହି ସେବା ଉପଲବ୍ଧ ହେବ ନାହିଁ, ଯେପରିକି ଆଇଫୋନ ଯାହାକି 2022ରେ ସାଟେଲାଇଟ୍ ସେବା ଆରମ୍ଭ କରିଥିଲା । କିନ୍ତୁ କିଛି ନିର୍ଦ୍ଦିଷ୍ଟ ଆଇଫୋନ ୟୁଜର ଏହି ସେବା ପାଇପାରିଛନ୍ତି ।
ଧ୍ୟାନ ଦେବା କଥା ହେଉଛି ବିଏସଏନଏଲ ଏହି ସେବା ସମ୍ପର୍କରେ ସବିଶେଷ ତଥ୍ୟ ପ୍ରଦାନ କରିନାହିଁ । ଅର୍ଥାତ ଟେଲିକମ୍ କମ୍ପାନୀ ଏହି ସେବା ପାଇଁ ମୂଲ୍ୟ ସଂରଚନା ଏବଂ ସର୍ବନିମ୍ନ ଉପଭୋକ୍ତା ଯୋଗ୍ୟତା ପ୍ରକାଶ କରିନାହିଁ । ଖୁବଶୀଘ୍ର ଏ ସମ୍ପର୍କରେ ଜଣାପଡ଼ିବ ବୋଲି ଆଶା କରାଯାଉଛି ।
