ଭୁବନେଶ୍ୱର:ରସୁଲଗଡ ହତ୍ୟାକାଣ୍ଡ ମାମଲାର ଅଭିଯୁକ୍ତ ଗିରଫ । ରାଜଧାନୀ ଭୁବନେଶ୍ୱରରେ ପୋଲିସ ଇନଫର୍ମର ହତ୍ୟା ଘଟଣାରେ ୩ ଜଣ ଅଭିଯୁକ୍ତଙ୍କୁ ଗିରଫ କଲା କମିଶନରେଟ୍ ପୋଲିସର ସ୍ପେଶାଲ ସ୍କ୍ୱାର୍ଡ । ଏନେଇ ଏସିପି ହିଂମାଶୁ ସ୍ବାଇଁ ସୂଚନା ଦେଇଛନ୍ତି । ଆଜି ଭୋର ସମୟରେ ଭୁବନେଶ୍ୱର ବ୍ୟସ୍ତ ବହୁଳ ରସୁଲଗଡ ଓଭର ବ୍ରିଜରେ ଏହି ହତ୍ୟାକାଣ୍ଡ ଘଟିଥିଲା । ବାଇକରେ ଯାଉଥିବା ବେଳେ ପୋଲିସ ମିତ୍ରକୁ ବୀଭତ୍ସ ଭାବେ ହତ୍ୟା କରାଯାଇଥିଲା ।
ପୋଲିସ ମିତ୍ର ହତ୍ୟାକାଣ୍ଡ:
ବାଣୀବିହାର ଛକରୁ ରସୁଲଗଡକୁ ଯୋଗାଯୋଗ କରୁଥିବା ରାସ୍ତାରେ ରେଲୱେ ଓଭରବ୍ରିଜ ଉପରେ ଅର୍ଥାତ ଜାତୀୟ ରାଜପଥ କଡ଼ରେ ଥିବା ଏକ ତାରକା ହୋଟେଲ ସାମ୍ନାରେ ଏହି ହତ୍ୟାକାଣ୍ଡ ଘଟିଥିଲା । ରାସ୍ତା ଉପରେ ରକ୍ତାକ୍ତ ଅବସ୍ଥାରେ ଜଣେ ବ୍ୟକ୍ତି ପଡ଼ିଥିବା ବେଳେ ପାଖରେ ଏକ ବାଇକ ମଧ୍ୟ ପଡିଥିଲା । ଏନେଇ ଲୋକେ ପୋଲିସକୁ ଖବର ଦେଇଥିଲେ । ଖବର ପାଇ ସହିଦନଗର ଥାନା ଓ ମଞ୍ଚେଶ୍ବର ଥାନା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ହସ୍ପିଟାଲ ନେବା ସହ ତଦନ୍ତ ଆରମ୍ଭ କରିଥିଲା ।
ମହିଳାଙ୍କ ସମେତ ୩ ଅଭିଯୁକ୍ତ ଗିରଫ
ମୃତକ ଜଣକ କ୍ୟାପିଟାଲ ଥାନା ଅଞ୍ଚଳର ସହଦେବ ନାୟକ ବୋଲି ଜଣାପଡିଥିଲା । ସେ ପୂର୍ବରୁ ପୋଲିସ ମିତ୍ର ଥିବା ଜଣାପଡିଛି । ବସ୍ତି ଚାଲ ଅଭିଯାନରେ ସେ ପୋଲିସ ମିତ୍ର ଭାବେ କାମ କରୁଥିଲା । ହତ୍ୟାକାଣ୍ଡ ସ୍ଥଳରୁ ଏକ ଭିଡିଓ ପୋଲିସ ହାତରେ ଲାଗିଥିଲା । ଯେଉଁ ଭିଡିଓରେ ଜଣେ ଯୁବତୀଙ୍କ ସହ ଜଣେ ଯୁବକ ଥିଲେ । ଯୁବତୀଜଣକ ଚେହେରା ଲୁଚାଇ ଘଟଣାସ୍ଥଳରୁ କିଛି ମାରଣାସ୍ତ୍ର ଧଳାବ୍ୟାଗରେ ଲୁଚାଇ ଚମ୍ପଟ ମାରୁଥିବା ଦେଖିବାକୁ ମିଳିଥିଲା । ହତ୍ୟାକାଣ୍ଡରେ ସେମାନଙ୍କ ସମ୍ପୃକ୍ତି ରହିଥିବା ନେଇ ପୋଲିସ ସନ୍ଦେହ କରି ତଦନ୍ତ ଆରମ୍ଭ କରିଥିଲା । ତେବେ ଏହି ଘଟଣାରେ ୩ ଜଣଙ୍କୁ ଗିରଫ କରିଛି ପୋଲିସ । ଗିରଫ ହୋଇଥିବା ଅଭିଯୁକ୍ତଙ୍କ ମଧ୍ୟରେ ଜଣେ ମହିଳା ରହିଛନ୍ତି । ନୟାଗଡ଼ ଶରଣକୂଳ ଅଞ୍ଚଳରୁ ତିନି ଅଭିଯୁକ୍ତ ମଣ୍ଟେଇ ନାୟକ, ତାଙ୍କ ପତ୍ନୀ ଲିପି ନାୟକ ଓ ସୁଶେଇ ନାୟକକୁ ଗିରଫ କରିଛି କମିଶନରେଟ ପୋଲିସ ।