ଭୁବନେଶ୍ବର: ନକଲି ସସ୍ ଫ୍ୟାକ୍ଟ୍ରିରେ ବଡ଼ ଧରଣର ରେଡ୍ । ଚଢ଼ାଉ କଲା କମିଶନରେଟ ପୋଲିସର ସ୍ପେଶାଲ ସ୍କ୍ୱାଡ । ଭୁବନେଶ୍ବର ଭୀମଟାଙ୍ଗି ହାଉସିଂ ବୋର୍ଡ କଲୋନୀରେ ସ୍ପେଶାଲ ସ୍କ୍ବାଡ ଓ ଖାଦ୍ୟ ସୁରକ୍ଷା ଅଧିକାରୀଙ୍କ ମିଳିତ ଚଢ଼ାଉ ପରେ ସାମ୍ନାକୁ ଆସିଛି ଖାଦ୍ୟରେ ସାଙ୍ଘାତିକ ଅପମିଶ୍ରଣର ଜାଲିଆତି । ଚଢ଼ାଉ ବେଳେ ଜବତ ହେଲା ବିପୁଳ ପରିମାଣର ନକଲି ସସ, ରଙ୍ଗ ଓ କଞ୍ଚାମାଲ । ଏହା ସହ ସସ୍ ତିଆରି ହେଉଥିବା କିଛି ମେସିନ ମଧ୍ୟ ଜବତ କରାଯାଇଛି ।
Police Busts Duplicate Sauce Manufacturing Unit (ETV Bharat Odisha) ସାଧାରଣ ଲୋକଙ୍କ ଜୀବନ ସହ ଖେଳ । ବିନା ଟମାଟୋ ଓ ବିନା ଲଙ୍କାରେ ପ୍ରସ୍ତୁତ ହେଉଥିଲା ସସ୍ । ଅର୍ଥାତ୍ ଟମାଟୋ ପାଉଡର ଓ ଲଙ୍କା ପାଉଡରକୁ ୟୁରିଆ ଓ ଚାଉଳ ଗୁଣ୍ଡରେ ମିଶାଇ ପ୍ରସ୍ତୁତ ହେଉଥିଲା ନକଲି ସସ୍ । ସେସବୁକୁ ଅପମିଶ୍ରଣ କରି ଏଭଳି ସସ୍ ପ୍ରସ୍ତୁତ ହେଉଥିଲା ଯାହା ଦେଖିବାକୁ ଅବିକଳ ଅସଲି ସସ୍ ପରି । ନକଲି ସସ୍ ତିଆରି କରି ବେଆଇନ ଭାବେ ଟ୍ୟାଗ ଲଗାଇ ବିକ୍ରି ପାଇଁ ବଜାରକୁ ପଠାଯାଉଥିଲା । ଭୁବନେଶ୍ୱର ଭୀମଟାଙ୍ଗୀ ଅଞ୍ଚଳରେ ଏଭଳି ନକଲି ସସ୍ ତିଆରି ହେଉଥିବା ନେଇ ଏକ ବିଶ୍ୱସ୍ତ ସୂତ୍ରରୁ ଖବର ପାଇବାଇଥିଲା କମିଶନରେଟ ପୋଲିସ ।
Police Busts Duplicate Sauce Manufacturing Unit (ETV Bharat Odisha) ସେପଟେ ସୂଚନା ପାଇବା ପରେ ଖାଦ୍ୟ ସୁରକ୍ଷା ବିଭାଗ ସହାୟତାରେ ଚଢ଼ାଉ କରିଥିଲା ସ୍ପେଶାଲ ସ୍କ୍ୱାଡ । ଚଢ଼ାଉ ବେଳେ ପେଟି ପେଟି ଚିଲି ଓ ଟମାଟ ସସ୍ ପ୍ୟାକିଂର ବଟଲ ଜବତ କରଯାଇଛି । ଏହାସହ ଅସ୍ବାସ୍ଥ୍ୟକର ପରିସ୍ଥିତିରେ ତିଆରି ହେଉଥିବା ମେସିନ ସହ ରନ୍ଧା ସାମଗ୍ରୀ, ରଙ୍ଗ, ୟୁରିଆ ପାଉଡର, ଚାଉଳ ଗୁଣ୍ଡ, ଅଟା ଓ ମଇଦା ଆଦି ଅନ୍ୟାନ୍ୟ ଅପମିଶ୍ରିତ ସାମଗ୍ରୀ ଜବତ କରାଯାଇଛି । ଏପରିକି ରେଡ ବେଳେ ଜଣାପଡିଛି ଯେ, ସବୁ ସସ୍ ବଟଲକୁ ବିୟର ଓ ମଦ ପାଇଁ ବ୍ୟବହାର ହେଉଥିବା କାଗଜ ପେଟିକୁ ଓଲଟାଇ ପ୍ୟାକ କରାଯାଇ ବଜାରକୁ ଛଡାଯାଉଥିଲା । ଏନେଇ 3 ଜଣ ମିସ୍ତ୍ରୀଙ୍କୁ ଅଟକ ରଖି ତଦନ୍ତ ଆରମ୍ଭ କରିଛି କମିଶନରେଟ ପୋଲିସର ସ୍ପେଶାଲ ଟିମ୍ ।
Police Busts Duplicate Sauce Manufacturing Unit (ETV Bharat Odisha) ଭୁବନେଶ୍ୱର ଡିସିପି ପ୍ରତୀକ ସିଂ କହିଛନ୍ତି, "ଭୁବନେଶ୍ୱର ଭୀମଟାଙ୍ଗୀ ଅଞ୍ଚଳରେ ନକଲି ସସ୍ ପ୍ରସ୍ତୁତ ହେଉଥିବା ନେଇ ପୋଲିସକୁ ଖବର ମିଳିଥିଲା । ଏହାପରେ ଖାଦ୍ୟ ସୁରକ୍ଷା ବିଭାଗ ସହାୟତାରେ ଉକ୍ତ ନକଲି ସସ୍ କାରଖାନା ଉପରେ ଚଢ଼ାଉ କରାଯାଇଥିଲା । ବିଭିନ୍ନ ଦିଗକୁ ଉଲ୍ଲଙ୍ଘନ କରି ଅସ୍ୱାସ୍ଥ୍ୟକର ପରିସ୍ଥିତିରେ ଏହି ନକଲି ସସ୍ ଫ୍ୟାକ୍ଟ୍ରି ଚାଲୁଥିବା ଜଣାପଡିଛି । ଏନେଇ ସମସ୍ତ ସସ୍ ବଟଲ ଜବତ ସହ କାରଖାନାରେ ବ୍ୟବହୃତ ସାମଗ୍ରୀ ଜବତ ହୋଇଛି । କାରଖାନାକୁ ସିଲ୍ କରାଯାଇଛି । ଏନେଇ 3 ଜଣଙ୍କୁ ଅଟକ ରଖାଯାଇଛି । ଅମ୍ରିତା ଫୁଡସ୍ ନାଁରେ କମ୍ପାନୀ ଚାଲୁଥିବା ଜଣାପଡିଛି ।"
Police Busts Duplicate Sauce Manufacturing Unit (ETV Bharat Odisha) ସେପଟେ ଖାଦ୍ୟ ସୁରକ୍ଷା ଅଧିକାରୀ ତଥା ଫୁଡ୍ ଲାଇସେନ୍ସ ଅଥରିଟି ପ୍ରତୀକ୍ଷା ଦାସ ମହାପାତ୍ର କହିଛନ୍ତି, "ସେମାନେ ସବୁ ନିୟାମକ ଉଲଙ୍ଘନ କରିଛନ୍ତି । 4ଟି ଦିଗକୁ ଏମାନେ ଭାଓଲେସନ କରିଛନ୍ତି । ପ୍ରଥମତଃ ଏମାନଙ୍କର ଲାଇସେନ୍ସ ନାହିଁ । କେବଳ ରେଜିଷ୍ଟ୍ରେସନ କରି ଏପରି କାରଖାନା ଚଳାଉଥିଲେ । ଦ୍ବିତୀୟରେ ସେମାନେ ଅସ୍ବାସ୍ଥ୍ୟକର ପରିସ୍ଥିତିରେ ସସ୍ ପ୍ରସ୍ତୁତ କରୁଥିଲେ । ଯାହାକି ଆଦୌ ହେବା କଥା ନୁହେଁ । ଯେଉଁଠି ପାଣି ଜମିଛି କୋୖଣସି ସଫା ସୁତୁରା ନାହିଁ ସେଠାରେ ସସ୍ ପ୍ରସ୍ତୁତ କରୁଥିଲେ । ତୃତୀୟରେ ସେମାନେ ଯେଉଁ ସାମଗ୍ରୀରେ ସସ୍ ପ୍ରସ୍ତୁତ କରୁଥିଲେ ସେଥିରେ ପ୍ରସ୍ତୁତ ହେବା କଥା ନୁହେଁ । ଅର୍ଥାତ୍ ବିନା ଟମାଟୋ ଓ ଲଙ୍କାରେ କେବଳ ଟମାଟୋ ପାଉଡର ଓ ଚିଲି ପାଉଡର ବ୍ୟବହାର କରି ସସ୍ ପ୍ରସ୍ତୁତ କରୁଥିଲେ । ଏସବୁ ଜିନିଷ ଖାଇବା ଉପଯୋଗୀ ନୁହେଁ । ଯାହାକୁ ଖାଇବା ଦ୍ବାରା ଅନେକ ସମସ୍ୟା ଉପୁଜିବାର ଆଶଙ୍କା ରହିଛି ।"
ଏହା ମଧ୍ୟ ପଢ଼ନ୍ତୁ...ସରକାରୀ ଟଙ୍କାରେ ଅୟସ କରୁଥିଲେ ବାବୁ: ଭିଜିଲାନ୍ସ ଜାଲରେ ପଡିଲେ ମତ୍ସ୍ୟ ଅଧିକାରୀ, ସମ୍ପତ୍ତି ଜାଣିଲେ ହୋଇଯିବେ ତାଜୁବ - Deputy Director Of Fisheries Arrest Police Busts Duplicate Sauce Manufacturing Unit (ETV Bharat Odisha) ତେବେ ବିଶେଷ କରି ବଜାରରେ ବିକ୍ରି ହେଉଥିବା ଫାଷ୍ଟ ଫୁଡ୍ ଓ ଅନ୍ୟାନ୍ୟ ମସଲା ଯୁକ୍ତ ଖାଦ୍ୟ ଦୋକାନରେ ଏଭଳି ଅପମିଶ୍ରିତ ସସ୍କୁ ବ୍ୟବହାର କରାଯାଉଥିଲା । ଏପରିକି ବଜାରର ଅନ୍ୟ ସସ୍ କମ୍ପାନୀ ଭଳି ଏହି ନକଲି ସସ୍କୁ ପ୍ୟାକିଂ କରି ବିକ୍ରି କରାଯାଉଥିଲା । ଅନ୍ୟ ବ୍ରଣ୍ଡ କମ୍ପାନୀର ଦାମ୍ ଠାରୁ ଏସବୁ ନକଲି ଜିନିଷ ଟିକେ ଶସ୍ତାରେ ମିଳୁଥିବାରୁ କିଛି ଦୋକାନୀ ଏହାକୁ କମ୍ ଟଙ୍କାରେ କିଣି ହୋଟେଲ, ଫାଷ୍ଟ ଫୁଡ୍ ଓ ଅନ୍ୟାନ୍ୟ ଦୋକାନରେ ବ୍ୟବହାର କରୁଥିଲେ । ବର୍ତ୍ତମାନ ଖାଦ୍ୟ ସୁରକ୍ଷା ଅଧିକାରୀଙ୍କ ଜରିଆରେ ସବୁ ସାମଗ୍ରୀର ସାମ୍ପୁଲ୍ ଟେଷ୍ଟ ପାଇଁ ପଠା ଯାଇଥିବା ବେଳେ ଫାକ୍ଟ୍ରି ସିଲ୍ କରିଛି ପୋଲିସ୍ । ଏହା ସହ ଏସବୁ କଞ୍ଚାମାଲ କେଉଁଠୁ ଆସୁଥିଲା ଓ ଫାକ୍ଟ୍ରି ମାଲିକ କିଏ ସେନେଇ ଖୋଳତାଡ ଆରମ୍ଭ କରିଛି ପୋଲିସ ।
ଇଟିଭି ଭାରତ, ଭୁବନେଶ୍ବର
