ବାଲେଶ୍ୱର: ଖଇରା ଅଞ୍ଚଳରେ ବାଘ ଆତଙ୍କ ଦେଖିବାକୁ ମିଳିଛି । ଏକ କଲରାପତରିଆ ବାଘ ଗାଁ ଭିତରକୁ ପଶି ଆସି ଆକ୍ରମଣ କରିବା ଯୋଗୁଁ 7ଜଣ ଗୁରୁତର ହୋଇଥିବାବେଳେ ବାଘକୁ ଆୟତ୍ତ କରିବା ପାଇଁ ବନବିଭାଗ ପ୍ରୟାସ ଚଳାଇଛି । ସୂଚନା ଅନୁସାରେ, ଖଇରା ବ୍ଲକ ନୟାଖଣ୍ଡି ପଞ୍ଚାୟତଗଡ଼ ଗ୍ରାମରେ ଶନିବାର ଅପରାହ୍ନରେ ବାଘ ଆତଙ୍କ ଦେଖିବାକୁ ମିଳିଛି । ପ୍ରଥମେ ଅଜଣା ଜନ୍ତୁ ଏମିତି ଆକ୍ରମଣ କରୁଥିବା ଲୋକମାନେ ଭାବିଥିଲେ । ମାତ୍ର ପରବର୍ତ୍ତୀ ସମୟରେ ଏହା ଏକ କଲରାପତରିଆ ବାଘ ବୋଲି ଜଣାପଡିଥିଲା । ଆକ୍ରମଣରେ ଗୁରୁତର ହୋଇଥିବା ମହିଳା ଜଣକ ହେଲେ ସତ୍ୟଭାମା ନାୟକ । ତାଙ୍କୁ ଖଇରା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଛି ।
ସୂଚନା ଅନୁସାରେ, ସତ୍ୟଭାମା ପୁଅ ଓ ସ୍ୱାମୀଙ୍କ ସହ ଘର ନିକଟରେ କାମ କରୁଥିବା ସମୟରେ ବାଘଟି ହଠାତ୍ ତାଙ୍କୁ ଆକ୍ରମଣ କରିଥିଲା । ସେ ଚିତ୍କାର କରିବାରୁ ଏହା ଶୁଣି ତାଙ୍କ ପୁଅ ଓ ସ୍ୱାମୀ ସତ୍ୟଭାମାଙ୍କ ନିକଟକୁ ଯାଇଥିଲେ । ଏହି ସମୟରେ ବାଘଟି ସେଠାରୁ ଗର୍ଜନ କରି ଗ୍ରାମ ମଧ୍ୟକୁ ପ୍ରବେଶ କରିଥିଲା । ପରେ ଗ୍ରାମବାସୀ ଏକତ୍ର ହୋଇ ବାଘକୁ କାବୁ କରିବାକୁ ପ୍ରୟାସ କରୁଥିବାବେଳେ ବାଘଟି ଲୁଚି ଯାଇଥିଲା । ପରେ ବନ ବିଭାଗର କର୍ମଚାରୀ ପହଞ୍ଚି ଗ୍ରାମବାସୀଙ୍କ ସହ ମିଶି ବାଘକୁ ଖୋଜିବା ଆରମ୍ଭ କରିଥିଲେ । ଏହି ସମୟରେ ବାଘଟି ପୁନର୍ବାର ସତ୍ୟଭାମାଙ୍କ ଘରକୁ ଆସି ତାଙ୍କ ପୁଅ ରାଧାକାନ୍ତ ନାୟକଙ୍କୁ ଆକ୍ରମଣ କରିବା ସହ ସେଠାରେ ଉପସ୍ଥିତ ଥିବା ଟଙ୍କଧର କେସି ନାମକ ଜଣେ ବ୍ୟକ୍ତିଙ୍କୁ ଆକ୍ରମଣ କରିଥିଲା । ଏହାସହ କଡମିୟା ଗ୍ରାମର ନିରଞ୍ଜନ ମୁଖି ଓ ଅର୍ଜୁନପୁର ଗ୍ରାମର ପ୍ରଫୁଲ୍ଲ ଦାସଙ୍କୁ ମଧ୍ୟ ଆକ୍ରମଣ କରିଥିଲା ।