ନୂଆଦିଲ୍ଲୀ: ଦିଲ୍ଲୀ ବିଧାନସଭା ନିର୍ବାଚନ ପାଇଁ ମଝିରେ ଆଉ ମାତ୍ର ଗୋଟିଏ ଦିନ ଥିବା ବେଳେ ଆଜି ଶେଷ ହେଉଛି ପ୍ରଚାର । ଆଜି ଅନ୍ତିମ ଦିନରେ ବିଭିନ୍ନ ରାଜନୈତିକ ଦଳର ପ୍ରାର୍ଥୀ ଓ ଷ୍ଟାର ପ୍ରଚାରକମାନେ ପ୍ରଚାରରେ ଲାଗିଛନ୍ତି । ଆଜି ‘ଆପ’ ମୁଖ୍ୟ ଅରବିନ୍ଦ କେଜ୍ରିଓ୍ବାଲ, ବିଜେପି ପକ୍ଷରୁ ରାଜନାଥ ସିଂଙ୍କ ସମେତ ଅନ୍ୟ କିଛି ବରିଷ୍ଠ ନେତା ଓ କଂଗ୍ରେସର ଚର୍ଚ୍ଚିତ ନେତ୍ରୀ ପ୍ରିୟଙ୍କା ଗାନ୍ଧୀ ପ୍ରମୁଖ ରାଜଧାନୀର ବିଭିନ୍ନ ସ୍ଥାନରେ ପ୍ରଚାର କରିବାର କାର୍ଯ୍ୟକ୍ରମ ରହିଛି ।
- ସଂଧ୍ୟାରେ ପ୍ରଚାର ଶେଷ
ନିର୍ବାଚନ ଆଚରଣ ବିଧି ଅନୁସାରେ, ସଂଧ୍ୟା 5ଟାରେ ପ୍ରଚାର ଶେଷ ହେବ । କେବଳ ସ୍ଥାନୀୟ ନେତାଙ୍କୁ ଛାଡିଲେ ଅନ୍ୟ ବଡ଼ ନେତାମାନେ ନିଜ ନିର୍ବାଚନ ମଣ୍ଡଳୀକୁ ଫେରିଯିବେ । ଆସନ୍ତାକାଲି ଡ୍ରାଏ ଡେ’ ଥିବା ବେଳେ ବୁଧବାର (5 ତାରିଖ) ବିଧାନସଭା ନିର୍ବାଚନ ପାଇଁ ସମସ୍ତ 70 ଆସନରେ ଏକକାଳୀନ ଭୋଟ ପଡିବ । ଏଥିପାଇଁ ପ୍ରଶାସନିକ ସ୍ତରରେ ମଧ୍ୟ ସମସ୍ତ ବ୍ୟବସ୍ଥା ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଛି । ଶାସନରେ ଥିବା ଅରବିନ୍ଦ କେଜ୍ରିଓ୍ବାଲଙ୍କ ଆମ ଆଦମୀ ପାର୍ଟି ଓ କେନ୍ଦ୍ରରେ ଶାସନରେ ଥିବା ‘ଭାରତୀୟ ଜନତା ପାର୍ଟି’ ମଧ୍ୟରେ ଏଥର କଡା ପ୍ରତିଦ୍ବନ୍ଦ୍ବିତା ଆଶା କରାଯାଉଛି । ତେବେ ‘ଆପ’ରୁ ଏକକାଳୀନ 7 ବିଧାୟକଙ୍କ ଇସ୍ତଫା ପରେ ଦଳ ସାମାନ୍ୟ ଦୁର୍ବଳ ପଡିଥିବା ମଧ୍ୟ ଦୃଶ୍ୟମାନ ହେଉଛି ।
- ଶେଷ ଦିନରେ ପ୍ରଚାର ମୈଦାନରେ କେଉଁମାନେ
କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ କସ୍ତୁରବା ନଗର ବିଧାନସଭାର କୋଟଲା ମୁବାରକପୁରରେ ନିର୍ବାଚନୀ ପ୍ରଚାର କରିବେ । ଏକାଧିକ ରାଲିକୁ ସମ୍ବୋଧିତ କରିବା ସହ ପ୍ରିୟଙ୍କାଙ୍କ ଏକ ରୋଡ୍ ଶୋ’ କାର୍ଯ୍ୟକ୍ରମ ରହିଛି । ସେହିପରି ଶାସକ ଦଳ ‘ଆମ ଆଦମୀ ପାର୍ଟି’ ପକ୍ଷରୁ ସୁପ୍ରିମୋ ଅରବିନ୍ଦ କେଜ୍ରିୱାଲ ଛତରପୁରରେ ଏକ ସାଧାରଣ ସଭାକୁ ସମ୍ବୋଧିତ କରିବା ସହ କାଲକାଜିରେ ରୋଡ୍ ଶୋ’ କରିବେ । କେଜ୍ରିଓ୍ବାଲଙ୍କ ବ୍ୟତୀତ ପଞ୍ଜାବ ମୁଖ୍ୟମନ୍ତ୍ରୀ ଭଗବନ୍ତ ମାନ ମଧ୍ୟ ଆଦର୍ଶ ନଗର, ଶାଲିମାର ବାଗ ଏବଂ ୱାଜିରପୁରରେ ଏରିଆରେ ରୋଡ୍ ଶୋ’ କରି ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ମାଗିବେ । ଦଳୀୟ ସାଂସଦ ସଞ୍ଜୟ ସିଂହ ରିଥାଲାରେ ରୋଡ୍ ଶୋ’ କରିବେ ।
- ଶେଷଦିନରେ BJPରୁ ଏହି ନେତା କରୁଛନ୍ତି ପ୍ରଚାର
ଅନ୍ୟପକ୍ଷରେ, ବିଜେପି ଶିବିରରୁ ଅନ୍ୟତମ ଶୀର୍ଷ ନେତା ତଥା ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଆଜି ଏକାଧିକ ସ୍ଥାନରେ ନିର୍ବାଚନୀ ସଭା କରିବେ । ଛତରପୁର ଏବଂ ମୋତି ନଗରରେ ରାଜନାଥଙ୍କ ରୋଡ୍ ଶୋ’ କାର୍ଯ୍ୟକ୍ରମ ରହିଛି । ଗେରୁଆ ଦଳରୁ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂହ ଧାମି, ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ, ପୂର୍ବତନ କେନ୍ଦ୍ରମନ୍ତ୍ରୀ ସ୍ମୃତି ଇରାନୀ, ଉତ୍ତର ପ୍ରଦେଶର ଉପଃମୁଖ୍ୟମନ୍ତ୍ରୀ ବ୍ରିଜେଶ ପାଠକ ଓ କେଶବ ପ୍ରସାଦ ମୌର୍ଯ୍ୟ, ଲୋକସଭା ସାଂସଦ ଅନୁରାଗ ଠାକୁର, ମନୋଜ ତିୱାରୀ, ରବି କିଶନ ଓ ଦିନେଶ ଲାଲ ଯାଦବ ପ୍ରମୁଖ ଏକାଧିକ ସ୍ଥାନରେ ନିର୍ବାଚନୀ ସଭାକୁ ସମ୍ବୋଧିତ କରିବା ସହ ରୋଡ ଶୋ’ କରିବେ ।
ଏହା ମଧ୍ୟ ପଢନ୍ତୁ:- କେଜ୍ରିୱାଲଙ୍କୁ ଝଟ୍କା, ନିର୍ବାଚନ ପୂର୍ବରୁ ଆପ୍ ଛାଡିଲେ 7 ବିଧାୟକ ଦିଲ୍ଲୀବାସୀଙ୍କୁ କେଜ୍ରିୱାଲଙ୍କ ୧୫ ଗ୍ୟାରେଣ୍ଟି: ମହିଳାଙ୍କୁ ୨୧୦୦, ବୟସ୍କଙ୍କ ପାଇଁ ସଞ୍ଜୀବନୀ |
- ଏକଜିଟ ପୋଲ ଉପରେ କଟକଣା:-
5 ତାରିଖରେ ଭୋଟିଂ ଶେଷ ହେବାକୁ ଥିବା ବେଳେ 8 ତାରିଖରେ ଭୋଟ ଗଣତି ଓ ଫଳାଫଳ ପ୍ରକାଶ ପାଇବ । ଭୋଟିଂ ଦିନ ଏକଜିଟ୍ ପୋଲ ବା ବୁଥବାହୁଡା ଜନମତ ପ୍ରକାଶନ କିମ୍ବା ପ୍ରଶାରଣ ଉପରେ କଟକଣା ଜାରି କରିଛନ୍ତି ନିର୍ବାଚନ ଆୟୋଗ । ପୂର୍ବାହ୍ନ 7ଟାରୁ ସଂଧ୍ୟା ସାଢେ 6 ମଧ୍ୟରେ ଏକଜିଟ୍ ପୋଲ ଉପରେ ନିଷେଧାଦେଶ ରହିଛି । ଏହାର ଉଲ୍ଲଂଘନ ସ୍ଥଳେ କାର୍ଯ୍ୟାନୁଷ୍ଟାନ ଗ୍ରହଣ କରାଯିବ ବୋଲି ନିର୍ବାଚନ ଆୟୋଗଙ୍କ ପକ୍ଷରୁ କୁହାଯାଇଛି ।
- ଯମୁନା ପାଣି ନିର୍ବାଚନ ମୁଦ୍ଦା
ସରକାରୀ ଦଳ ପକ୍ଷରୁ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲ ପ୍ରଚାରର ମଙ୍ଗ ଧରିଥିବା ବେଳେ ବିଜେପି କ୍ୟାମ୍ପରୁ ପ୍ରଧାନମନ୍ତ୍ରୀ ମୋଦି ନିଜେ ନିର୍ବାଚନୀ ଗ୍ରାଉଣ୍ଡକୁ ଓହ୍ଲାଇଥିଲେ । ଦୁଇନେତାଙ୍କ ମଧ୍ୟରେ ଯମୁନା ନଦୀର ଜଳ ପ୍ରଦୂଷଣ ନେଇ ନିର୍ବାଚନୀ ବୟାନବାଜୀ ମଧ୍ୟ ସାମ୍ନାକୁ ଆସିଥିବା ଦେଖିବାକୁ ମିଳିଥିଲା । ଯମୁନାର ଉପରମୁଣ୍ଡରେ ଥିବା ହରିୟାଣା ଯୋଗୁଁ ଯମୁନା ନଦୀର ଜଳ ଦୂଷିତ ହେଉଛି ଓ ଦିଲ୍ଲୀବାସୀ ପ୍ରଭାବିତ ହେଉଛନ୍ତି ବୋଲି କେଜ୍ରିଓ୍ବାଲ ଅଭିଯୋଗ କରିଥିଲେ । ପ୍ରଧାନମନ୍ତ୍ରୀ ମୋଦି କେଜ୍ରିଓ୍ବାଲଙ୍କ ଏହି ମନ୍ତବ୍ୟକୁ ହରିୟାଣାବାସୀଙ୍କ ପ୍ରତି ଅପମାନ ବୋଲି ଦର୍ଶାଇ ନିର୍ବାଚନୀ ମଞ୍ଚରେ ବର୍ଷିଥିଲେ । ଏହାରି ମଧ୍ୟରେ ହରିୟାଣା ମୁଖ୍ୟମନ୍ତ୍ରୀ ନାଏବ ସିଂ ସୈନୀ ମଧ୍ୟ ନଦୀଘାଟରେ ଯମୁନା ଜଳ ପାନ କରିଥିଲେ । ଏହି ପ୍ରସଙ୍ଗ ନିର୍ବାଚନୀ ରାଜନୀତି ଓ ଆରୋପ ପ୍ରତ୍ୟାରୋରକୁ ତୀବ୍ର କରିଥିଲା ।
ଇଟିଭି ଭାରତ, ବ୍ୟୁରୋ
