କଟକ ବୁଲିଲେ ପ୍ରବାସୀ ଭାରତୀୟ, ଦହିବରା ଆଳୁଦମର କଲେ ପ୍ରଶଂସା

ପ୍ରଥମ ଦିନରେ କଟକ ଆସିଲେ ୫୭ ପ୍ରବାସୀ ଭାରତୀୟ । ନେତାଜୀ ଜନ୍ମ ସଂଗ୍ରହାଳୟ ସହ ବୁଲିଲେ ବିଭିନ୍ନ ସ୍ଥାନ। ତାରକସି କାମ ଦେଖିଲେ, ଦହିବରାର ମଜା ନେଲେ ।

କଟକ: କଟକ ବୁଲିଲେ ପ୍ରବାସୀ ଭାରତୀୟ । ପ୍ରବାସୀ ଭାରତୀୟ ଦିବସ ଉତ୍ସବର ପ୍ରଥମ ଦିନରେ କଟକକୁ ୫୭ ଜଣ ପ୍ରବାସୀ ଭାରତୀୟମାନେ ବୁଲି ଆସିଥିଲେ । କଟକର ଅନେକ ସ୍ଥାନ ଯଥା ନେତାଜୀ ଜନ୍ମ ସଂଗ୍ରହାଳୟ, ସିଲଭର ସିଟି ବୋଟିଂ କ୍ଲବ, ଚଣ୍ଡୀ ମନ୍ଦିର, ନୌବାଣିଜ୍ୟ ସଂଗ୍ରହାଳୟ, ଧବଳେଶ୍ବର ମନ୍ଦିର ଭଳି ଅନେକ ସ୍ଥାନ ବୁଲିଛନ୍ତି । ଆମେରିକା, ଦୁବାଇ ଭଳି ଅନେକ ଦେଶରେ ରହୁଥିବା ଭାରତୀୟ ପ୍ରବାସୀମାନଙ୍କୁ କଟକ ବେଶ ପସନ୍ଦ ଆସିଥିଲା। ସେମାନେ ପ୍ରଥମେ ନେତାଜୀ ଜନ୍ମ ସଂଗ୍ରହାଳୟ ଯାଇଥିଲେ ଏବଂ ପରେ କଟକର ଅନେକ ସ୍ଥାନ ବୁଲିଥିଲେ ।

ପ୍ରବାସୀଙ୍କୁ କଟକରେ ଭବ୍ୟ ସ୍ବାଗତ:

ପ୍ରବାସୀ ଭାରତୀୟଙ୍କୁ ସହଯୋଗ ଏବଂ ସ୍ୱାଗତ କରିବା ପାଇଁ ସହରରେ ବିଭିନ୍ନ ପ୍ରକାର ବନ୍ଦୋବସ୍ତ ହୋଇଛି । ବିଶେଷ କରି ସିଲଭର ସିଟି ବୋଟିଂ କ୍ଲବ ପରିସରରେ ବ୍ୟାପକ ବ୍ୟବସ୍ଥା ହୋଇଛି । ଗୋଟିଏ ସ୍ଥାନରେ କଟକ ଜିଲ୍ଲାର ସମସ୍ତ ଐତିହ୍ୟକୁ ପ୍ରଦର୍ଶିତ କରାଯାଇଛି । ସେ ମାଣିଆ ବନ୍ଧର ପାଟ ଶାଢ଼ୀ ହେଉ ଅବା କଟକର ସୁକ୍ଷ୍ମ ତାରାକସି କାର୍ଯ୍ୟ, ବଡମ୍ବାର କାଠ ଓ ଡୋକ୍ରା ହେଉ ଅବା କଟକ ପ୍ରସିଦ୍ଧ ଦହିବରା । ସେସବୁକୁ ଏହି ସ୍ଥାନମାନଙ୍କରେ ପ୍ରଦର୍ଶିତ କରାଯାଇଛି । ଫଳରେ ଯେଉଁ ପ୍ରବାସୀ ଭାରତୀୟମାନେ ଆସୁଛନ୍ତି ସେମାନେ କଟକ ସମ୍ପର୍କରେ ଅନେକ ତଥ୍ୟ ଜାଣି ସହ ଭରପୁର ମଜା ନେଇପାରୁଛନ୍ତି।

PRAVASI BHARATIYA VISIT CUTTACK (ETV Bharat Odisha)

କଟକ ଦହିବରାକୁ ପ୍ରବାସୀଙ୍କ ପ୍ରଶଂସା:

ଦହିବରା ପାଇଁ କଟକ ବେଶ ପ୍ରସିଦ୍ଧି ହାସଲ କରିଛି । ପ୍ରବାସୀ ଭାରତୀୟମାନଙ୍କ ପାଇଁ ଦହିବରା ର ଏକ ସ୍ୱତନ୍ତ୍ର ଷ୍ଟଲ କରାଯାଇଛି । ପ୍ରବାସୀ ଭାରତୀୟମାନେ ଦହିବରା ଖାଇବାର ମଜା ମଧ୍ୟ ନେଇଛନ୍ତି । ଅନେକ ପ୍ରବାସୀ ଏହି ଦହିବରା ଖାଇବାକୁ ପସନ୍ଦ କରିଥିଲେ । ଷ୍ଟଲରେ ଲାଗିଥିଲା ଭିଡ଼ । ଆମେରିକାରେ ରହୁଥିବା ଗୁଜୁରାଟର ଶରଦ ଅମିନ କହିଛନ୍ତି, "କଟକ ଦହିବରାର ସ୍ୱାଦ ସବୁଠୁ ନିଆରା । ଗୁଜୁରାଟରେ ଅନେକ ସ୍ଥାନରେ ଦହିବରା ଖାଇଛି । ମାତ୍ର କଟକ ଦହିବରା ହେଉଛି ସ୍ୱତନ୍ତ୍ର ।" ସେ ଏବଂ ତାଙ୍କର ପତ୍ନୀ କଟକ ଦହିବରା ଖାଇ ବେଶ ପ୍ରଶଂସା କରିଛନ୍ତି । ଅନ୍ୟପଟେ ଦହିବରା ବ୍ୟବସାୟୀ ହେମନ୍ତ ସାହୁ କହିଛନ୍ତି, "ପ୍ରବାସୀ ଭାରତୀୟଙ୍କ ପାଇଁ ସ୍ୱତନ୍ତ୍ର ଭାବରେ ଦହିବରା ପ୍ରସ୍ତୁତ କରାଯାଇଛି । ସେମାନେ ପ୍ରଶଂସା କଲେ ଓଡିଶା ଏବଂ କଟକର ନାଁ ରହିବ। ଏହା ଆମ ପାଇଁ ଗର୍ବର ବିଷୟ ।"

PRAVASI BHARATIYA VISIT CUTTACK (ETV Bharat Odisha)

PRAVASI BHARATIYA VISIT CUTTACK (ETV Bharat Odisha)

ମାଣିଆ ବନ୍ଧର ତନ୍ତ ବୁଣା ପାଟ ଶାଢ଼ୀ:
କଟକ ମାଣିଆବନ୍ଧର ତନ୍ତ ବୁଣା ଶାଢ଼ୀ ମଧ୍ୟ ପ୍ରସିଦ୍ଧି ହାସଲ କରିଛି । ତନ୍ତରେ ପ୍ରସ୍ତୁତ ପାଟ ଶାଢ଼ୀ, ଡ୍ରେସ , କପଡାର ଅନେକ ଆଇଟମ ଏହି ଷ୍ଟଲରେ ସଜାଇ ରଖାଯାଇଛି ବ୍ୟବସାୟୀ ସୁରେନ୍ଦ୍ର ଦତ୍ତ । ବିଭିନ୍ନ ଡିଜାଇନର କଟନ ଶାଢ଼ୀକୁ ସେ ଏହି ଷ୍ଟଲରେ ରଖିଛନ୍ତି । "ତନ୍ତରେ ଗୋଟିଏ ଶାଢ଼ୀ ବୁଣିବା ପାଇଁ ତାଙ୍କୁ ୨ ରୁ ଅଢେଇ ଦିନ ଲାଗେ ଏବଂ ପାଟ ବୁଣିବା ପାଇଁ ୪ ଦିନ ଲାଗେ" ବୋଲି ମାଣିଆ ବନ୍ଧର ସୁରେନ୍ଦ୍ର ଦତ୍ତ କହିଛନ୍ତି । ଦର ୧୬୦୦ରୁ ୨୫୦୦ ଟଙ୍କା ପର୍ଯ୍ୟନ୍ତ ରହିଛି । ସେ ୪୦ ବର୍ଷ ହେବ ଏହି ବ୍ୟବସାୟ କରୁଥିବା କହିଛନ୍ତି । ତାଙ୍କ ପାଖରେ ୨୦୦ ବୁଣାକାର ରହିଥିବା କହିଛନ୍ତି ସୁରେନ୍ଦ୍ର । ଏହି ଷ୍ଟଲରେ ମଧ୍ୟ ତନ୍ତରେ ସେ ଲୁଗା ବୁଣୁଥିଲେ, ଯାହାକୁ ପ୍ରବାସୀମାନେ ଦେଖି ଫଟୋ ଉଠାଇବା ସହ ଅନେକ ଶାଢ଼ୀ ମଧ୍ୟ କିଣି ନେଇଥିଲେ।

PRAVASI BHARATIYA VISIT CUTTACK (ETV Bharat Odisha)

ଏହା ବି ପଢନ୍ତୁ...ଓଡ଼ିଶାରେ ପ୍ରଧାନମନ୍ତ୍ରୀ ମୋଦି, ପ୍ରବାସୀ ଭାରତୀୟ ଦିବସ ସମ୍ମିଳନୀକୁ କରିବେ ସମ୍ବୋଧନ

ଏହା ବି ପଢନ୍ତୁ...ରାଜଧାନୀରେ ପ୍ରବାସୀ ମହାକୁମ୍ଭ, ଦେଖନ୍ତୁ ଝଲକ୍‌

ଆକର୍ଷିତ କରୁଛି ସୂକ୍ଷ୍ମ ତାରକସି କାମ:

ତାରକସି କାର୍ଯ୍ୟ ପାଇଁ କଟକ ବେଶ ପ୍ରସିଦ୍ଧ । ଅଳଙ୍କାରରେ ତାରକସି କାମର ନିଖୁଣ କାରିଗରୀ ସମସ୍ତଙ୍କୁ ବେଶ ଆକର୍ଷିତ ହୋଇଥାଏ । କଟକ ଦଶହରାରେ ମେଢ଼ ଗୁଡିକରେ ଯେଉଁ ସବୁ ଚାନ୍ଦି କାମ ହୁଏ ତାହା କେବଳ କଟକ ତାରକସି କାରିଗରମାନଙ୍କ ଦ୍ୱାରା ହୋଇଥାଏ । ଯାହାକୁ ଦେଖିବାକୁ କେବଳ ଓଡିଶାର ଲୋକ କାହିଁକି ବରଂ ଦେଶର ଅନେକ ସ୍ଥାନରୁ ଦର୍ଶକଙ୍କ ସୁଅ ଛୁଟି ଥାଏ । ଏହି ସୁକ୍ଷ୍ମ କାରିଗରୀ କାମକୁ ପ୍ରଦର୍ଶନ କରିବାକୁ ଯାଇ ପ୍ରବାସୀ ଭାରତୀୟମାନଙ୍କ ପାଇଁ ସ୍ୱତନ୍ତ୍ର ଷ୍ଟଲ ରଖାଯାଇଛି । ଏନେଇ ତାରକସି କାରିଗର ରମେଶ ବେହେରା କହିଛନ୍ତି, "କଟକର ସଂସ୍କୃତି ଆଉ କଳାକୁ ବଜାୟ ରଖିବାକୁ ଚେଷ୍ଟା କରୁଛୁ । ବିଶେଷକରି ଆଗାମୀ ଯୁବପିଢ଼ି ଯେପରି ଏହି କଳାକୁ ବଜାୟ ରଖିବେ ସେଥିପାଇଁ ଚେଷ୍ଟା ଜାରି ରଖିଛୁ । ପ୍ରବାସୀ ଭାରତୀୟମାନେ ମଧ୍ୟ ଏହାକୁ ନେଇ ବେଶ ପ୍ରଶଂସା କରୁଛନ୍ତି ।"

PRAVASI BHARATIYA VISIT CUTTACK (ETV Bharat Odisha)

ଇଟିଭି ଭାରତ, ଭୁବନେଶ୍ବର