କଟକ: ପାଖେଇ ଆସୁଛି ଗଣେଶ ପୂଜା । ସେପ୍ଟେମ୍ବର 7ରେ ମଣ୍ଡପ ଗୁଡିକରେ ପୂଜା ପାଇବେ ଗଜାନନ । ଏଥି ପାଇଁ ମୂର୍ତ୍ତି ତିଆରି ମଧ୍ୟ ଆରମ୍ଭ ହୋଇଯାଇଛି । ଏଥର କଟକରେ ଜମିବ ଦଶହରା । କଟକରେ କମିଶନରେଟ ପୋଲିସର ଗଣେଶ ପୂଜା ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । କିଭଳି ଶାନ୍ତି ଶୃଙ୍ଖଳାର ସହ ପୂଜା ଶେଷ ହେବ ସେନେଇ ବୈଠକରେ ଆଲୋଚନା ହୋଇଛି । ଏଥର ମଦମୁକ୍ତ ବିସର୍ଜନ ହେବ । ବିସର୍ଜନ ଦିନ ମଦ ଦୋକାନ ବନ୍ଦ ରଖିବା ପାଇଁ ପୋଲିସକୁ ପ୍ରସ୍ତାବ ଦେଇଛି କଟକ ପୂଜା କମିଟି ଓ ଶାନ୍ତି କମିଟି ।
କଟକରେ ଗଣେଶ ପୂଜା ?
ଚଳିତ ବର୍ଷ କଟକ ସହରରେ ୧୫୦୦ରୁ ଊର୍ଦ୍ଧ୍ବ ଗଜାନନଙ୍କ ମୂର୍ତ୍ତି ପୂଜା ପାଇବେ । ଏତିପାଇଁ ଏବେ ଠାରୁ ପ୍ରସ୍ତୁତି ଆରମ୍ଭ ହୋଇଯାଇଛି । ସେପ୍ଟେମ୍ବର 7ରେ ଗଣେଶପୂଜା ଥିବା ବେଳେ ସେପ୍ଟେମ୍ୱର ୧୫,୨୨ ଓ ୨୯ ତାରିଖରେ ସିଏମସି ପକ୍ଷରୁ କରାଯାଇଥିବା ଅସ୍ଥାୟୀ ପୋଖରୀରେ ମୂର୍ତ୍ତି ବିସର୍ଜନ କରାଯିବ । ସାଉଣ୍ଡ ପାଇଁ କମିସନରେଟ ପୋଲିସ କରିଥିବା ଗାଇଡଲାଇନ ଅନୁଯାୟୀ ସବୁ ପୂଜା କମିଟି, କ୍ଳବ୍ ଓ ଅନୁଷ୍ଠାନ ପାଳନ କରିବେ । ଜୋର ଜବରଦସ୍ତ ଚାନ୍ଦା ମାଗିଲେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି। ସେହିପରି ବିକୃତ ମୂର୍ତ୍ତି ଉପରେ ବିଶେଷ ଧ୍ୟାନ ଦେବ ପୋଲିସ । ନିୟମ ଉଲ୍ଲଙ୍ଘନ କଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସୂଚନା ଦେଇଛନ୍ତି ପୋଲିସ କମିଶନର ସଞ୍ଜୀବ ପଣ୍ଡା ।