ଭୁବନେଶ୍ବର:ଓଡ଼ିଶାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଜିଠୁ ତିନିଦିନିଆ ଓଡ଼ିଶା ଗସ୍ତରେ ଆସି ଭୁବନେଶ୍ବରରେ ପହଞ୍ଚିଛନ୍ତି । ପ୍ରଧାନମନ୍ତ୍ରୀଙ୍କୁ ରାଜ୍ୟପାଳ ରଘୁବର ଦାସ, ମୁଖ୍ୟମନ୍ତ୍ରୀ ମୋହନ ଚରଣ ମାଝୀ , ଭୁବନେଶ୍ୱର ସାଂସଦ ଅପରାଜିତ ଷଡଙ୍ଗୀ, ପୋଲିସ ଡିଜି ଓ ମୁଖ୍ୟ ଶାସନ ସଚିବ ସ୍ବାଗତ କରିଥିଲେ । ମୋଦିଙ୍କୁ ପାଖରେ ପାଇ ଉତ୍ସାହିତ ନେତା, ମନ୍ତ୍ରୀ ଓ ଜନତା । ଏବେ ନବୀନ ନିବାସ ପାଖରେ ଆୟୋଜିତ ଜନସଭାରେ ଯୋଗ ଦେଇଛନ୍ତି ପ୍ରଧାନମନ୍ତ୍ରୀ । ପରେ ରାଜଭବନ ଯାଇ ସନ୍ଧ୍ୟା 6ଟା 30 ମିନିଟରେ ବିଜେପି ରାଜ୍ୟ କାର୍ଯ୍ୟାଳୟକୁ ଆସିବେ । ବିଜେପି ରାଜ୍ୟ କାର୍ଯ୍ୟାଳୟରେ ପ୍ରାୟ 2 ଘଣ୍ଟା ପର୍ଯ୍ୟନ୍ତ ସାଂସଦ, ମନ୍ତ୍ରୀ, ବିଧାୟକ ଏବଂ ବରିଷ୍ଠ କାଯ୍ୟକର୍ତ୍ତାଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି । ପରେ ପୁନର୍ବାର ରାଜଭବନ ଫେରିଯାଇ ସେଠାରେ ରାତ୍ରିଯାପନ କରିବେ ପ୍ରଧାନମନ୍ତ୍ରୀ । ରାଜ୍ୟ ବିଜେପି ସରକାର ଗଠନ ପରେ ଏହା ମୋଦିଙ୍କ ତୃତୀୟ ଓଡ଼ିଶା ଗସ୍ତ ।
ନେତାଙ୍କୁ 5 ପରାମର୍ଶ ଦେବେ ମନ୍ତ୍ରୀ:
ନିର୍ବାଚନରେ ସରକାର ଯେଉଁ ପ୍ରତିଶ୍ରୁତି ଦେଇଥିଲେ ତାହା କେତେ ପାଳନ କରିଛନ୍ତି ତାହା ଉପରେ ରାଜ୍ୟ ବିଜେପି କାର୍ଯ୍ୟାଳୟରେ ହେବାକୁ ଥିବା ବୈଠକରେ ଆଲୋଚନା ହେବ । ମନ୍ତ୍ରୀ, ସାଂସଦ ଓ ବିଧାୟକଙ୍କୁ 5ଟି ପରାମର୍ଶ ଦେବେ ମୋଦି । ସେହିପରି ବର୍ତ୍ତମାନ ସୁଦ୍ଧା ବିଜେପି ସରକାରରେ ମନ୍ତ୍ରୀ ମାନେ କେତେ କାମ କରିଛନ୍ତି ମନ୍ତ୍ରୀ ଓ ବିଧାୟକ ତାର ରିପୋର୍ଟ ନେବେ ମୋଦି ।
ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ''ଓଡ଼ିଶା ସରକାରଙ୍କ କାମ ଚାଲିଛି, କେଉଁ କେଉଁ ନୂଆ କାମ କରିଛୁ ସେ ବାବଦରେ ଆମେ ଚିଠା ପ୍ରସ୍ତୁତ କରିଛୁ । ନିର୍ବାଚନ ସମୟରେ ଆମେ ଲୋକଙ୍କୁ କଣ କଣ ପ୍ରତିଶ୍ରୁତି ଦେଇଥିଲୁ । ତା ମଧ୍ୟରୁ କେଉଁ ଗୁଡିକୁ ଆମେ ପାଳନ କରିସାରିଲୁଣି ସେ ବାବାଦରେ ପ୍ରଧାନମନ୍ତ୍ରୀଙ୍କୁ ଅବଗତ କରାଇବୁ । ଭାରତ ସରକାରଙ୍କ ଯୋଜନାର ରୂପାୟନ ଓଡ଼ିଶାରେ କିପରି ହୋଇଛି, ତାହା ତାଙ୍କର ମୂଳ ବିଷୟ ହେବ । ଓଡ଼ିଶା ସରକାର କଣ କଣ ନୂଆ ଯୋଜନା କାର୍ଯ୍ୟକାରୀ କରିଛନ୍ତି ସେ ବିଷୟରେ ରିପୋର୍ଟ ଦିଆଯିବ । ସେ ଆମକୁ 5ଟା ପରାମର୍ଶ ଦେବେ । ଯାହା ଆମେ ପାଳନ କରିବୁ । ''