ଭୁବନେଶ୍ବର:ଏମ୍ସରେ (AIIMS) ଚିକିତ୍ସାଧୀନ ଥିବା ଜଣେ ବୟସ୍କ ରୋଗୀ ଜୀବନ ହାରିଥିବା ଅଭିଯୋଗ ହୋଇଛି । ସୋମବାର ବିଳମ୍ବିତ ରାତିରେ ଏହା ଘଟିଥିବା ସନ୍ଦେହ କରାଯାଉଥିବା ବେଳେ ଗତକାଲି (ମଙ୍ଗଳବାର) ଭୋର ସମୟରେ ସେ ଚିକିତ୍ସାଧୀନ ଥିବା ବେଡ ଉପରେ ଲାଗିଥିବା ଫ୍ୟାନରୁ ବୃଦ୍ଧଙ୍କ ଝୁଲନ୍ତା ମୃତଦେହ ଉଦ୍ଧାର କରାଯାଇଥିଲା । ମୃତ ବୃଦ୍ଧ ଜଣକ ଯାଜପୁର କୁଆଖିଆ ଅଞ୍ଚଳର 70 ବର୍ଷୀୟ ଦିଲ୍ଲୀପ କୁମାର ସାହୁ ବୋଲି ଜଣାପଡିଛି ।
- ଆଣ୍ଠୁ ଅପରେସନ ପାଇଁ ଭର୍ତ୍ତି ହୋଇଥିଲେ
ସୂଚନା ଅନୁସାରେ, 70 ବର୍ଷୀୟ ଦିଲ୍ଲୀପ ୫ ତାରିଖରେ ଆଣ୍ଠୁରେ ଅପରେସନ ପାଇଁ ‘ଏମ୍ସ’ରେ ଭର୍ତ୍ତି ହୋଇଥିଲେ । ପାଖରେ ତାଙ୍କ ଝିଅ ହରପ୍ରିୟା ମଧ୍ୟ ରହୁଥିଲେ । ଅପରେସନ ପୂର୍ବରୁ ତାଙ୍କଠାରେ ଅନ୍ୟ କିଛି ସ୍ବାସ୍ଥ୍ୟଗତ ସମସ୍ୟା ଦେଖାଯିବା କାରଣରୁ ତାଙ୍କୁ ଅବଜରଭେସନ ଓ ଅନ୍ୟାନ୍ୟ ଟେଷ୍ଟ ପାଇଁ ରଖାଯାଇଥିଲା । ତେବେ ଉକ୍ତ ଓ୍ବାର୍ଡରେ ଏକାଧିକ ରୋଗୀ ଚିକିତ୍ସାଧୀନ ଥିବା ସତ୍ତ୍ବେ ମଧ୍ୟ ମଙ୍ଗଳବାର ଭୋର ସମୟରେ ତାଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଥିଲା । ମୃତ ଦିଲ୍ଲୀପଙ୍କ ଝିଅ ଚିକିତ୍ସା ପ୍ରକ୍ରିୟାରେ ହାରାଶମେଣ୍ଟ କରାଯିବାକୁ ନେଇ ତାଙ୍କ ବାପା ନିରାଶ ଥିଲେ ଓ ସେହି କାରଣରୁ ଏପରି ଚରମ ନିଷ୍ପତ୍ତି ନେଇଥାଇପାରନ୍ତି ବୋଲି ସନ୍ଦେହ ପ୍ରକାଶ କରିଛନ୍ତି । ପୋଲିସ ମୃତଦେହ ଜବତ କରି ତଦନ୍ତ ଜାରି ରଖିଥିବା ବେଳେ ଏମ୍ସ ମଧ୍ୟ ଏକ ଫ୍ୟାକ୍ଟ ଫାଇଣ୍ଡିଂ ଟିମ ଗଠନ କରିଛି ।
AIIMS ରେ ଜୀବନ ହାରିଲେ ଚିକିତ୍ସାଧୀନ ବୃଦ୍ଧ, ଚିକିତ୍ସାରେ ନିରାଶ କରାଯାଉଥିବା ପରିବାର ଅଭିଯୋଗ (ETV Bharat Odisha) - ‘ଏମ୍ସ’ କର୍ତ୍ତୃପକ୍ଷଙ୍କ ହାରାସମେଣ୍ଟ ଓ ଚାପକୁ ଦାୟୀ କଲେ ଦିଲ୍ଲୀପଙ୍କ ଝିଅ
ବାପାଙ୍କ ମୃତ୍ୟୁ ପାଇଁ ଝିଅ ହରପ୍ରିୟା ‘ଏମ୍ସ’ କର୍ତ୍ତୃପକ୍ଷଙ୍କ ବିରୋଧରେ ସଙ୍ଗୀନ ଅଭିଯୋଗ ଆଣିଛନ୍ତି । ଚିକିତ୍ସା ସମ୍ପର୍କିତ ବିଭିନ୍ନ ପ୍ରକ୍ରିୟା ପାଇଁ ତାଙ୍କୁ ହାରାସ ହେବାକୁ ପଡିଥିଲା । ହରପ୍ରିୟା କହିଛନ୍ତି, ‘‘ଏମ୍ସ’ ଷ୍ଟାଫମାନେ ହିନ୍ଦୀରେ କଥା ହେଉଥିଲେ । କୌଣସି କଥା ବୁଝିନପାରି ଓଡିଆରେ ପଚାରିଲେ ସେମାନେ ବିରକ୍ତ ହେଉଥିଲେ । ଅନ୍ୟ କିଛି ସ୍ବାସ୍ଥ୍ୟ ସମସ୍ୟା ଥିବାରୁ ଏବେ ଦିଲ୍ଲୀପଙ୍କୁ ଡିସଚାର୍ଜ କରାଇ ପରେ ଅପରେସନ କରିବାକୁ କୁହାଯାଇଥିଲା । ଏହା ପୂର୍ବରୁ ‘ବିଏସକେଓ୍ବାଇ’ ଯୋଜନାରେ ଆଣିଥିବା ମେଡିସିନ ଫେରାଇବା ପାଇଁ କୁହାଯାଇଥିଲା । ପ୍ରଥମେ ଧର୍ମଶାଳା ବା ରୁମ୍ ବୁକିଂ କରିବା ପରେ ବାପାଙ୍କୁ ହସ୍ପିଟାଲରୁ ଡିସଚାର୍ଜ କରାଯିବ ବୋଲି କୁହାଯିବାରୁ ମୁଁ ବହୁ ପରିଶ୍ରମରେ ରୁମ ଖୋଜିଥିଲି । ମେଡିସିନ ଫେରସ୍ତ ପାଇଁ ଗୋଟିଏ ୟୁନିଟ୍ ଦ୍ବାରା ଦରଖାସ୍ତ ଲେଖି ଷ୍ଟାମ୍ପ ମାରିକି ଆଣିବା ପାଇଁ କୁହାଯାଇଥିବା ବେଳେ ଅନ୍ୟ ୟୁନିଟରେ ଷ୍ଟାମ୍ପ ଲଗାଇବା ପାଇଁ କାଳି ନଥିବା ଦର୍ଶାଇ ଫେରାଇ ଦିଆଯାଇଥିଲା । ଏହି ବିନା ଷ୍ଟାମ୍ପ ପେପରକୁ ସମ୍ପୃକ୍ତ ୟୁନିଟ ଗ୍ରହଣ କରିନଥିଲା । ଏପରି ଘଟଣାକୁ ଦେଖି ମୋ ବାପା ମାନସିକ ସ୍ତରରେ ଭାଙ୍ଗି ପଡିଥିଲେ । ତେଣୁ ସେ ସେ ମର୍ମାହତ ଏପରି ଚରମ ନିଷ୍ପତ୍ତି ନେଇଥାଇ ପାରନ୍ତି । ’’
- ଅଭିଯୋଗର ତଦନ୍ତ କରୁଛି ‘ଫ୍ୟାକ୍ଟ ଫାଇଣ୍ଡିଂ ଟିମ୍’
ଏନେଇ ‘ଏମ୍ସ’ ଇନଚାର୍ଜ ସୁପରିଟେଣ୍ଡଣ୍ଟ ଅଶୋକ ଜେନା ଅଭିଯୋଗ ସମ୍ପର୍କରେ ତଦନ୍ତ ଚାଲିଥିବା କହିଛନ୍ତି । ଅଶୋକ କହିଛନ୍ତି,‘‘ଗତ ୫ ତାରିଖରୁ ଭର୍ତ୍ତି ହୋଇଥିବା ଦିଲ୍ଲୀପଙ୍କର ନିରୋଲୋଜୀ ଟେଷ୍ଟ ଚାଲିଥିଲା । କିଡନୀରେ କିଛି ସମସ୍ୟା ଥିବା ପରେ ଆମେ ଚିକିତ୍ସା ଜାରି ରଖିଥିଲୁ । ସେ ଓ୍ବାର୍ଡରେ ମଧ୍ୟ ଥିଲେ । ରାତିରେ ସେହି ଓ୍ବାର୍ଡରେ ୩୮ଜଣ ଅନ୍ୟ ରୋଗୀ ମଧ୍ୟ ଚିକିତ୍ସାଧୀନ ଥିଲେ । ଚାରି ଜଣ ନର୍ସିଂ ଷ୍ଟାଫ୍ ଓ ସିକ୍ୟୁରିଟି ଗାର୍ଡ ମଧ୍ୟ ଡ୍ୟୁଟିରେ ଥିଲେ । ତେବେ କେଉଁ ପରିସ୍ଥିତିରେ ଏମିତି ଘଟିଲା, ତାହା ତଦନ୍ତ କରାଯାଉଛି । ସେହିପରି ହସ୍ପିଟାଲ କର୍ତ୍ତୃପକ୍ଷଙ୍କ ବିରୋଧରେ ଯେଉଁ ଦୁର୍ବ୍ୟବାହର ଅଭିଯୋଗ ଆସିଛି, ତାହାର ତଦନ୍ତ ପାଇଁ ମଧ୍ୟ ହସ୍ପିଟାଲ କର୍ତ୍ତୃପକ୍ଷ ଏକ ‘ଫ୍ୟାକ୍ଟ ଫାଇଣ୍ଡିଂ ଟିମ୍’ ଗଠନ କରିଛନ୍ତି । ସେହି ଆଧାରରେ ପରବର୍ତ୍ତୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ।
ଇଟିଭି ଭାରତ, ଭୁବନେଶ୍ବର
