କେନ୍ଦୁଝର: ଜନ୍ମମାଟି କେନ୍ଦୁଝର ରାଇକଳାରେ ଦୀପାବଳି ପାଳିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ମୁଖ୍ୟମନ୍ତ୍ରୀ ହେବା ପରେ ପ୍ରଥମ ଥର ଗାଁ ଲୋକଙ୍କ ସହ ମିଳିମିଶି ଦୀପାବଳି ପାଳିଛନ୍ତି ମୁଖ୍ୟମନ୍ତ୍ରୀ । ପାରମ୍ପରିକ ଭାବରେ ପିଠା ଖାଇ ବାଣ ଫୁଟାଇ ଧୁମଧାମରେ ପୈତୃକ ଗାଁରେ ଦୀପାବଳି ପାଳନ କରିଛନ୍ତି ମୁଖ୍ୟମନ୍ତ୍ରୀ । ୨ ଦିନିଆ କେନ୍ଦୁଝର ଗସ୍ତରେ ଆସିଥିବା ମୁଖ୍ୟମନ୍ତ୍ରୀ ଆଜି ପ୍ରଥମ ଦିନରେ ଜନ୍ମମାଟି ରାଇକଳା ନିଜ ଘରେ ପହଞ୍ଚି ସାନ୍ତାଳି ସମାଜ ବିଧି ଅନୁସାରେ ଦୀପାବଳି ପାଳନ କରିବା ସହ ରାଜ୍ୟବାସୀଙ୍କୁ ଶୁଭେଚ୍ଛା ଜଣାଇଛନ୍ତି । ସାନ୍ତାଳି ସମାଜ ବିଧି ଅନୁସାରେ ଗାଁ ଲୋକଙ୍କ ସହ ମିଶି ବାଜା ବଜାଇ ବାଣ ଫୁଟାଇ ଦୀପାବଳି ପାଳିଛନ୍ତି ।
କେମିତି ଦୀପାବଳି ପାଳନ କଲେ ମୁଖ୍ୟମନ୍ତ୍ରୀ:
ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି, "ଆମ ଗାଁ ରାଇକଳାରେ ପାଳନ କରାଯାଉଥିବା ଦୀପାବଳି ପର୍ବକୁ ବନ୍ଦଣା ପର୍ବ କୁହାଯାଏ । ଏଥିରେ ଗୋଠାଣ ପୂଜା କରାଯାଏ । ଆମ ସାହିରେ କରାଯାଉଥିବା ଏହି ପୂଜାପାଠରେ ଯୋଗ ଦେବାପାଇଁ ମୁଁ ସ୍ବତନ୍ତ୍ର ଭାବରେ ଆସିଛି । ଯେହେତୁ ଛୋଟବେଳୁ ମୁଁ ଏହି ପୂଜାରେ ସବୁବେଳେ ସାମିଲ ହୁଏ, ଏ ପୂଜାକୁ ମୁଁ ଭୁଲିପାରିନାହିଁ । ତେଣୁ ଏଥିରେ ସାମିଲ ହେବାକୁ ଆସିଛି । ଆମ ଗାଁରେ ଲୋକମାନେ ମାଦଳ ବଜାଇବେ, ଗୀତଗାଇ ନାଚିବେ, ଘରକୁ ଘର ବୁଲିବେ । ଏହାକୁ ଧିଙ୍ଗ୍ୱାନି ନାଚ କୁହାଯାଏ । ଏହି ନାଚ ଗୀତରେ ମୁଁ ସାମିଲ ହେବି । ଏ ପର୍ବରେ ଓଡ଼ିଆ ଅସ୍ମିତାର କଥା ଅଛି । କେନ୍ଦୁଝର ସହରରେ ଧୁମଧାମରେ କାଳୀପୂଜା ହୁଏ । ମୁଁ ସେସବୁ ଯାଗାକୁ ଯାଇ ମା' କାଳୀଙ୍କୁ ଦର୍ଶନ କରିବି । ଆମ ଘରେ କାଲି ଗୋବର୍ଦ୍ଧନ ପୂଜା ହେବ । ଏହାକୁ ଗୁହାଳ ପୂଜା ବି କୁହାଯାଏ । ଆମେ ତାକୁ ପାଳନ କରିବୁ । କାଳୀ ପୂଜାକୁ ଆମ ସାନ୍ତାଳି ସମାଜରେ ସହରାଇ ପରବ କୁହାଯାଏ । ଏହାକୁ ବି ପାଳନ କରିବୁ ।"
ଜନ୍ମମାଟିରେ ମୁଖ୍ୟମନ୍ତ୍ରୀ:
ଆଜି ଦିନ ୧.୧୦ରେ ରାଇସୁଆଁ ଏୟାର ଷ୍ଟ୍ରିପ୍ (Air Strip)ରେ ସ୍ଵତନ୍ତ୍ର ବିମାନ ଯୋଗେ ପହଞ୍ଚିଥିଲେ । ସେଠାର ସ୍ଥାନୀୟ ଲୋକେ ତାଙ୍କୁ ବିପୁଳ ସମ୍ବର୍ଦ୍ଧନା ଜ୍ଞାପନ କରିଥିଲେ । ପରେ ମୁଖ୍ୟମନ୍ତ୍ରୀ କେନ୍ଦୁଝର ସର୍କିଟ ହାଉସ (Circuit House)ରେ ପହଞ୍ଚିଥିଲେ । ଏହାପରେ ସର୍କିଟ୍ ହାଉସରୁ ୨ଟା ୩୦ ମିନିଟ୍ ସମୟରେ ସଡ଼କ ପଥରେ ମୁଖ୍ୟମନ୍ତ୍ରୀ ନିଜ ଗାଁ ରାଇକଳାରେ ପହଞ୍ଚିଛନ୍ତି । ସେଠାରେ ମୁଖ୍ୟମନ୍ତ୍ରୀ ନିଜ ଘରେ ସମୟ ବିତାଇବା ପରେ ରାତି ୯ଟାରେ ସେଠାରୁ ବାହାରି ସଡ଼କ ପଥରେ କେନ୍ଦୁଝର ସର୍କିଟ୍ ହାଉସରେ ପହଞ୍ଚିବେ । ସେଠାରେ ରାତ୍ରୀ ଯାପନ ପରେ ଆସନ୍ତାକାଲି (ଶୁକ୍ରବାର) ସକାଳ ୮ଟା ୩୦ ମିନିଟରେ ପୁନର୍ବାର ନିଜ ଗାଁ ରାଇକଳାରେ ୯ଟା ସମୟରେ ପହଞ୍ଚିବେ । ସେଠାରେ ଘରୋଇ କାର୍ଯ୍ୟକ୍ରମରେ ଯୋଗଦେଇ ରାଇକଳାରୁ ଦିନ ୨ଟାରେ ବାହାରି କେନ୍ଦୁଝର ସର୍କିଟ୍ ହାଉସରେ ୨ଟା ୩୦ ମିନିଟରେ ପହଞ୍ଚିବେ । ମୁଖ୍ୟମନ୍ତ୍ରୀ ପୁନର୍ବାର ୩ଟା ୪୦ ମିନିଟରେ ସେଠାରୁ ବାହାରି ରାଇସୁଆଁ ଏଆର ଷ୍ଟ୍ରିପରେ ପହଞ୍ଚି ବିମାନ ଯୋଗେ ଭୁବନେଶ୍ୱର ଫେରିଯିବେ ।