ଢେଙ୍କାନାଳ: ଆସନ୍ତାକାଲି ରାଜ୍ୟରେ ତୃତୀୟ ପର୍ଯ୍ୟାୟ ନିର୍ବାଚନ ଅବସରରେ ଢେଙ୍କାନାଳ ଲୋକସଭା ଆସନ ଓ ଜିଲ୍ଲାର ୪ଟି ବିଧାନସଭା ଆସନ ପାଇଁ ଭୋଟ ଗ୍ରହଣ କରାଯିବ । ଢେଙ୍କାନାଳ ଜିଲ୍ଲାରେ ଲୋକସଭା ସହିତ ଢେଙ୍କାନାଳ, ହିନ୍ଦୋଳ, କାମାକ୍ଷାନଗର ଓ ପରଜଙ୍ଗ ବିଧାନସଭା ଆସନ ପାଇଁ ଭୋଟ ଗ୍ରହଣ କରାଯିବ । ସକାଳ ୭ଟାରୁ ସନ୍ଧ୍ୟା ୬ଟା ଯାଏଁ ଏହି ଭୋଟ ଗ୍ରହଣ କରାଯିବ ବୋଲି ସୂଚନା ରହିଛି । ଢେଙ୍କାନାଳ ଜିଲ୍ଲାରେ ମୋଟ ୯ଲକ୍ଷ ୭୨ହଜାର ୩୩ଜଣ ଭୋଟରଙ୍କ ପାଇଁ ୧୦୨୧ଟି ବୁଥ ପ୍ରସ୍ତୁତ କରାଯାଇଛି । ୧୦୨୧ ବୁଥକୁ ପୋଲିଂ ପାର୍ଟି ସବୁ ଇଭିଏମ ଓ ମତଦାନ ଉପକରଣ ନେଇ ପହଞ୍ଚି ସାରି ନିଜକୁ ପ୍ରସ୍ତୁତ କରୁଥିବା ଜଣାପଡିଛି ।
୯ ଲକ୍ଷ ୭୨ହଜାର ୩୩ଜଣ ଭୋଟରଙ୍କ ମଧ୍ୟରେ ୫ଲକ୍ଷ ୧ହଜାର ୪୪୩ ପୁରୁଷ ଭୋଟର ରହିଥିବା ବେଳେ ୪ଲକ୍ଷ ୭୦ହଜାର ୫୧୯ଜଣ ମହିଳା ଭୋଟର ଓ ୭୧ଜଣ ତୃତୀୟ ଲିଙ୍ଗ ଭୋଟର ରହିଛନ୍ତି । ଜିଲ୍ଲାର ଏହି ୪ଟି ବିଧାନସଭା ଓ ଢେଙ୍କାନାଳ ଲୋକସଭା ଆସନ ପାଇଁ ନିର୍ବାଚନ ମଇଦାନରେ ୧୦ଜଣ ସାଂସଦ ପ୍ରାର୍ଥୀଙ୍କ ସମେତ ୨୯ଜଣ ବିଧାୟକ ପ୍ରାର୍ଥୀ ମୋଟ ୩୯ଜଣ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା କରିବେ ଭୋଟର । ଏଥିପାଇଁ ଗତକାଲି ଠାରୁ ଜିଲ୍ଲାର ଢେଙ୍କାନାଳର ମହିଷାପାଟ ସ୍ଥିତ ଷ୍ଟ୍ରଙ୍ଗ ରୁମ, କାମାକ୍ଷାନଗର କଲେଜ ସ୍ଥିତ ଷ୍ଟ୍ରଙ୍ଗ ରୁମ ଓ ହିନ୍ଦୋଳ ହାଇସ୍କୁଲ ସ୍ଥିତ ଷ୍ଟ୍ରଙ୍ଗ ରୁମରୁ ପୋଲିଂ ପାର୍ଟି ମାନେ ଇଭିଏମ ଓ ଭିଭିପାଟ ସମେତ ମତଦାନ ଉପକରଣ ସବୁକୁ ଗ୍ରହଣ କରି ବୁଥ ଅଭିମୁଖେ ଯାଉଥିବା ଦେଖିବାକୁ ମିଳିଥିଲା ।
ଏହା ମଧ୍ୟ ପଢ଼ନ୍ତୁ... ରାତି ପାହିଲେ ଭୋଟ ଦେବ ସମ୍ବଲପୁର, ଲାଗିଲା 144 ଧାରା - Sec 144 Imposed In Sambalpur