କଟକ: ନବ ବିବାହିତା ମହିଳାଙ୍କ ସନ୍ଦେହ ଜନକ ମୃତ୍ୟୁ । ସ୍ବାମୀର ପରକ୍ରୀୟା ପ୍ରୀତିକୁ ବିରୋଧ କରିବାରୁ ନବବଧୂକୁ ହତ୍ୟା କରାଯାଇଥିବା ଅଭିଯୋଗ । ଏଭଳି ଏକ ଅଭାବନୀୟ ଘଟଣା ଘଟିଛି କଟକ ଜିଲ୍ଲା ତିଗିରିଆ ଥାନା ବନମାଳୀପୁର ଗାଁରେ । ମୃତକ ହେଲେ ତୁଳସୀ ରାଉତ । ସେପଟେ ହତ୍ୟା ଅଭିଯୋଗ ଆଣି ମୃତ ମହିଳାଙ୍କ ପରିବାର ଲୋକେ ତିଗିରିଆ ଥାନାରେ ଅଭିଯୋଗ କରିଛନ୍ତି ।
ବର୍ଷେ ତଳେ ବିବାହ କରିଥିଲେ ତୁଳସୀ:
ଗତ ଏକ ବର୍ଷ ତଳେ ତିଗିରିଆ ଥାନା ବନମାଳୀପୁର ଗାଁର ସନ୍ତୋଷ ଜେନାକୁ ବିବାହ କରିଥିଲେ ବାଙ୍କୀ ଥାନା ଅନ୍ତର୍ଗତ ପାଳପୁଟ ଗାଁର ତୁଳସୀ ରାଉତ । ବାପା ମା’ଙ୍କ ଏକମାତ୍ର ଅଲିଅଳି ଝିଅ ଥିଲେ ତୁଳସୀ । ତାଙ୍କୁ ବିବାହ ଦେଇ ବହୁ ଖୁସିଥିଲେ ବାପା ମା’ । ସବୁ କିଛି ଠିକଠାକ ଚାଲିଥିବା ବେଳେ ଗତକାଲି(ଶୁକ୍ରବାର) ରାତିରେ ତୁଳସୀଙ୍କ ଦେହ ଖରାପ ଥିବା ଖବର ଦେଇଥିଲେ ଜ୍ବାଇଁପୁଅ । ଖବର ପାଇ ପରିବାରଲୋକେ ଝିଅର ଶାଶୁ ଘରେ ପହଞ୍ଚି ଥିଲେ । ସେଠାରେ ଝିଅର ମୃତଦେହ ପଡିଥିବା ଦେଖିଥିଲେ । ଏଥିସହ ବେକରେ ଦାଗ ଥିବାରୁ ହତ୍ୟା କରାଯାଇଥିବା ସନ୍ଦେହରେ କଟକ ତିଗିରିଆ ଥାନାରେ ଲିଖିତ ଅଭିଯୋଗ କରିଛନ୍ତି ।
ପରକୀୟା ପ୍ରୀତିରୁ ହତ୍ୟା ସନ୍ଦେହ:
ମୃତ ମହିଳାଙ୍କ ପରିବାର ଲୋକଙ୍କ ଅଭିଯୋଗ ଅନୁଯାୟୀ, ଜ୍ବାଇଁପୁଅ ତାଙ୍କ ଭାଉଜ ସହ ପ୍ରେମ ସମ୍ପର୍କ ଥିବା ଜାଣିବାକୁ ପାଇଥିଲେ ତୁଳସୀ । ଏହାକୁ ନେଇ ସେ ବିରୋଧ କରୁଥିଲେ । ଏଥିପାଇଁ ତାଙ୍କୁ ନିର୍ଯାତନା ମଧ୍ୟ ଦିଆଯାଉଥିଲା । ପୂର୍ବରୁ ମାରି ଦେବାକୁ ଧମକ ମଧ୍ୟ ଦେଉଥିଲେ ।
| ଏହା ମଧ୍ୟ ପଢନ୍ତୁ: |