ନୟାଗଡ଼:ଖରିଫ ଧାନ କିଣା ପାଇଁ ନୟାଗଡ଼ ଜିଲ୍ଲାରେ ପ୍ରସ୍ତୁତି ଆରମ୍ଭ ହୋଇଛି । ଚଳିତ ବର୍ଷ ଡିସେମ୍ବର 29 ତାରିଖରୁ ଜିଲ୍ଲାର ୮ଟି ବ୍ଲକରେ ଧାନ ମଣ୍ଡି ଖୋଲିବ । ମଣ୍ଡିରେ ହେବନି ଏଥର କଟନି ଛଟନି । ଏଥିପାଇଁ ଚାଷୀଙ୍କୁ ମଣ୍ଡିରେ FAQ ମାନର ଧାନ ଦେବା ପାଇଁ ପଡ଼ିବ । ଏନେଇ ଜିଲ୍ଲାସ୍ତରୀୟ ଧାନ ସଂଗ୍ରହ ସମିତିର ବୈଠକରେ ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲଙ୍କ ସୂଚନା ଦେଇଛନ୍ତି ।
କିପରି ହେବ ଖରିଫ ଧାନ କିଣା ?
ଚଳିତବର୍ଷ ଚାଷୀମାନଙ୍କଠାରୁ କିପରି ଉଚିତ୍ ମୂଲ୍ୟରେ ଧାନ କିଣାଯାଇ ପାରିବ, ସେନେଇ ବୈଠକରେ ଆଲୋଚନା ହୋଇଛି । ମିଲର DRCS, ARCS ଏବଂ RMCର ସମ୍ପାଦକଙ୍କ ମାନେ ମଣ୍ଡି ପରିଚାଳନା ନେଇ ମତ ରଖିଥିଲେ । ଜିଲ୍ଲାରେ 167ଟି ଧାନ କ୍ରୟ କେନ୍ଦ୍ର ମାଧ୍ୟମରେ ଧାନ କ୍ରୟ ପାଇଁ 15 ଜଣ ମିଲର ପଞ୍ଜିକରଣ କରିଛନ୍ତି । ପ୍ରତ୍ୟେକ ଧାନ କ୍ରୟ କେନ୍ଦ୍ରରେ ଧାନ ରଖିବା ପାଇଁ ପିଣ୍ଡି , କୃଷକମାନେ ବସିବା ପାଇଁ ବିଶ୍ରାମସ୍ଥଳୀ ଏବଂ ପାନୀୟ ଜଳ ବ୍ୟବସ୍ଥା କରିବା ପାଇଁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି । ଗୁଣବତ୍ତା ଧାନ କ୍ରୟରେ କୌଣସି ପ୍ରକାର କଟନି ଛଟନି ହେବ ନାହିଁ ବୋଲି ଜିଲ୍ଲାପାଳ କଡା ନିର୍ଦ୍ଦେଶ ଦେଇଛନ୍ତି ।
ଏମିତି କହିଲେ ଜିଲ୍ଲାପାଳ:
ଏନେଇ ଜିଲ୍ଲାପାଳ ଅକ୍ଷୟ ସୁନିଲ ଅଗ୍ରୱାଲ କହିଛନ୍ତି ,"ଚଳିତବର୍ଷ ସରକାରଙ୍କ ନିଷ୍ପତି ଅନୁସାରେ କୃଷକମାନଙ୍କଠାରୁ କ୍ବିଣ୍ଟାଲ ପିଛା 31 ଶହ ଟଙ୍କାରେ ଧାନ କ୍ରୟ କରାଯିବା । ମଣ୍ଡିରେ କୃଷକମାନଙ୍କୁ ମୌଳିକ ସୁବିଧା ଯୋଗାଇ ଦିଆଯିବ । ପ୍ରତ୍ୟେକ ବ୍ଲକରେ ଚଳିତବର୍ଷ ଗୋଟିଏ ଗୋଟିଏ ମହିଳା ସ୍ୱୟଂ ସହାୟକ ଗୋଷ୍ଠୀ ଦ୍ୱାରା ପରୀକ୍ଷାମୂଳକ ଭାବେ ଧାନ କିଣିବା ପାଇଁ ନିଷ୍ପତି ହୋଇଛି । ମଣ୍ଡିରେ ସୁପରଭାଇଜର ନିୟୋଜିତ ହେବେ । ପ୍ରତ୍ୟେକ ତହସିଲଦାର ଧାନ କ୍ରୟ ପାଇଁ ନୋଡାଲ ଅଧିକାରୀ ଏବଂ ଉପଜିଲ୍ଲାପାଳ ଜିଲ୍ଲାର ନୋଡାଲ ଅଧିକାରୀ ଭାବେ କାର୍ଯ୍ୟ କରିବେ ।"