ରାୟଗଡ଼ା:ଘାରିଛି ଅଜଣା ଜନ୍ତୁ ଭୟ । କୌଣସି ଅଜଣା ଜନ୍ତୁ ମେଣ୍ଢା କଲିଜା ଖାଉଥିବା ନେଇ ଅଭିଯୋଗ ଆଣିଛନ୍ତି ସ୍ଥାନୀୟବାସିନ୍ଦା । ବର୍ତ୍ତମାନସୁଦ୍ଧା ୫ଟି ମେଣ୍ଢାଙ୍କ ମୃତ୍ୟୁ ହୋଇଥିବାବେଳେ ୩ ଟି ମେଣ୍ଢା ଗୁରୁତର ଅଛନ୍ତି । ଯାହାକୁ ନେଇ ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସୁନାଖଣ୍ଡି ପଞ୍ଚାୟତ ନନ୍ଦିନି ଗାଁରେ ଭୟର ବାତାବରଣ ଖେଳିଯାଇଛି । ସଞ୍ଜ ନଇଁଲେ ଗାଁରେ ତାଟି କବାଟ ପଡୁଛି । ଗୋଟିଏ କି ଦୁଇଟି ନୁହଁ ଆଠ ଆଠଟି ମେଣ୍ଢାଙ୍କୁ ଅଜଣା ଜନ୍ତୁ ଆକ୍ରମଣ କରୁଥିବା ନେଇ ଅଭିଯୋଗ ହୋଇଛି ।
ସୂଚନା ଅନୁସାରେ, ଏହି ଗାଁର ଗୋଟିଏ ଆଦିବାସୀ ପରିବାରରେ ଏଭଳି ଘଟଣା ଘଟିଛି । ଗଙ୍ଗାଧର କାଡ୍ରକା ନାମକ ଜଣେ ବ୍ୟକ୍ତିଙ୍କ ୫ଟି ମେଣ୍ଢାକୁ ଅଜଣା ଜନ୍ତୁ ଖାଇଥିବା ଅଭିଯୋଗ ହୋଇଛି । କଲିଜା ବାହାର କରି ଖାଇ ଅଧା ଖଣ୍ଡିଆ କରି ଫିଙ୍ଗି ଦେଇଥିବା ଦେଖିବାକୁ ମିଳିଛି । ସେହି ଅଜଣା ଜନ୍ତୁ ୩ ଟି ମେଣ୍ଡାକୁ ଆକ୍ରମଣ କରି ଖଣ୍ଡିଆ ଖାବେରା କରି ଅସୁସ୍ଥ କରିଥିବା ନେଇ ଅଭିଯୋଗ ଆଣିଛନ୍ତି ଅଞ୍ଚଳବାସୀ । ପୂର୍ବରୁ ଗଙ୍ଗାଧରଙ୍କ ୧୦ଟି ମେଣ୍ଡାକୁ କୌଣସି ଅଜଣା ଜନ୍ତୁ ଆକ୍ରମଣ କରି ମାରି ଦେଇଥିବାବେଳେ ପୁଣି ଥରେ ଘଟଣାର ପୁନରାବୃତ୍ତି ହୋଇଥିବା ନେଇ ସେ ଅଭିଯୋଗ ଆଣିଛନ୍ତି । ଗଙ୍ଗାଧରଙ୍କ ଗୁହାଳରୁ ପୁଣିଥରେ ୫ଟି ମେଣ୍ଡାକୁ କୌଣସି ଜନ୍ତୁ ଆକ୍ରମଣ କରିବା ସହ ମାରି ଦେଇଥିବା ଅଭିଯୋଗ ହୋଇଛି ।