ଭୁବନେଶ୍ବର: କଳାହାଣ୍ଡି ଫରେଷ୍ଟର ଜୀବନ ହାରିବା ଘଟଣା । ଏନେଇ ଜଙ୍ଗଲ ଏବଂ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆଙ୍କ ପ୍ରତିକ୍ରିୟା ସାମନାକୁ ଆସିଛି । ମନ୍ତ୍ରୀ କହିଛନ୍ତି, "ମାମଲା ଏବେ ବିଚାରାଧୀନ ଅଛି । ବିଭାଗ ମଧ୍ୟ ତଦନ୍ତ କରୁଛି । ଡିଏଫଓ ନିଲମ୍ବିତ ହୋଇଛନ୍ତି । ତଦନ୍ତ କରି ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ । ଏହି ଘଟଣା ଜ୍ୱଳନ୍ତ ଉଦାହରଣ ହେବ।"
ଚାରା ଉପହାର ଦେଲେ ମନ୍ତ୍ରୀ:
ଗୃହ ପ୍ରବେଶ ବେଳେ ଜଙ୍ଗଲ ଓ ପରିବେଶ ମନ୍ତ୍ରୀଙ୍କ ନିଆରା ପ୍ରୟାସ । ଅତିଥି ମାନଙ୍କୁ ଗଛ ଉପହାର ଦେଇ ପରିବେଶ ସୁରକ୍ଷାର ବାର୍ତ୍ତା ଦେଇଛନ୍ତି ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ । ଆଜି ନିଜ ସରକାରୀ ବାସଭବନରେ ଗୃହ ପ୍ରବେଶ କରୁଛନ୍ତି ଜଙ୍ଗଲ ଏବଂ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆ । ଏହି ଅବସରରେ ଆସିଥିବା ଅତିଥିମାନଙ୍କୁ ଗଛ ଚାରା ଉପହାର ଦେଇଛନ୍ତି ମନ୍ତ୍ରୀ । ଗୃହ ପ୍ରବେଶ ଉତ୍ସବରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓଙ୍କ ସମେତ ବିଭିନ୍ନ ବିଭାଗର ମନ୍ତ୍ରୀ ଓ ବିଧାୟକମାନେ ଯୋଗଦେଇଥିଲେ । ତେବେ କଳାହାଣ୍ଡି ଫରେଷ୍ଟର ମୃତ୍ୟୁ ଘଟଣାକୁ ନେଇ ଜଙ୍ଗଲ ଏବଂ ପରିବେଶ ମନ୍ତ୍ରୀ ଗଣେଶ ରାମ ସିଂ ଖୁଣ୍ଟିଆଙ୍କ ପ୍ରତିକ୍ରିୟା ରଖି ତଦନ୍ତ ଚାଲିଥିବା କହିଛନ୍ତି।
କ'ଣ ଥିଲା ପୂରା ଘଟଣା ?
ସୂଚନା ଅନୁସାରେ, ଗତ ସେପ୍ଟେମ୍ବର ୧୮ତାରିଖରେ କଳାହାଣ୍ଡି ଜିଲ୍ଲା ଜାରିଙ୍ଗ ସିଲଭି କଲଚର ଫରେଷ୍ଟର ସଞ୍ଜୟ ନାୟକଙ୍କ ମୃତଦେହ ଭବାନୀପାଟଣା ସ୍ଥିତ ସରକାରୀ ବାସଭବନରୁ ସନ୍ଦେହଜନକ ଅବସ୍ଥାରେ ମିଳିଥିଲା । ମୃତଦେହ ନିକଟରୁ ପୋଲିସ ଏକ ସୁଇସାଇଡାଲ୍ ନୋଟ୍ ମଧ୍ୟ ଜବତ କରିଥିଲା । ଏଥିରେ ରାୟଗଡ଼ା DFO ଦେବେନ୍ଦ୍ର ବେହେରା ସଞ୍ଜୟଙ୍କୁ ମାନସିକ ନିର୍ଯାତନା ଦେଉଥିବା ସହ ବାରମ୍ବାର ପିସି ମାଗିବା ପରେ ତାଙ୍କୁ ବଲାଙ୍ଗୀରକୁ ବଦଳି କରିଦେଇଥିବା ପରିବାର ସଦସ୍ୟ ଅଭିଯୋଗ କରିଥିଲେ । ଏନେଇ ଡିଏଫଓ ଦେବେନ୍ଦ୍ରଙ୍କ ବିରୋଧରେ ମୃତ ଫରେଷ୍ଟରଙ୍କ ଭାଇ ଭବାନୀପାଟଣା ଟାଉନ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ତଦନ୍ତ ଆରମ୍ଭ କରିଥିଲା ।
ଫେରାର ଥିଲେ DFO!
ମୃତକଙ୍କ ପରିବାର ପକ୍ଷରୁ ହୋଇଥିବା ଅଭିଯୋଗ ଅନୁଯାୟୀ, ପୋଲିସ DFO ଦେବେନ୍ଦ୍ର ବେହେରାଙ୍କୁ ଥାନାରେ ହାଜର ହେବାକୁ ପାଇଁ ସମନ କରିଥିଲା । ମାତ୍ର DFO ପୋଲିସକୁ ସହଯୋଗ କରିବା ପରିବର୍ତ୍ତେ ଫେରାର ହୋଇଯାଇଥିଲେ । ପରେ DFO ହାଇକୋର୍ଟରେ ଆଗୁଆ ଜାମିନ ଆବେଦନ କରିଥଲେ । ହେଲେ କୋର୍ଟ ବେଲ୍ ପିଟିସନକୁ ଖାରଜ କରିବା ସହ ପୋଲିସକୁ ତଦନ୍ତରେ ସହଯୋଗ କରିବା ପାଇଁ ନିର୍ଦ୍ଦେଶ ଦେଇଥିଲେ ।
ଇଟିଭି ଭାରତ, ଭୁୁବନେଶ୍ବର
