ଅନୁଗୋଳ: ସାଧାରଣ ନିର୍ବାଚନ ଯେତିକି ପାଖେଇ ଆସୁଛି ପ୍ରଶାସନର ପ୍ରସ୍ତୁତି ସେତିକି ଆଗେଇ ଚାଲିଛି । ଅନୁଗୋଳ ଜିଲ୍ଲାରେ ଆଗାମୀ ନିର୍ବାଚନକୁ ନେଇ ଜିଲ୍ଲା ପ୍ରଶାସନ ତରଫରୁ ଭୋଟର ମାନଙ୍କୁ ବ୍ୟାପକ ସଚେତନ କରାଯାଉଛି । ମୁଖ୍ୟ ନିର୍ବାଚନ କମିଶନଙ୍କ ନିର୍ଦ୍ଦେଶ କ୍ରମେ ଗତ ଜାନୁଆରୀ ୧୦ ତାରିଖ ଠାରୁ ଫେବୃଆରୀ ୨୯ ତାରିଖ ପର୍ଯ୍ୟନ୍ତ ପ୍ରତ୍ୟେକ ମତଦାନ କେନ୍ଦ୍ରରେ ଭୋଟର ମାନଙ୍କୁ କିଭଳି ଇଭିଏମରେ ନିର୍ଭୁଲ ଭାବେ ଭୋଟ ଦେଇ ପାରିବେ ସେଥିପାଇଁ ସଚେତନ କରାଯାଉଛି । ଏହି ମକ୍ ପୋଲିଂ ପ୍ରତି ନୂଆ କରି ଭୋଟ ଦେବାକୁ ଥିବା ଭୋଟର ମାନଙ୍କ ଆଗ୍ରହ ବଢୁଥିବାର ଦେଖିବାକୁ ମିଳୁଛି ।
ଗତ ୨୦୧୯ ମସିହାରେ ଭୋଟରମାନେ ଇଭିଏମରେ ଭୋଟ ଦେଇଥିଲେ । ଏହା ମଧ୍ୟରେ ୫ ବର୍ଷ ବିତି ଯାଇଛି । ତେଣୁ ବହୁ ବୟସ୍କ ଭୋଟର ଇଭିଏମରେ ଭୋଟ ଦେବା ଭୁଲି ଯାଇ ଥାଇ ପାରନ୍ତି । ଏହାଛଡା ନୂତନ ଭୋଟର ମାନେ ମଧ୍ୟ ଇଭିଏମରେ ଭୋଟ ଦେବା ଜାଣି ନାହାନ୍ତି । ଅନେକ ଭୋଟରଙ୍କ ମନରେ ନିଜର ମନ ପସନ୍ଦର ପ୍ରାର୍ଥୀଙ୍କୁ ଭୋଟ ଯାଇଛି କି ନାହିଁ ସନ୍ଦେହ ରହୁଛି । ଭୋଟର ମାନଙ୍କ ଏଭଳି ଦ୍ଵନ୍ଦ ଗୁଡିକୁ ଦୂର କରିବାକୁ ମୁଖ୍ୟ ନିର୍ବାଚନ କମିଶନ ଏଭଳି ପଦକ୍ଷେପ ଗ୍ରହଣ କରିଛନ୍ତି । ପ୍ରତ୍ୟେକ ମତଦାନ କେନ୍ଦ୍ରର ନିର୍ବାଚନ ଦାୟିତ୍ବରେ ଥିବା କର୍ମଚାରୀମାନେ ଯାଇ ଭୋଟର ମାନଙ୍କୁ ସଚେତନ କରାଉଛନ୍ତି । ଇଭିଏମ ମେସିନ ନେଇ ଜଣ ଜଣଙ୍କୁ କିଭଳି ଭୋଟ ଦିଆଯିବ ତାହା ଶିଖାଉଛନ୍ତି । ମେସିନରେ କେଉଁ ବଟନ ଦବାଇବେ, ଅନ୍ୟ ଏକ ମେସିନରେ ସେମାନେ ଦେଇଥିବା ଚିହ୍ନ ଦେଖି ପାରିବେ ଇତ୍ୟାଦି ଭୋଟର ମାନଙ୍କୁ ଦେଖାଇ ସଚେତନ କରାଉଛନ୍ତି । ଜିଲ୍ଲାର ବିଭିନ୍ନ ମତଦାନ କେନ୍ଦ୍ରରେ ହେଉଥିବା ଏହି ସଚେତନତା କାର୍ଯ୍ୟକ୍ରମରେ ବହୁ ବୟସ୍କ ଓ ନୂତନ ଭୋଟରମାନେ ଆସି ଯୋଗ ଦେଉଛନ୍ତି ।
ଏହା ମଧ୍ୟ ପଢନ୍ତୁ ... ରାଜ୍ୟରେ ୩.୩୨ କୋଟି ଭୋଟର: ୭.୫୪ ଲକ୍ଷ ଯୁବ, ବଢ଼ିଲା ମହିଳାଙ୍କ ଅନୁପାତ