ଜେଲରୁ ମୁକ୍ତ ହୋଇ ସୁଦ୍ଧା ଘରଠୁ ଦୂରରେ, ଠିକଣା ହଜାଇଥିବା ଜଣେ ବନ୍ଦୀର କାହାଣୀ...

ଗିରଫଦାରୀ ବେଳେ ପୋଲିସର ବେପରୁଆ କାର୍ଯ୍ୟାନୁଷ୍ଠାନ ପାଇଁ ମିଳୁନି ଠିକଣା ? କିଏ ଦାୟୀ ? ସମ୍ବଲପୁରରୁ ବାଦଶାହ ଯୁଷ୍ମନ ରାଣାଙ୍କ ରିପୋର୍ଟ ।

ସମ୍ବଲପୁର:କଫ୍‌ ସିରପ ମାମଲାରେ ଗିରଫ ହୋଇ ଜେଲ ଯାଇଥିଲେ । ହେଲେ ଜାମିନ୍‌ ପାଇ ମୁକ୍ତ ହେବା ପରେ ବି ଘରକୁ ଫେରି ପାରୁନାହାନ୍ତି । ମାନସିକ ସ୍ଥିତି ଠିକ ନଥିବା କାରଣରୁ ଘର ଠିକଣା ମଧ୍ୟ ମନେ ପଡୁନି । ହେଲେ ଗିରଫଦାରୀ ସମୟରେ ପୋଲିସ୍‌ ମଧ୍ୟ ତ୍ରୁଟିପୂର୍ଣ୍ଣ ଠିକଣା ପଞ୍ଜୀକୃତ କରିଥିଲା । ତେଣୁ ସରକାରୀ ରେକର୍ଡରୁ ଏବେ ତାଙ୍କ ଠିକଣା ଚିହ୍ନଟ କରି ଘରକୁ ପଠାଇବା ଅନିଶ୍ଚିତତା ମଧ୍ୟକୁ ଠେଲି ହୋଇଯାଇଛି । ଫଳରେ ଜିଲ୍ଲା ପ୍ରଶାସନର ସହାୟତାରେ 'ସମର୍ଥ' ନାମକ ଏକ ଆଶ୍ରମରେ କଟୁଛି ଜୀବନ । ଏ କାହାଣୀ ହେଉଛି, ପୋଲିସ ପ୍ରଶାସନର ବେପରୁଆ କାର୍ଯ୍ୟଶୈଳୀରେ ଛନ୍ଦି ହୋଇଥିବା ଜଣେ ମାନସିକ ଭିନ୍ନକ୍ଷମ ଅଭିଯୁକ୍ତ ଜାବୀରଙ୍କର । ଏବେ ପ୍ରଶ୍ନ ଉଠୁଛି, ଏ ତ୍ରୁଟି ପାଇଁ ଦାୟୀ କିଏ ।

• କାହିଁକି ଗିରଫ ହୋଇଥିଲେ ଜାବୀର ?

ଜେଲ କର୍ତ୍ତୃପକ୍ଷଙ୍କ ସୂଚନା ଅନୁସାରେ, 2019 ମସିହା ଜୁଲାଇ 16 ତାରିଖରେ ଧନୁପାଲି ପୋଲିସ କେତୋଟି ବେଆଇନ କଫ ସିରପ୍ ଚାଲାଣ ଅଭିଯୋଗରେ ଜାବୀରଙ୍କୁ ଗିରଫ କରିଥିଲା । ଜାବୀର ସତ୍ତାରଙ୍କର ପିତା-ମହମ୍ମଦ ରେହମାନ, ଘର-ଅଘୋରା, ଥାନା-ସୋନୁଆ, ଜିଲ୍ଲା- ରାଞ୍ଚି, ରାଜ୍ୟ – ଝାଡ଼ଖଣ୍ଡ । ଗତ 17.07.2019 ତାରିଖରୁ ସମ୍ବଲପୁର ମଣ୍ଡଳ କାରାଗାରରେ ST Case No-8/2020, u/s- 274/275 IPC (GR case no 2307/2019) ସମ୍ବଲପୁର ଅତିରିକ୍ତ ସତ୍ର ନ୍ୟାୟାଧିଶଙ୍କ ନିର୍ଦ୍ଦେଶକ୍ରମେ ରହିଆସୁଥିଲେ ।

• ଏବେ କେମିତି ଅଛନ୍ତି ଜାବୀର ?

ବର୍ତ୍ତମାନ ଜାବୀରଙ୍କ ମାନସିକ ସ୍ଥିତି ସ୍ୱାଭାବିକ ନାହିଁ । ଫଳରେ ସେ ତାଙ୍କର ଘରର ଠିକଣା ସଠିକ ଭାବେ କହି ପାରୁନାହାନ୍ତି । ଦୀର୍ଘ ଦିନ ହେଲା ତାଙ୍କୁ ଜାମିନଦାର ମିଳୁନଥିଲେ । ଏହି ଘଟଣା ନେଇ ସମ୍ବଲପୁରର ‘Legal Aid Defence Council’ର ମୁଖ୍ୟ ଦୁଷ୍ମନ୍ତ ବେହେରା କହିଛନ୍ତି, "ନିୟମ ଅନୁସାରେ, ଏଭଳି ସ୍ଥିତିରେ ସେହି କ୍ଷେତ୍ରରେ ଜେଲ ଅଧୀକ୍ଷକ, DLSA, ଜିଲ୍ଲାପାଳଙ୍କ ମିଳିତ ପ୍ରଚେଷ୍ଟାରେ ଯେଉଁ ଆଶ୍ରୟସ୍ଥଳଗୁଡିକ ଅଛି ସେଠାରେ ତାଙ୍କୁ ରଖାଯିବ । ପ୍ରଥମେ ଚେଷ୍ଟା କରାଯିବ ତାଙ୍କ ନିଜ ଲୋକ କିଏ ଅଛନ୍ତି, ତାଙ୍କୁ ଦିଆଯିବ । ଯଦି ନାହିଁ ଏହି ସବୁ ଯେଉଁ ଏନଜିଓ ଗୁଡିକ ଅଛି ସେମାନଙ୍କ ଜରିଆରେ ତାଙ୍କୁ ଜେଲରୁ ବାହାର କରାଯାଇ ଆଶ୍ରୟସ୍ଥଳୀରେ ରଖାଯିବାର ବ୍ୟବସ୍ଥା ଓ ତାର ଚିକିତ୍ସା ପାଇଁ ଚେଷ୍ଟା କରାଯିବ l ଏସବୁ ପ୍ରାବଧାନ ଅଛି l"

• ତ୍ରୁଟିପୂର୍ଣ୍ଣ ଠିକଣା:

ଆଇନ ସେବା ପ୍ରତିପକ୍ଷ ଓକିଲ ଦୁଷ୍ମନ୍ତ ବେହେରା ଆହୁରି କହିଛନ୍ତି, "ଏହି ଘଟଣାରେ ତଦନ୍ତକାରୀ ଅଫିସର ଯିଏ ଥିଲେ ସେ ତ୍ରୁଟିପୂର୍ଣ୍ଣ ଠିକଣା ଦାଖଲ କରିଛନ୍ତି । ଫଳରେ ଜାବୀରଙ୍କ ଘର ଲୋକଙ୍କୁ ଠାବ କରାଯାଇପାରୁନାହିଁ । ଯଦି ତଦନ୍ତକାରୀ ଅଧିକାରୀ ସଠିକ ଠିକଣା ଦେଇଥାନ୍ତେ ଘର ଲୋକଙ୍କୁ ଆଣି ତାଙ୍କୁ ହସ୍ତାନ୍ତର କରାଯାଇପାରିଥାନ୍ତା । ଠିକଣା ନଥିବାରୁ, ଜେଲ ଅଧୀକ୍ଷକ ଜିଲ୍ଲା ପ୍ରଶାସନ, DLSA ସମସ୍ତେ ଚେଷ୍ଟା କରିକି ତାଙ୍କର ଉତ୍ତମ ବ୍ୟବସ୍ଥା କରାଯାଇଛି l ଜାବୀରଙ୍କ ବେଲ ବହୁତ ଦିନ ପୂର୍ବରୁ ହୋଇଯାଇଥିଲା । କେହି ଜଣେ ଜେଲ ଅନ୍ତେବାସୀ ଆସିଥିଲେ ଜଣେ ଜାମିନଦାରକୁ ଆଣି ଏବଂ ସେ ତାଙ୍କୁ ଜାମିନରେ ନେଇଥିଲେ l ସେଥିପାଇଁ ତାଙ୍କୁ ଆଶ୍ରମରେ ରଖାଯାଇଛି । ଜାବୀର ମୁକୁଳିବା ପାଇଁ ଜଣେ ଜେଲ ଅନ୍ତେବାସୀ ତାଙ୍କୁ ସହାୟତା କରିଥିଲେ l "

sambalpur prisoner unable to return home (ETV Bharat Odisha)

• ଜେଲରେ ବିଗିଡିଥିଲା ମାନସିକ ସ୍ଥିତି:-

ଜେଲରେ ଥିବାବେଳେ ଜାବୀର ସତ୍ତାର ଭଲଭାବେ କଥାବାର୍ତ୍ତା କରିପାରୁନଥିଲେ । କାହା ସହିତ ବାର୍ତ୍ତାଳାପ ସମୟରେ ସେ କ'ଣ କହୁଥିଲେ କିଛି ବୁଝି ହେଉନଥିଲା । ସେ ମାନସିକ ସ୍ତରରେ ଦୁର୍ବଳ ଥିଲେ । କିନ୍ତୁ କାରାଗାରରେ ତାର ଆଚରଣ ବ୍ୟବହାର ଉତ୍ତମ ଥିଲା । 20 ଅଗଷ୍ଟ 2019 ରେ ତାଙ୍କର ଚାର୍ଜସିଟ ଦାଖଲ ହୋଇଥିଲା । କିଛି ଦିନ ପରେ ତାଙ୍କୁ ଜାମିନର ପ୍ରାବଧାନ ଥିଲେ ମଧ୍ୟ ପରିବାର ଲୋକ କେହି ନଥିବାରୁ ତାଙ୍କୁ ଜାମିନଦାର ମିଳିନଥିଲେ । ଏହାପରେ ସେ ଜେଲରେ ବିଚାରଧୀନ କଏଦୀ ଭାବେ ରହିଲେ । ପରବର୍ତ୍ତୀ ସମୟରେ ତାଙ୍କ ମାନସିକ ସ୍ଥିତି ସ୍ୱାଭାବିକ ନଥିବା ଜଣାପଡିଥିଲା । ତେଣୁ 2022-23ରେ ପିଆର ବଣ୍ଡରେ ମଧ୍ୟ ତାଙ୍କର ବେଲ ହୋଇପାରିଲା ନାହିଁ l ଏହି ସମୟ ମଧ୍ୟରେ ଜେଲରେ ତାଙ୍କର ମାନସିକ ରୋଗରେ ଚିକିତ୍ସା ଜାରି ରହିଥିଲା । ସେ କେତେକ ମେଡ଼ିସିନ ମଧ୍ୟ ଖାଉଥିଲେ । କୋର୍ଟଙ୍କ ନିର୍ଦ୍ଦେଶ ଅନୁସାରେ, ପ୍ରତ୍ୟେକ ମାସ ତାଙ୍କର ମାନସିକ ସ୍ଥିତିର ମେଡିକାଲ ରିପୋର୍ଟ କୋର୍ଟରେ ଦାଖଲ କରାଯାଉଥିଲା । ଜେଲର ଜଣେ ବରିଷ୍ଠ ଅଧିକାରୀଙ୍କ ତରଫରୁ ମିଳିଥିବା ସୂଚନା ଅନୁସାରେ ରିପୋର୍ଟରେ ଏହା ଉଲ୍ଲେଖ ରହୁଥିଲା ଯେ ମାନସିକ ସ୍ଥିତି ସ୍ବାଭାବିକ ଅଛି, ମେଡିସିନ ଜାରି ରହିଛି l ଏମିତି 4 ବର୍ଷ ବିତିଗଲା ।

sambalpur prisoner unable to return home (ETV Bharat Odisha)

ଏହା ବି ପଢନ୍ତୁ...

ସମ୍ବଲପୁର ସର୍କଲ ଜେଲର ଜଣେ ବରିଷ୍ଠ ଅଧିକାରୀ ନିଜ ପରିଚୟ ଗୁପ୍ତ ରଖି ସୂଚନା ଦେଇଛନ୍ତି ଯେ, ଜେଲ କର୍ତ୍ତୃପକ୍ଷ ଜାବୀର ସତ୍ତାରଙ୍କ ଚାର୍ଜସିଟରେ ଉଲ୍ଲେଖ ଥିବା ଠିକଣାରେ 2023 ଡିସେମ୍ବର ମାସରୁ ୱାରଲେସ ଓ ଚିଠି ଜରିଆରେ ଯୋଗାଯୋଗ ସ୍ଥାପନା କରିବାକୁ ଚେଷ୍ଟା କରିଥିଲେ, ତେବେ ଚିଠି ଫେରି ଆସିଥିଲା l ଏହି ସମସ୍ୟା ନେଇ ଜେଲ କର୍ତ୍ତୃପକ୍ଷ ଜେଲ ଡିଜିଙ୍କୁ ପ୍ରତ୍ୟେକ ମାସ ରିପୋର୍ଟ ଦେଇ ଆସୁଥିଲେ l ଏଭଳି ସ୍ଥିତିରେ ଠିକଣାରୁ ଚିଠି ଫେରି ଆସିବା ପରେ ରାଜ୍ୟ ଜେଲ ଡିଜି 2 ଜଣ ଅଧିକାରୀଙ୍କୁ ଝାଡଖଣ୍ଡକୁ ଖୋଳତାଡ଼ କରିବାକୁ ପଠାଇବାକୁ ନିର୍ଦ୍ଦେଶ ଦେଇଥିଲେ । ଏହି ନିର୍ଦ୍ଦେଶ ଅନୁସାରେ ସମ୍ବଲପୁର ଜେଲର ଆସିସଷ୍ଟଣ୍ଟ ଜେଲର ଦିଗାମ୍ବର ଅଢା ଓ ୱାଡାର ଦିଲ୍ଲୀପ କୁମାର ମଠାଙ୍କୁ ଗତ 08 ଡିସେମ୍ବର 2024ରେ ଜାବୀରଙ୍କ ଠିକଣା ଖୋଜିବାକୁ ଝାଡଖଣ୍ଡର ରାଞ୍ଚିକୁ ପଠାଯାଇଥିଲା । ଏହି 2 ଜେଲ ଅଫିସର 8 ଡିସେମ୍ବର 2024ରେ ସକାଳେ ରାଞ୍ଚି ପହଞ୍ଚିଥିଲେ । ସକାଳ 9ଟାରେ ସେମାନେ ରାଞ୍ଚି ସ୍ଥିତ SSP ଅଫିସକୁ ଯାଇ ଥାନା ଅଧିକାରୀଙ୍କ ଭେଟିଥିଲେ । ଏହି ଘଟଣା ନେଇ ସୂଚନା ଦେବା ପରେ ତାଙ୍କୁ ସହାୟତା ପାଇଁ 2 ଜଣ ସ୍ଥାନୀୟ ପୋଲିସ ଅଧିକାରୀଙ୍କୁ ପଠାଗଲା l

ଜେଲରୁ ମୁକ୍ତ ହୋଇ ସୁଦ୍ଧା ଘରଠୁ ଦୂରରେ, ଠିକଣା ହଜାଇଥିବା ଜଣେ ବନ୍ଦୀର କାହାଣୀ (ETV Bharat Odisha)

• କ'ଣ ଥିଲା ଜାବୀରଙ୍କ ଠିକଣା ?

ଜାବୀରଙ୍କ ପ୍ରଦତ୍ତ ଠିକଣାରେ ଘର - ଅଘୋରା, ଥାନା - ସୋନୁ , ଜିଲ୍ଲା - ରାଞ୍ଚି ଲେଖା ଥିବାବେଳେ ପ୍ରଥମେ ସେମାନେ ରାଞ୍ଚି ଜିଲ୍ଲାର ଅରଘୋରା ନାମକ ଏକ ପୋଲିସ ଷ୍ଟେସନ ଯାଇଥିଲେ । ଦିନ 10ଟାରୁ ସନ୍ଧ୍ୟା 6 ଟା ପର୍ଯ୍ୟନ୍ତ ସେହି ପୋଲିସ ଷ୍ଟେସନ ଅଞ୍ଚଳରେ ସେମାନେ ଖୋଜାଖୋଜି କରିଥିଲେ । ତେବେ ସେମାନେ କୌଣସି ଠିକଣା ପାଇନଥିଲେ l ସେହି ଥାନା ଅନ୍ତର୍ଗତ ବିଭିନ୍ନ ସ୍ଥାନରେ ଖୋଜାଖୋଜି କରିଥିଲେ ବି କୌଣସି ଲାଭ ମିଳିନଥିଲା । ସନ୍ଧ୍ୟା 6 ଟା ପରେ ସେମାନେ ପଶ୍ଚିମ ସିଂହଭୂମର ସୋନୁଆ ପୋଲିସ ଷ୍ଟେସନକୁ ଯାଇଥିଲେ । ସେଠାରେ ସେମାନେ ରାତି 11ଟା ପର୍ଯ୍ୟନ୍ତ ଖୋଜାଖୋଜି କରିଥିଲେ ତେବେ ହେଲେ ଠିକଣା ଜଣାପଡିନଥିଲା । SSP କାର୍ଯ୍ୟାଳୟ ପକ୍ଷରୁ ଏକ ଚିଠି କରାଗଲା ଯେ ଏହି ପ୍ରକାର ଠିକଣା ମିଳିନାହିଁ, ଆଗକୁ ଏହିଭଳି ଠିକଣା ମିଳିଲେ ତୁରନ୍ତ ସୂଚନା ଦିଆଯିବ । ପରେ ଉଭୟ ଜେଲ ଅଧିକାରୀ ସମ୍ବଲପୁର ଫେରି ଆସିଥିଲେ । ପରେ ଜିଲ୍ଲାପାଳ ଓ ଜିଲ୍ଲା ଆଇନ ସେବା ପ୍ରାଧିକରଣଙ୍କ ସହ ଏନେଇ ଆଲୋଚନା କରିଥିଲେ ଜେଲ କର୍ତ୍ତୃପକ୍ଷ ।

sambalpur prisoner unable to return home (ETV Bharat Odisha)

• ଜାବୀରଙ୍କ ମାନସିକ ସ୍ଥିତି ଏବେ କେମିତି ?

ଗତ 13 ଡିସେମ୍ବର 2024ରେ ତାଙ୍କୁ ଜେଲରୁ ମୁକ୍ତ କରିବାକୁ କୋର୍ଟ ନିର୍ଦ୍ଦେଶ ଦେଇଥିଲେ । 14 ଡିସେମ୍ବର 2024ରୁ ସେ ଜେଲରୁ ମୁକ୍ତ ହେଲେ । ତାଙ୍କର ମାନସିକ ସ୍ଥିତି ସ୍ୱାଭାବିକ ନଥିବାରୁ ତାଙ୍କୁ ଉଭୟ ପୋଲିସ ଓ କାରାଗାର କର୍ମଚାରୀଙ୍କ ସହଯୋଗରେ 'ସମର୍ଥ' ନାମକ ଏକ ସଂସ୍ଥାକୁ ହସ୍ତାନ୍ତର କରାଯାଇଥିଲା । ଅନ୍ୟପଟେ ଜାବୀର ସତ୍ତାର ଜେଲରେ ଥିବାବେଳେ ତାଙ୍କୁ ଚିକିତ୍ସା କରିବାକୁ ଦାୟିତ୍ୱରେ ଥିବା ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟର ମାନସିକ ରୋଗ ବିଶେଷଜ୍ଞ ଡାକ୍ତର ଚିତ୍ତରଞ୍ଜନ ମହାପାତ୍ର କହିଛନ୍ତି, "ସେ କିଛି କଥା କହି ପାରନ୍ତିନି, ତାଙ୍କର ଭାଷଗତ ସମସ୍ୟା ରହେ l ସେ କେଉଁ ଭାଷା କୁହେ ଜାଣି ହୁଏନାହିଁ । ହେଲେ ଅନ୍ୟ ଆଚରଣ ସ୍ବାଭାବିକ ଥିଲା । ତାଙ୍କୁ ବୁର୍ଲା ମେଡିକାଲରୁ ମେଡିସିନ ପ୍ରେସକ୍ରାଇବ କରାଯାଇଥିଲା, ସେ ଅଳ୍ପ କିଛି ମେଡିସିନ ଖାଉଥିଲେ l ହେଲେ ତାଙ୍କ ମାନସିକ ସ୍ଥିତିରେ ସେତେଟା ସୁଧାର ଆସିନଥିଲା ।"

ସମ୍ବଲପୁରରୁ ବାଦଶାହ ଯୁଷ୍ମନ ରାଣା, ଇଟିଭି ଭାରତ