କୋରାପୁଟ: ନିର୍ବାଚନ ତାରିଖ ପାଖେଇ ଆସୁଥିବା ବେଳେ ଆଜି ଦକ୍ଷିଣ ଓଡିଶାରେ ଦଳୀୟ ପ୍ରାର୍ଥୀ ପାଇଁ ପ୍ରଚାର ମଇଦାନକୁ ଓହ୍ଲାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କୋରାପୁଟ, ନବରଙ୍ଗପୁର, ରାୟଗଡା ଏବଂ ଗଜପତି ଗସ୍ତରେ ଯାଇ ନିର୍ବାଚନ ପ୍ରଚାର କରିବାକୁ ଥିବା ବେଳେ ପ୍ରଥମେ କୋରାପୁଟ ଗସ୍ତ କରିଥିଲେ ନବୀନ । ଆଜି ସକାଳେ ପ୍ରଥମେ ଭୁବନେଶ୍ବରୁ ବିମାନ ଯୋଗେ ଭୁବନେଶ୍ବରରୁ ବାହାରି ଜୟପୁର ବିମାନବନ୍ଦରରେ ଅବତରଣ କରିଥିଲେ । ସେଠାରୁ ହେଲିକପ୍ଟର ଜରିଆରେ କୋରାପୁଟ ଓଏମପି ପଡିଆରେ ପହଞ୍ଚିଥିଲେ । ଏହାପରେ ଜନସଭାକୁ ସମ୍ବୋଧିତ କରିଥିଲେ। ବିପୁଳ ମାତ୍ରାରେ ଜନସମାଗମ ହୋଇଥିବା ବେଳେ ଶଙ୍ଖ ଚିହ୍ନରେ ଭୋଟ ଦେବା ପାଇଁ ଅପିଲ କରିଥିଲେ ।
ବିରୋଧୀଙ୍କୁ ଶାଣିତ ଟାର୍ଗେଟ କରିଥିଲେ ମୁଖ୍ୟମନ୍ତ୍ରୀ । ଉଦବୋଧନ ସମୟରେ ପ୍ରଥମେ ଜନମଙ୍ଗଳକାରୀ ତଥା ସରକାରୀ ଯୋଜନା ବିଷୟରେ ପଚାରି ବୁଝିଥିଲେ ନବୀନ । ସେ କହିଥିଲେ, ମମତା ଯୋଜନା ଭଲ ହେଉଛି ? କାଳିଆ ଯୋଜନା ଭଲ କି? ମିଶନ ଶକ୍ତି ଭଲ କି? ବିଏସକେଓ୍ବାଇ ଭଲ କି? ଏବଂ ପୁରୀ ପରିକ୍ରମା ପ୍ରକଳ୍ପ ଭଲ କି ବୋଲି ଜନସଭାକୁ ଆସିଥିବା ଲୋକଙ୍କୁ ପଚାରି ବୁଝିଥିଲେ ମୁଖ୍ୟମନ୍ତ୍ରୀ । ଏହାପରେ ବିରୋଧୀଙ୍କୁ ଶାଣିତ ଟାର୍ଗେଟ କରିଥିଲେ । ବିରୋଧୀ ମିଥ୍ୟାକଥା କହୁଥିବା ନେଇ ସେ ଅଭିଯୋଗ କରିଛନ୍ତି । ସେ ଉଦବୋଧନ ଦେଇ କହିଥିଲେ, "ବିରୋଧୀ ଦଳର ନେତାମାନେ କୁମ୍ଭୀର କାନ୍ଦଣା କାନ୍ଦୁଛନ୍ତି । ସେମାନେ ମିଛ କଥା କହୁଛନ୍ତି । ଆପଣମାନେ ମୋତେ ଏବଂ ଶଙ୍ଖ ଚିହ୍ନକୁ ଆଶୀର୍ବାଦ କରନ୍ତୁ । ଏମଏଲଏ ଏବଂ ଏମପି ପ୍ରାର୍ଥୀଙ୍କୁ ଆଶୀର୍ବାଦ ଦେଇ ଭୋଟ ଦିଅନ୍ତୁ ।"