ଭୁବନେଶ୍ବର: ରାଜଧାନୀରୁ ଠାବ ହେଲା ଅପମିଶ୍ରଣ କରାଯାଉଥିବା ଏକ ସିମେଣ୍ଟ ଗୋଦାମ । ଦୀର୍ଘ ମାସ ହେବ ଏକ ପ୍ରମୁଖ ସିମେଣ୍ଟ କମ୍ପାନୀର ବ୍ୟାଗ୍ ବ୍ୟବହାର କରି ଅପମିଶ୍ରିତ ସିମେଣ୍ଟ ବିକ୍ରି କରୁଥଲେ ସମ୍ପୃକ୍ତ ମାଲିକ୍ । ଅଭିଯୋଗ ଓ ସୂଚନା ଆଧାରରେ ଆଜି ବଡଗଡ ଥାନା ପୋଲିସର ଏକ ଟିମ୍ ବଡଗଡ଼-ଟଙ୍କପାଣି ରାସ୍ତାରେ ଥିବା ଉକ୍ତ ଗୋଦାମରେ ଚଢାଉ କରିଛି । ବହୁମାତ୍ରାରେ ନଷ୍ଟ ହୋଇଯାଇଥିବା ସିମେଣ୍ଟ ଓ ଅପମିଶ୍ରିତ କରାଯାଇ ସପ୍ଲାଇ ଉଦ୍ଦେଶ୍ୟରେ ଗଚ୍ଛିତ ରଖାଯାଇଥିବା ସିମେଣ୍ଟ ପ୍ୟାକେଟ୍ ଜବତ କରିଛି ପୋଲିସ । ସମ୍ପୃକ୍ତ ଗୋଦାନକୁ ସିଲ୍ କରି ମାଲିକଙ୍କୁ ଅଟକ ରଖି ପୋଲିସ୍ ଜେରା କରୁଛି ।
- ବିପୁଳ ପରିମାଣରେ ଅପମିଶ୍ରିତ ସିମେଣ୍ଟ ଜବତ:-
ଚଢାଉରେ କୋଟି କୋଟି ଟଙ୍କାର ସିମେଣ୍ଟ ପ୍ରସ୍ତୁତି ପାଇଁ ରହିଥିବା ପାଉଡର, ନିଷ୍ଟ ହୋଇଯାଇଥିବା ସିମେଣ୍ଟ, ବାଲି ଓ ଅନ୍ୟ ସାମଗ୍ରୀ ଜବତ କରାଯାଇଛି । ବଡଗଡ଼ ଟଙ୍କପାଣି ରାସ୍ତାରେ ମା’ କନକ ଦୁର୍ଗ ସିମେଣ୍ଟ ଷ୍ଟୋରରେ ପ୍ରସ୍ତୁତି ହେଉଥିଲା ଏହି ସିମେଣ୍ଟ । ସିମେଣ୍ଟ କାରଖାନାର ମାଲିକ ଦୁର୍ଗା ଚରଣ ସାମଲ ଅଟକ ରହିଛନ୍ତି । ଦୁର୍ଗା ଚରଣଙ୍କ ପାହାଳ ସ୍ଥିତ ଆଉ ଗୋଟେ ଗୋଡାଉନରେ ମଧ୍ୟ ବଡଗଡ଼ ପୋଲିସ ରେଡ କରି ସିଲ କରିଛି ।