ସୁନ୍ଦରଗଡ଼: କୁତ୍ରା ଅଞ୍ଚଳର ବହୁ ଚର୍ଚ୍ଚିତ ହତ୍ୟାକାଣ୍ଡ ଘଟଣାରେ ମିଳିଲା ପୋଲିସକୁ ସଫଳତା । ପ୍ରେମିକାକୁ ସନ୍ଦେହ କରି ଡବଲ ମର୍ଡର କରିଥିଲା ପ୍ରେମିକ ରାଜୁ ନାଗ । ପ୍ରେମିକା ଏବଂ ତାର ସହପାଠୀଙ୍କୁ ନିର୍ମମ ଭାବରେ ହତ୍ୟା କରି ଫେରାର ହୋଇ ଜଙ୍ଗଲରେ ଲୁଚି ରହିଥିଲା ଅଭିଯୁକ୍ତ । ବର୍ତ୍ତମାନ ପୋଲିସ ତାକୁ ଗିରଫ କରିଛି ।ସୂଚନାଯୋଗ୍ୟ ଯେ, ମୃତ ଦୁଇ ଜଣ ହେଲେ ରାଜଗାଙ୍ଗପୁର ଲାଞ୍ଜିବେର୍ଣାର ରୁମାବାହାଲ ଗ୍ରାମର ପ୍ରତାପ ଲାକ୍ରା (୨୬) ଏବଂ କୁତ୍ରା ଥାନା ତୁନମୁରା ପଞ୍ଚାୟତର କାଶୀପଡା ଗ୍ରାମର ଲିପ୍ସା କେର୍କେଟା (୨୪) । ଗତ ୧୪ ତାରିଖ ବିଳମ୍ବିତ ରାତ୍ରିରେ ଏହି ନିର୍ମମ ହତ୍ୟାକାଣ୍ଡ ଘଟିଥିଲା ।
ଯୁବତୀଙ୍କୁ ମହଙ୍ଗା ପଡିଲା ଡ୍ରାଇଭରକୁ ପ୍ରେମ: ପୋଲିସ ସୂଚନା ଅନୁସାରେ ଗିରଫ ଅଭିଯୁକ୍ତ ରାଜୁ ନାଗ ରାଜଗାଙ୍ଗପୁର ଜରୁଅମାଲ ଅଞ୍ଚଳର ।ସେ ମୃତ ଯୁବତୀଙ୍କ ଘରରେ କାର୍ ଚାଳକ ଭାବରେ କାର୍ଯ୍ୟ କରୁଥିଲା । ଅଭିଯୁକ୍ତ ରାଜୁ ଓ ଲିପ୍ସାଙ୍କ ମଧ୍ୟରେ ପ୍ରେମ ସମ୍ପର୍କ ଗଢି ଉଠିଥିଲା । କିଛି ଦିନ ହେବ ପ୍ରେମିକ ରାଜୁ ଲିପ୍ସାଙ୍କୁ ମାନସିକ ଯନ୍ତ୍ରଣା ଦେଉଥିଲା । ଯାହାଫଳରେ ଏମବିଏ ପରୀକ୍ଷା ଦେଉଥିବା ଲିପ୍ସାଙ୍କ ପାଠପଢାରେ ବାଧା ଉପୁଜିଥିଲା । ସେପଟେ ପ୍ରେମିକ ରାଜୁ ନାଗ ପ୍ରେମିକା ଲିପ୍ସା ଏବଂ ତାଙ୍କ ସହପାଠୀ ପ୍ରତାପ ଲାକ୍ରାଙ୍କ ସମ୍ପର୍କକୁ ନେଇ ସନ୍ଦେହ କରୁଥିଲା ।
ତେବେ ୧୪ ତାରିଖ ଦିନ ଅଭିଯୁକ୍ତ ରାଜୁ ସନ୍ଧ୍ୟାରେ ଲିପ୍ସାଙ୍କ ଘରକୁ ଆସିଥିଲା । ସେଠାରେ ଲିପ୍ସା ଏବଂ ତାର ସହପାଠୀ ପ୍ରତାପଙ୍କୁ ଦେଖି ରାଜୁ ଉତକ୍ଷିପ୍ତ ହୋଇପଡ଼ିଥିଲା । ଏହାପରେ ଏକ ଧାରୁଆ ଆସ୍ତ୍ରରେ ଉଭୟଙ୍କୁ ଆକ୍ରମଣ କରିଥିଲେ । ରାଜୁ ଗୋଡ଼ାଇ ଗୋଡ଼ାଇ ଛୁରିରେ ବାରମ୍ବାର ନିଜ ପ୍ରେମିକା ଲିପ୍ସା ଏବଂ ତାର ସହପାଠୀ ପ୍ରତାପଙ୍କୁ ଗାଁ ଦାଣ୍ଡରେ ହତ୍ୟା କରିଥିଲା । ଘଟଣା ଘଟାଇବା ପରେ ଅଭିଯୁକ୍ତ ରାଜୁ ଘଟଣା ସ୍ଥଳରୁ ଫେରାର ହୋଇଯାଇଥିଲା ।