ଢେଙ୍କାନାଳ: ଢେଙ୍କାନାଳ କୋରିଆଁ ଛକରେ ସଡ଼କ ଦୁର୍ଘଟଣା । ଜାତୀୟ ରାଜପଥ NH -୫୫ରେ ସ୍କୁଲ ବସକୁ ଟ୍ରକ ଧକ୍କା ଦେବାରୁ ୧୦ ଜଣ ଛାତ୍ରଛାତ୍ରୀ ଆହତ ହୋଇଥିବା ସୂଚନା ମିଳିଛି । ସମସ୍ତଙ୍କୁ ଚିକିତ୍ସା ନିମନ୍ତେ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଆହତମାନଙ୍କ ମଧ୍ୟରେ କେହି ଗୁରୁତର ନଥିବା ବେଳେ ସମସ୍ତେ ବାରାକ ଲାଇନ ଅଞ୍ଚଳର ବୋଲି ପ୍ରାଥମିକ ଭାବେ ଜଣାପଡ଼ିଛି । ସ୍କୁଲ ବସ୍ ରଙ୍ଗ ରୁଟରେ ଯାଉଥିବା ସୂଚନା ମିଳିଛି ।
ସ୍କୁଲ ବସ୍କୁ ଧକ୍କା ଦେଲା ଟ୍ରକ:
ମିଳିଥିବା ସୂଚନା ଅନୁଯାୟୀ, ଆଜି ସକାଳ ସମୟରେ ଏକ ଘରୋଇ ହାଇସ୍କୁଲର ସ୍କୁଲ ବସ ପ୍ରାୟ ୪୦ଜଣ ଛାତ୍ରଛାତ୍ରୀଙ୍କୁ ନେଇ ସଦର ଥାନା ଗେଙ୍ଗୁଟିଆ ରଣପଶି ସ୍ଥିତ ସ୍କୁଲକୁ ଯାଉଥିଲା । ଏହି ସମୟରେ ଅନୁଗୋଳ ପଟୁ ଢେଙ୍କାନାଳ ଆଡ଼କୁ ଆସୁଥିବା ଏକ ଟ୍ରକ ସ୍କୁଲ ବସକୁ ଧକ୍କା ଦେଇଥିଲା । ବସରେ ଥିବ 10 ଜଣ ଛାତ୍ରଛାତ୍ରୀ ଆହତ ହେବାରୁ ସଙ୍ଗେ ସଙ୍ଗେ ସେମାନଙ୍କୁ ଚିକିତ୍ସା ପାଇଁ ପଛରେ ଯାଉଥିବା ସ୍କୁଲର ଅନ୍ୟ ଏକ ବସରେ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଆହତଙ୍କ ଅଭିଭାବକମାନେ ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ହସ୍ପିଟାଲରେ ପହଞ୍ଚିଥିଲେ । ଚିକିତ୍ସା ପରେ ଆହତ ପିଲା ମାନଙ୍କୁ ଅଭିଭାବକ ଘରକୁ ନେଇଥିବା ସୂଚନା ମିଳିଛି ।