କଟକ-ବାଲେଶ୍ବରରେ ବ୍ୟାପକ ଫସଲ ନଷ୍ଟ, ତୁରନ୍ତ କ୍ଷତିପୂରଣ ଦାବି କଲା ବିଜେଡି

ବର୍ଷା ଯୋଗୁ ବ୍ୟାପକ ଫସଲ ନଷ୍ଟ ପରେ ଚିନ୍ତାରେ ଚାଷୀ । କଟକରେ ଚାଷ ଜମି ବୁଲି ଦେଖିଛନ୍ତି ବିଜେଡି ନେତା । ବାଲେଶ୍ବରରେ ମନ୍ତ୍ରୀଙ୍କ ସମୀକ୍ଷା ।

କଟକ/ବାଲେଶ୍ବର: ଲଘୁଚାପଜନିତ ବର୍ଷା ଫସଲ ଧୋଇନେଇଛି । ବର୍ଷକର ଫସଲ ମାଟିରେ ମିଶିଲା ପରେ ଏବେ ଚିନ୍ତାରେ ଚାଷୀ । କଟକ ଜିଲ୍ଲାରେ ବ୍ୟାପକ ଫସଲ ହାନି ଘଟିଛି । କିନ୍ତୁ କ୍ଷୟକ୍ଷତି ସମ୍ପର୍କିତ ଆକଳନ କରିବା ପାଇଁ କୃଷି ଅଧିକାରୀମାନେ ଏପର୍ଯ୍ୟନ୍ତ କ୍ଷେତ୍ର ପରିଦର୍ଶନ କରି ନଥିବା ଅଭିଯୋଗ କରିଛି ବିଜେଡି । ସେପଟେ ବାଲେଶ୍ବରରେ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ଧାନ କିଣା ନେଇ ସମୀକ୍ଷା କରିବା ପରେ ଚାଷୀଙ୍କ କ୍ଷୟକ୍ଷତିର ଆକଳନ କରାଯାଇ କ୍ଷତିପୂରଣ ନେଇ ପ୍ରତିଶ୍ରୁତି ଦେଇଥିଲେ । ଏହାକୁ ନେଇ ମୁଖ୍ୟ ଶାସନ ସଚିବ ଗତକାଲି(ଗୁରୁବାର) ବାଲେଶ୍ୱର ଜିଲ୍ଲାପାଳଙ୍କ ସହ ଆଲୋଚନା କରି ତୁରନ୍ତ ରିପୋର୍ଟ ପ୍ରସ୍ତୁତ ପାଇଁ ନିର୍ଦ୍ଦେଶ ଦେଇଛନ୍ତି ।

କଟକ ଜିଲ୍ଲାରେ ଚାଷଜମୀ କ୍ଷତିଗ୍ରସ୍ତ:

ଅଦିନିଆ ବର୍ଷାରେ କ୍ଷତିଗ୍ରସ୍ତ ହୋଇଥିବା ସମସ୍ତ ଚାଷୀଙ୍କୁ ଉଚିତ୍ କ୍ଷତିପୂରଣ ଦେବା ଲାଗି ସମସ୍ତ ପ୍ରକାର ପଦକ୍ଷେପ କରିବା ପାଇଁ ଦାବି କରିଛି ବିରୋଧୀ ବିଜେଡି । ଆଜି ବିଜେଡିର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ପ୍ରତାପ ଜେନାଙ୍କ ନେତୃତ୍ୱରେ ଏକ ପ୍ରତିନିଧି ଦଳ କଟକ ଜିଲ୍ଲାପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି । "ନିୟମ ମୁତାବକ ୭୨ ଘଣ୍ଟା ମଧ୍ୟରେ କ୍ଷତିପୂରଣ ପାଇବା ପାଇଁ ବୀମାଭୁକ୍ତ ଚାଷୀମାନଙ୍କୁ ବୀମା କ୍ଳେମ କରିବା ପାଇଁ ବ୍ୟବସ୍ଥା ରହିଛି । ଯଦି କୌଣସି ଚାଷୀ କ୍ଷତିପୂରଣ ପାଇବାରୁ ବଞ୍ଚିତ ରୁହେ ,ଚାଷୀମାନଙ୍କ ସ୍ୱାର୍ଥ ପାଇଁ ବିଜେଡି ଆନ୍ଦୋଳନକୁ ଓହ୍ଲାଇବ" ବୋଲି ଚେତାବନୀ ଦେଇଛନ୍ତି ବରିଷ୍ଠ ବିଜେଡି ନେତା ପ୍ରତାପ ଜେନା।

କଟକରେ ଚାଷଜମି କ୍ଷୟକ୍ଷତି ଆକଳନ:

ସେପଟେ କଟକ ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ସିନ୍ଦେ କହିଛନ୍ତି, "୭୨ ଘଣ୍ଟାର ଅବଧି କେବଳ ପଞ୍ଜିକରଣ ପାଇଁ ଧାର୍ଯ୍ୟ ହୋଇଛି । ଯଦି ଏଥିରେ ବିଳମ୍ବ ହେଉଛି, ତେବେ ତାହାକୁ ମଧ୍ୟ ବିଚାରକୁ ନିଆଯିବ। କଟକ ଜିଲ୍ଲାରେ କ୍ଷୟକ୍ଷତି ଆକଳନ କରାଯାଉଛି । ଏପର୍ଯ୍ୟନ୍ତ ପ୍ରଧାନମନ୍ତ୍ରୀ ଫସଲ ବୀମା ଯୋଜନାରେ ଅନ୍ତର୍ଭୁକ୍ତ ଥିବା ପ୍ରାୟ ସାଢେ ୯ ହଜାର ଚାଷୀ ଆବେଦନ କରିଛନ୍ତି । ଯଦି କେହି ଚାଷୀ ନିଜେ ଆବେଦନ ନକରି ପାରୁଛନ୍ତି ତେବେ କୃଷି ଅଧିକାରୀମାନେ ସେମାନଙ୍କୁ ସାହାଯ୍ୟ କରିବେ ।"

ବାଲେଶ୍ବରରେ ମନ୍ତ୍ରୀଙ୍କ ସମୀକ୍ଷା:

ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର ବାଲେଶ୍ୱର ଜିଲ୍ଲାରେ ଧାନ କିଣା ନେଇ ସମୀକ୍ଷା କରିଛନ୍ତି । ମୁଖ୍ୟ ଶାସନ ସଚିବ ଗତକାଲି ବାଲେଶ୍ୱର ଜିଲ୍ଲାପାଳଙ୍କ ସହ ଆଲୋଚନା କରି ତୁରନ୍ତ ରିପୋର୍ଟ ପ୍ରସ୍ତୁତ ପାଇଁ ନିର୍ଦ୍ଦେଶ ଦେଇଛନ୍ତି । ଏହାସହ୧୪୪୪୭ ଟୋଲ ଫ୍ରି ନମ୍ବରରେ ବୀମାଭୁକ୍ତ ଚାଷୀମାନେ ସେମାନଙ୍କର କ୍ଷୟକ୍ଷତି ପାଇଁ ପଞ୍ଜିକରଣ କରିପାରିବେ ବୋଲି ସୂଚନା ଦିଆଯାଇଛି । ସ୍ଵତନ୍ତ୍ର ସହାୟତା ଆୟୋଗ, ଓଡ଼ିଶାଙ୍କ ନିର୍ଦ୍ଦେଶାବଳୀ ଅନୁଯାୟୀ ଆସନ୍ତା ୪୮ ଘଣ୍ଟା ମଧ୍ୟରେ ସମସ୍ତ ପ୍ରଭାବିତ ବ୍ଲକର କ୍ଷୟକ୍ଷତି ଆକଳନ ଶେଷ କରିବା ସହ କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ ସେମାନଙ୍କର ଫସଲ କ୍ଷୟକ୍ଷତିର ଆକଳନ କରିବାରେ ଆବଶ୍ୟକ ସହାୟତା ଦେବା ପାଇଁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି ।

ବୀମାଭୁକ୍ତ ହୋଇନଥିବା ଚାଷୀମାନଙ୍କ ସଠିକ ତଥ୍ୟକୁ ମଧ୍ୟ ସଂଗ୍ରହ କରିବା ପାଇଁ ସମସ୍ତ କ୍ଷେତ୍ର ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । କୌଣସି କ୍ଷେତ୍ରରେ ଯଦି ବୀମାଭୁକ୍ତ କୃଷକମାନେ ସେମାନଙ୍କର ଅଭିଯୋଗ ପଞ୍ଜିକରଣ କରିବାରେ ଅସମର୍ଥ ହେଉଛନ୍ତି, ସେଠାରେ କ୍ଷେତ୍ର ଅଧିକାରୀମାନଙ୍କୁ ବୈଷୟିକ ସହାୟତା ସହିତ କୃଷକମାନଙ୍କୁ ସାହାଯ୍ୟ କରିବାକୁ ନିର୍ଦ୍ଦେଶ ଦିଆଯାଇଛି । କ୍ଷତିଗ୍ରସ୍ତ ଚାଷୀଙ୍କୁ ତୁରନ୍ତ ସହାୟତା ଯୋଗାଇ ଦେବା ସହିତ ସମସ୍ତ ସମ୍ମିଳିତ ବିଭାଗ ଯଥା ଶୀଘ୍ର ଆକଳନ କାର୍ଯ୍ୟ ଶେଷ କରିବାକୁ ନିର୍ଦ୍ଦେଶ ଦେଇଛନ୍ତି ଜିଲ୍ଲାପାଳ ।

ଏହା ବି ପଢନ୍ତୁ...ଅଦିନିଆ ବର୍ଷା ଛଡେଇନେଲା ଚାଷୀ ମୁହଁରୁ ଆହାର ଏହା ବି ପଢନ୍ତୁ...ଚାଷୀର ସ୍ବପ୍ନ ଧୂଳିସାତ କରିଦେଲା ଅଦିନିଆ ବର୍ଷା, ପାଣିରେ ଭାସୁଛି ଅମଳ ଧାନ

ବାଲେଶ୍ବରରେ ଚାଷଜମି କ୍ଷୟକ୍ଷତି ଆକଳନ:

ବାଲେଶ୍ୱର ଜିଲ୍ଲାପାଳ ସୂର୍ଯ୍ୟବଂଶୀ ମୟୂର ବିକାଶ ନିଜର ପ୍ରତିକ୍ରିୟାରେ କହିଛନ୍ତି," ରାଜ୍ୟ ସରକାରଙ୍କ ଦ୍ୱାରା ଏକ ବୈଠକ ଅନୁଷ୍ଠିତ ହୋଇଥିଲା। ମୁଖ୍ୟ ଶାସନ ସଚିବ ଏହି ବୈଠକରେ ସମସ୍ତଙ୍କୁ ନିର୍ଦ୍ଦେଶ ଦେଇଛନ୍ତି । ତହସିଲଦାର, ବିଡିଓ ଏବଂ ଅଧିକାରୀମାନେ ଅଛନ୍ତି । ଯେମିତି ପ୍ରଧାନମନ୍ତ୍ରୀ ଫସଲ ବୀମାରେ ଯେଉଁ କଥା ସବୁ ରହିଛି ତାର ସୂଚନା ସମସ୍ତଙ୍କୁ ପ୍ରଦାନ କରିବା ପାଇଁ କୁହାଯାଇଛି । 72 ଘଣ୍ଟା ଭିତରେ ଚାଷୀମାନେ ଆବେଦନ କରିବାର ସମୟ ସୀମା ରହିଥିଲା, ତାହାକୁ ନେଇ ସମସ୍ତଙ୍କୁ ନିର୍ଦ୍ଦେଶ ଦିଆଯାଇଛି। ତାହାର ଉପଯୁକ୍ତ ସମୟ ସୀମା ମଧ୍ୟରେ ସମସ୍ତେ ଆବେଦନ କରିବେ, ସେଥିପାଇଁ ସବୁ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ।

‘‘ଆମର ଯେଉଁ କ୍ଷେତ୍ର ଅଧିକାରୀମାନେ ଅଛନ୍ତି ସେମାନେ କ୍ଷେତ୍ର ପରିଦର୍ଶନ କରିଛନ୍ତି । ସେହି ହିସାବରେ ଯେଉଁଠି ଯେଉଁଠି ଚାଷୀମାନଙ୍କୁ ସୂଚନା ଦେବାର ଅଛି ସେମାନେ ଦେଉଛନ୍ତି। ଯେଉଁମାନେ ଫସଲ ବୀମାରେ ଅନ୍ତର୍ଭୁକ୍ତ ନୁହନ୍ତି ସେମାନଙ୍କର ବି କ୍ଷୟକ୍ଷତି ଆକଳନ କରାଯିବ। ବ୍ଲକ ସ୍ତରରେ ଆମର କୃଷି ଅଧିକାରୀ ଅଛନ୍ତି, ତହସିଲଦାର ଅଛନ୍ତି। ଯେହେତୁ ସମୟ କମ ଅଛି ମିଶିକି ସମସ୍ତେ କେମିତି କାର୍ଯ୍ୟ ସମ୍ପାଦନ କରିବେ ସେନେଇ ନିର୍ଦ୍ଦେଶ ଦିଆଯାଇଛି । ସରକାରୀ ନିୟମ ଅନୁସାରେ କ୍ଷୟକ୍ଷତି ଆକଳନ ପରେ ପ୍ରତି ଏକର ପିଛା କ୍ଷତିପୂରଣ ପ୍ରଦାନ କରାଯିବ।"

ଇଟିଭି ଭାରତ, କଟକ/ବାଲେଶ୍ବର