ଭୁବନେଶ୍ବର:ଦୀର୍ଘ ଦିନ ପରେ ପୁଣି ଚର୍ଚ୍ଚାରେ ଝାରପଡ଼ା ଜେଲ୍ । ସ୍ବତନ୍ତ୍ର କାରଗାର ଭିତରେ ହାତାହାତି ଅପରାଧି । ଦୁର୍ଦ୍ଦାନ୍ତ ଅପରାଧି ଶମ୍ଭୁନାଥ ଓ ଚକରା ଗ୍ୟାଙ୍ଗ ମଧ୍ୟରେ ଗୋଷ୍ଠୀ ସଂଘର୍ଷ ହୋଇଥିବା ବେଳେ ଏଥିରେ ଶମ୍ଭୁନାଥ ବାରିକ ଆହତ ହୋଇଥିବା ଜଣାପଡିଛି । ଲକ୍ଷ୍ମୀସାଗର ଥାନାର ଏକ କେସରେ ଜେଲ୍ରେ ରହିଥିଲା ଶମ୍ଭୁ । ତେବେ ଚିକିତ୍ସା ପରେ ପୁଣି ଝାରପଡା ଜେଲକୁ ଫେରିଛି ଆହତ ଅପରାଧୀ । ଏହି ଘଟଣା ପରେ ଜେଲରେ ସୁରକ୍ଷା ବ୍ୟବସ୍ଥା ବୃଦ୍ଧି କରାଯିବା ସହିତ ଲକ୍ଷ୍ମୀସାଗର ଥାନାରେ ଏକ କେସ ଦିଆଯାଇଥିବା ନେଇ ଜେଲ ସୁପରିଟେଣ୍ଡେଣ୍ଟ ସୂଚନା ଦେଇଛନ୍ତି ।
ସୁରକ୍ଷା ବ୍ୟବସ୍ଥାକୁ ନେଇ ପ୍ରଶ୍ନବାଚୀ:ଜେଲ ଭିତରେ ଏପରି କ୍ରିମିନାଲ ଓ୍ବାର ସାମ୍ନାକୁ ଆସିବା ପରେ ଏବେ ସୁରକ୍ଷା ବଳୟକୁ ନେଇ ଭୟ ବଢିବା ସହିତ ପ୍ରଶ୍ନବାଚୀ ସୃଷ୍ଟି ହୋଇଛି । ଆଗକୁ ନିର୍ବାଚନ ଆସୁଥିବା ବେଳେ ଅନେକ ହାର୍ଡକୋର ଅପରାଧି ଏବେ ଜେଲ ଭିତରେ ରହିଛନ୍ତି । ହେଲେ ଜେଲ ଭିତରେ ଏପରି ଅପରାଧିକ ଉତ୍ପାତ ଏଠାରେ ସୁରକ୍ଷା ନେଇ ପ୍ରଶ୍ନବାଚୀ ସୃଷ୍ଟି କରିଛି ।
ଜେଲ ଭିତରେ କ୍ରିମିନାଲ ଓ୍ବାର:ଦୁଇ ଗୋଷ୍ଠୀ ମଧ୍ୟରେ ହୋଇଥିବା ଗଣ୍ଡଗୋଳ ବା ଆକ୍ରମଣରେ ଦୁଇଟି ଗୋଷ୍ଠୀ ରହିଛନ୍ତି । ଗୋଟିଏ ପଟେ ଶମ୍ଭୁନାଥ ବାରିକ ରହିଥିବା ବେଳେ ଅନ୍ୟପଟେ ରହିଛି ଚକରା ଗ୍ୟାଙ୍ଗ । ତେବେ ଆକ୍ରମଣକାରୀ ଚକରା ଗ୍ୟାଙ୍ଗରେ ରହିଛନ୍ତି ଚକରା ବାରିକ ଓ ପପୁ ମାଝୀ । ତେବେ ଗୋଟିଏ ଗୋଷ୍ଠୀ ସେଲ୍ ଭିତରେ ରହିଥିବା ବେଳେ ଅନ୍ୟମାନେ ଜେଲ୍ କୋଠରୀରେ ରହିଥିଲେ । ତିନି ଦିନ ପୂର୍ବରୁ ଉଭୟଙ୍କ ମଧ୍ୟରେ ମାରପିଟ୍ ହୋଇଥିଲା । ନିଜର ପତିଆରା ଜାହିର କରିବା ପାଇଁ ଉଭୟ ଗୋଷ୍ଠୀ ମଧ୍ୟରେ ମାରପିଟ୍ ହୋଇଥିବା ଜଣାପଡିଛି ।
ଏହା ମଧ୍ୟ ପଢନ୍ତୁ:ଝାରପଡା ଜେଲ୍ ଗଲା ଭୁବନେଶ୍ବର ଡବଲ ମର୍ଡର ଅଭିଯୁକ୍ତ
ଚିକିତ୍ସା ପରେ ଜେଲକୁ ଫେରିଲା ଅପରାଧୀ:ତେବେ ଆହତ ଶମ୍ଭୁକୁ ଚିକିତ୍ସା ପରେ ଜେଲ୍କୁ ଅଣାଯାଇ ସ୍ବତନ୍ତ୍ର ସେଲରେ ରଖାଯାଇଛି । ସେହିପରି ଚକରାକୁ ମଧ୍ୟ ଅନ୍ୟତ୍ର ରଖାଯାଇ ତା' ଉପରେ ଜେଲ କର୍ତ୍ତୃପକ୍ଷ କଡ଼ା ନଜର ରଖିଛନ୍ତି । ଏହି ଘଟଣାକୁ ନେଇ ଜେଲ କର୍ତ୍ତୃପକ୍ଷଙ୍କ ପକ୍ଷରୁ ଲକ୍ଷ୍ମୀସାଗରେ ଥାନାରେ ଏକ ମାମଲା ଦେଇଛନ୍ତି । ଅଭିଯୋଗ ଆଧାରରେ ତଦନ୍ତ ଆରମ୍ଭ କରିଛି ପୋଲିସି । ଏନେଇ ଥାନା ଅଧିକାରୀ କହିଛନ୍ତି, ତଦନ୍ତ ଚାଲିଛି, ରିପୋର୍ଟ ଆଧାରରେ କେସ କରାଯିବ । ଏନେଇ ତୁରନ୍ତ କୋର୍ଟଙ୍କୁ ଅବଗତ କରାଯିବ । ଯେହେତୁ ଏମାନେ ଜୁଡିସିଆଲ କଷ୍ଟଡିରେ ଅଛନ୍ତି ଏନେଇ କୋର୍ଟ ପଦକ୍ଷେପ ନେବେ ।