କେନ୍ଦ୍ରାପଡା:ବିଜେପିର ନିର୍ବାଚନୀ ପ୍ରଚାରରେ କମ୍ପିଲା ତୁଳସୀ କ୍ଷେତ୍ର । ବଳଦେବଜୀଉଙ୍କ ଆଶୀର୍ବାଦ ନେଇ କେନ୍ଦ୍ରାପଡାରେ ପ୍ରଚାର ଆରମ୍ଭ କଲେ ବିଜେପି ସାଂସଦ ପ୍ରାର୍ଥୀ ବୈଜୟନ୍ତ ପଣ୍ଡା । କେନ୍ଦ୍ରାପଡା ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା ହେବା ପରେ ଏହା ବୈଜୟନ୍ତଙ୍କ ପ୍ରଥମ ଜିଲ୍ଲା ଗସ୍ତ । ସୋମବାର ଦଳୀୟ କର୍ମୀଙ୍କ ସହ ସେ ନିଜ ସଂସଦୀୟ କ୍ଷେତ୍ରରେ ପ୍ରଚାର ଆରମ୍ଭ କରିଛନ୍ତି । ଚାନ୍ଦୋଳ ବଜାରଠାରୁ ଦଳୀୟ କର୍ମୀ ଓ ସମର୍ଥକମାନେ ବୈଜୟନ୍ତ ପଣ୍ଡାଙ୍କୁ ଏକ ଶୋଭାଯାତ୍ରାରେ ନେଇ ଦୁହୁରିଆ ସ୍ଥିତ ବିଜେପି ଜିଲ୍ଳା କାର୍ଯ୍ୟାଳୟରେ ପହଞ୍ଚି ଥିଲେ । ପରେ ଶୋଭାଯାତ୍ରାରେ ସହର ପରିକ୍ରମା କରି ବଳଦେବଜୀଉଙ୍କ ମନ୍ଦିରରେ ପହଞ୍ଚି ଆଶୀର୍ବାଦ ନେଇଥିଲେ ବୈଜୟନ୍ତ ପଣ୍ଡା ।
ମହାକାଳପଡ଼ା ନିର୍ବାଚନ ମଣ୍ଡଳୀରୁ ହଜାର ହଜାର ବୈଜୟନ୍ତ ସମର୍ଥକ ଏହି ଶୋଭାଯାତ୍ରାରେ ସାମିଲ ହୋଇଥିବା ବେଳେ ଏଠାକାର ବିଜେପି ବିଧାୟକ ଆଶାୟୀ ଦୁର୍ଗାଶିଷ ନାୟକ କେନ୍ଦ୍ରାପଡା ଲୋକସଭା ଆସନରେ ମୋଦି ଓ ବୈଜୟନ୍ତ ଗ୍ୟାରେଣ୍ଟି ଚାଲିବ ବୋଲି ପ୍ରତିକ୍ରିୟା ଦେଇଥିଲେ । ସେହିପରି ଅନ୍ୟତମ ପାଟକୁରା ଆସନରୁ ଆଶାୟୀ ପ୍ରାର୍ଥୀ ତଥା ରାଜ୍ୟ ବିଜେପି ପ୍ରବକ୍ତା ତେଜେଶ୍ୱର ପରିଡା ନିଜ ପ୍ରତିକ୍ରିୟା ରଖି କେନ୍ଦ୍ରାପଡା ଲୋକସଭା ଆସନରେ ବିଜେପି ବିପୁଳ ବିଜୟ ହାସଲ କରିବ ବୋଲି କହିବା ସହ ସମସ୍ତ ସାତୋଟି ବିଧାନସଭା ଆସନରେ ବିଜେପି ବାଜିମାତ୍ କରିବ ବୋଲି କହିଥିଲେ ।