ନୂଆଦିଲ୍ଲୀ: ୫ ବର୍ଷ ପରେ ରେପୋ ରେଟ ହ୍ରାସ କଲା ରିଜର୍ଭ ବ୍ୟାଙ୍କ (RBI) । ଶସ୍ତା ହେବ ଗୃହ ଋଣ EMI । କମିବ ସୁଧ ହାର । ରେପୋ ରେଟ ୦.୨୫ ପ୍ରତିଶତ ହ୍ରାସ କରିଛି ଭାରତୀୟ ରିଜର୍ଭ ବ୍ୟାଙ୍କ । ରେପୋ ରେଟ୍ ୬.୫ରୁ ଖସି ୬.୨୫ ହୋଇଛି । ଏମପିସିର (Monetary Policy Committee) ନିଷ୍ପତ୍ତି ଘୋଷଣା ବେଳେ ଏନେଇ ପ୍ରେସମିଟ କରି ସୂଚନା ଦେଇଛନ୍ତି ଆରବିଆଇ ଗଭର୍ଣ୍ଣର ସଞ୍ଜୟ ମଲହୋତ୍ରା ।
ରେପୋ ରେଟ ହ୍ରାସ:
ଭାରତୀୟ ରିଜର୍ଭ ବ୍ୟାଙ୍କ (RBI) ଆଜି (ଶୁକ୍ରବାର) ଦିନ ସୁଧ ହାରରେ ୦.୨୫ ପ୍ରତିଶତ ହ୍ରାସ ଘୋଷଣା କରିଛି । ୫ ବର୍ଷ ପରେ ରିଜର୍ଭ ବ୍ୟାଙ୍କ ରେପୋ ରେଟ୍ ହ୍ରାସ କରିଛି । ରେପୋ ରେଟ୍ରେ ୦.୨୫ ପ୍ରତିଶତ (୨୫ ବେସିସ୍ ପଏଣ୍ଟ) ହ୍ରାସ ଯୋଗୁଁ, ଗୃହ ଋଣ ଏବଂ କାର ଋଣ ସମେତ ସମସ୍ତ ଋଣ ଶସ୍ତା ହେବ । ଲୋକଙ୍କୁ EMIରେ ଆଶ୍ବସ୍ତି ମିଳିବ । ରିଜର୍ଭ ବ୍ୟାଙ୍କ ଶେଷ ଥର ପାଇଁ ଜୁନ୍ ୨୦୨୩ରେ ରେପୋ ରେଟ୍କୁ ୬.୫ ପ୍ରତିଶତକୁ ବୃଦ୍ଧି କରିଥିଲା । ଜୁନ୍ ୨୦୨୩ ପରଠାରୁ ରେପୋ ରେଟରେ କୌଣସି ପରିବର୍ତ୍ତନ ହୋଇନାହିଁ ।
୬.୨୫ ପ୍ରତିଶତ ରେପୋ ରେଟ୍:
ଜୁନ ୨୦୨୩ ପରେ ପ୍ରଥମ ଥର ପାଇଁ, ରେପୋ ରେଟ୍ ପରିବର୍ତ୍ତନ କରାଯାଇଛି । ଏବେ ଏହାକୁ ୬.୫୦ ପ୍ରତିଶତରୁ ୬.୨୫ ପ୍ରତିଶତକୁ ହ୍ରାସ କରାଯାଇଛି । ୫ ଫେବୃଆରୀରେ RBI ଗଭର୍ଣ୍ଣର ସଞ୍ଜୟ ମାଲହୋତ୍ରାଙ୍କ ଅଧ୍ୟକ୍ଷତାରେ ବସିଥିବା ମୁଦ୍ରା ନୀତି କମିଟି ବୈଠକର ଆଜି (୭ ଫେବୃଆରୀ) ଶେଷ ଦିନ ଥିଲା । ୩ ଦିନ ଧରି ଚାଲିଥିବା ଏହି ଗୁରୁତ୍ୱପୂର୍ଣ୍ଣ ବୈଠକରେ ରେପୋ ରେଟ ହ୍ରାସ କରିବାକୁ ନିଷ୍ପତ୍ତି ନିଆଯାଇଛି । ଶୁକ୍ରବାର ବୈଠକ ଶେଷ ହେବା ପରେ, ଭାରତୀୟ ରିଜର୍ଭ ବ୍ୟାଙ୍କ ଗଭର୍ଣ୍ଣର ସଞ୍ଜୟ ମଲହୋତ୍ରା ରେପୋ ରେଟ୍ରେ ୦.୨୫ ପ୍ରତିଶତ ହ୍ରାସ ଘୋଷଣା କରିଛନ୍ତି । ରିଜର୍ଭ ବ୍ୟାଙ୍କ ଶେଷ ଥର ପାଇଁ ମେ' ୨୦୨୦ରେ ସୁଧ ହାର ହ୍ରାସ କରିଥିଲା । କୋଭିଡ ସମୟରେ ଦେଶର ଅର୍ଥନୀତିକୁ ବୃଦ୍ଧି କରିବା ପାଇଁ RBI ରେପୋ ହାରକୁ ୦.୦୪ ପ୍ରତିଶତ (୪୦ ବେସିସ୍ ପଏଣ୍ଟ) ହ୍ରାସ କରିଥିଲା ।
RBI ଗଭର୍ଣ୍ଣରଙ୍କ ମୁଖ୍ୟ ଘୋଷଣା:
- ପ୍ରାୟ ୫ ବର୍ଷ ପରେ ପ୍ରଥମ ଥର ପାଇଁ, RBI ସୁଧ ହାରକୁ 25 bps ହ୍ରାସ କରି 6.25 ପ୍ରତିଶତ କରିଛି
- ଆରବିଆଇ ଗଭର୍ଣ୍ଣର ସଞ୍ଜୟ ମଲହୋତ୍ରା ଭାରତର ଆର୍ଥିକ ବର୍ଷ ୨୬ ପାଇଁ ଅଭିବୃଦ୍ଧି ଲକ୍ଷ୍ୟକୁ ୬.୬ ପ୍ରତିଶତରୁ ୬.୭ ପ୍ରତିଶତକୁ ବୃଦ୍ଧି କରିଛନ୍ତି
- ଖାଦ୍ୟ ସାମଗ୍ରୀ ପ୍ରତି ଅନୁକୂଳ ଦୃଷ୍ଟିକୋଣ ଯୋଗୁଁ ମୁଦ୍ରାସ୍ଫୀତି ହ୍ରାସ ପାଇଛି । ଲକ୍ଷ୍ୟ ଅନୁଯାୟୀ ଏହା ଧୀରେ ଧୀରେ ହ୍ରାସ ପାଇବ ବୋଲି ଆଶା କରାଯାଉଛି
- ଚାହିଦା ଦିଗରେ, ଗ୍ରାମାଞ୍ଚଳରେ ଚାହିଦା ବୃଦ୍ଧି ପାଉଥିବା ବେଳେ ସହରାଞ୍ଚଳରେ ଚାହିଦା ମନ୍ଥର ରହିଛି
ସଞ୍ଜୟ ମାଲହୋତ୍ରାଙ୍କ ନେତୃତ୍ୱାଧୀନ ଏମପିସି ଆର୍ଥିକ ବର୍ଷ ୨୦୨୬ରେ ମୁଦ୍ରାସ୍ଫୀତି ୪.୨ ପ୍ରତିଶତ ରହିବ ବୋଲି ଆକଳନ କରିଛି
- ଆର୍ଥିକ ବର୍ଷ ୨୬ରେ ୪.୨ % ଆକଳନ
- ପ୍ରଥମ ତ୍ରୈମାସିକରେ ୪.୫ % ଆକଳନ
- ଦ୍ୱିତୀୟ ତ୍ରୈମାସିକରେ ୪ % ଆକଳନ
- ତୃତୀୟ ତ୍ରୈମାସିକରେ ୩.୮ % ଆକଳନ
GDP ଉପରେ ରିଜର୍ଭ ବ୍ୟାଙ୍କ ଗଭର୍ଣ୍ଣର ସଞ୍ଜୟ ମାଲହୋତ୍ରାଙ୍କ ଆକଳନ:
ପ୍ରଥମ ତ୍ରୈମାସିକ ପାଇଁ ପ୍ରାୟ ୬.୭%
ଦ୍ୱିତୀୟ ତ୍ରୈମାସିକ ପାଇଁ ୬.୭%
ତୃତୀୟ ତ୍ରୈମାସିକ ପାଇଁ ୭%
ଚତୁର୍ଥ ତ୍ରୈମାସିକ ପାଇଁ ୬.୫ %
ବ୍ୟରୋ ରିପୋର୍ଟ ଇଟିଭି ଭାରତ
