ଅର୍ଥ କମିଶନଙ୍କୁ ଭେଟିଲେ, ଦାବି ରଖିଲେ ନେତା ଓ ପ୍ରତିନିଧି

ଷୋଡ଼ଶ ଅର୍ଥ କମିଶନ ପାଖରେ ନିଜ ନିଜ ଦାବି ରଖିଲେ ବିଭିନ୍ନ ରାଜନୈତିକ ଦଳ । ସ୍ୱତନ୍ତ୍ର ରାଜ୍ୟ ମାନ୍ୟତା କିମ୍ବା ସ୍ପେଶାଲ ଫୋକସ ଷ୍ଟେଟ ପାଇଁ ଦାବି କଲା ବିଜେଡି।

ଭୁବନେଶ୍ବର: ଷୋଡ଼ଶ ଅର୍ଥ କମିଶନ ଡ. ଅରବିନ୍ଦ ପାନଗେରିୟା ଓ ଟିମଙ୍କୁ ଭେଟିଛନ୍ତି ବିଭିନ୍ନ ରାଜନୈତିକ ଦଳ ଓ ପୌରାଞ୍ଚଳ ପ୍ରତିନିଧି । ବିଜେଡି, ବିଜେପି, କଂଗ୍ରେସ ଓ ଆପର ପ୍ରତିନିଧି ଅର୍ଥ କମିଶନଙ୍କୁ ଭେଟି ଦାବି ପତ୍ର ଦେଇଛନ୍ତି । ସେହିପରି ରାଜ୍ୟର ବିଭିନ୍ନ ପୌରାଞ୍ଚଳର ପ୍ରତିନିଧି ମଧ୍ୟ ବିଭିନ୍ନ ଦାବି ରଖିଛନ୍ତି ।

• କଣ କହିଲେ ଷୋଡ଼ଶ ଅର୍ଥ କମିଶନ ଅଧ୍ୟକ୍ଷ ?

ଏହି ଅବସରରେ ଷୋଡ଼ଶ ଅର୍ଥ କମିଶନ ଅଧ୍ୟକ୍ଷ ଡ. ଅରବିନ୍ଦ ପାନଗେରିୟା କହିଛନ୍ତି, "ଜନସଂଖ୍ୟା ଅଧାରରେ ରାଜ୍ୟ ଗୁଡ଼ିକୁ ଟିକସ ଅଂଶରୁ 15 ପ୍ରତିଶତ ଦେବାକୁ ଦାବି କରିଛନ୍ତି ଓଡିଶା ସରକାର । 10 ପ୍ରତିଶତ ଜଙ୍ଗଲ ବିଭାଗ କ୍ଷେତ୍ରରେ ଦାବି କରିଛି ଓଡ଼ିଶା । ଏସସି ଏବଂ ଏସଟି ଓ ବରିଷ୍ଠ ନାଗରିକଙ୍କ ସ୍ତରରେ ଅନୁଦାନ 3 ପ୍ରତିଶତ ମିଳୁଥିବା ବେଳେ ଏହାକୁ 5 ପ୍ରତିଶତକୁ ବୃଦ୍ଧି କରିବାକୁ ଦାବି କରିଛି ରାଜ୍ୟ । ଶୃଙ୍ଖଳିତ ଆର୍ଥିକ ପରିଚାଳନାରେ ଓଡ଼ିଶା ବିଗତ ବର୍ଷ ମାନଙ୍କରେ ଭଲ ପ୍ରଦର୍ଶନ କରି ଆସୁଛି । ସେ କ୍ଷେତ୍ରରେ 15 ପ୍ରତିଶତ ଦେବା ପାଇଁ କମିଶନଙ୍କ ନିକଟରେ ଦାବି କରିଛନ୍ତି ରାଜ୍ୟ ସରକାର । ସେହିପରି ଡେମୋଗ୍ରାଫି ଅନୁସାରେ 10 ପ୍ରତିଶତ ଓ ଇନକମ ଡିଷ୍ଟାନ୍ସରେ 45 ପ୍ରତିଶତ ଦେବା ନିମନ୍ତେ ରାଜ୍ୟ ସରକାର ଦାବି ରଖିଛନ୍ତି ।"

ରାଜ୍ୟର ବିଭିନ୍ନ ବିରୋଧୀ ରାଜନୈତିକ ଦଳ ଓଡ଼ିଶାକୁ ସ୍ୱତନ୍ତ୍ର ରାଜ୍ୟ ମାନ୍ୟତା ଦାବି ପ୍ରସଙ୍ଗରେ ମତ ରଖିଛନ୍ତି ଅର୍ଥ କମିଶନ । ଅର୍ଥ କମିଶନ ଡ. ଅରବିନ୍ଦ ପାନଗେରିୟା କହିଛନ୍ତି,"ସ୍ପେସିଆଲ କାଟେଗୋରି ଏବଂ ସ୍ପେଶାଲ ସ୍ଟାଟସ ରାଜ୍ୟ ଫାଇନାନ୍ସ କମିଶନଙ୍କ ଅଧିନସ୍ଥ ବ୍ୟାପାର ନୁହେଁ । ନୀତି ଆୟୋଗଙ୍କ ଦ୍ଵାରା ପ୍ଲାନିଂ କମିଶନର ଉଚ୍ଛେଦ ପରେ ଏ ବ୍ୟବସ୍ଥା ଆଉ ପ୍ରଚଳିତ ନାହିଁ । ଦେଶର କୌଣସି ରାଜ୍ୟ ଏ ସୁବିଧା ପାଉନାହାନ୍ତି । ତେଣୁ ଏନେଇ କୌଣସି ଟିପ୍ପଣୀ ଦେବାର ଅଧିକାର ଆମର ନାହିଁ । "

• ଏହି ଦାବି ରଖିଲେ ଭୁବନେଶ୍ୱର ମେୟର:

ଅପରାହ୍ନରେ ଅର୍ଥ କମିଶନଙ୍କୁ ବିଭିନ୍ନ ରାଜନୈତିକ ଦଳ ଓ ପୌରାଞ୍ଚଳ ପ୍ରତିନିଧି ମାନେ ଭେଟି ଦାବି ପତ୍ର ଦେଇଛନ୍ତି । ଭୁବନେଶ୍ୱର ମହାନଗର ନିଗମର ମେୟର ସୁଲୋଚନା ଦାସ କହିଛନ୍ତି, "ULB ପାଇଁ ଯାହା ଦରକାର ତାହା ଦାବି ରଖିଛୁ । ସହର ବଢିବା ସହ ଲୋକଙ୍କ ଆବଶ୍ୟକତା ମଧ୍ୟ ବଢୁଛି । ସେଥିପାଇଁ ଭିର୍ତ୍ତିଭୂମି ବଢ଼ାଇବା ଉପରେ ଗୁରୁତ୍ୱ ଦେବାକୁ ଦାବି ରଖାଯାଇଛି । ପବ୍ଲିକ ଡେ଼ଲିଭରି ସିକ୍ସମକୁ ବଢ଼ାରବା ସହ ୱେଷ୍ଟ ମ୍ୟାନେଜମେଣ୍ଟ ଗୁରୁତ୍ୱ ଦେବା ପାଇଁ ଦାବି ରଖାଯାଇଛି । ଲୋକଙ୍କ ପାଇଁ ସ୍ଥାୟୀ ଭାବରେ ରଖାଯାଇଥିବା ସୁବିଧାକୁ ଅଧିକ ମଜବୁତ କରାଯିବ । ସେଥିପାଇଁ ଦାବି ରଖାଯାଇଛି । ବିଭିନ୍ନ କ୍ଷେତ୍ରରେ ଅର୍ଥ ବଢ଼ାରବା ସହ ଟ୍ରାଏଡ଼ ଏବଂ ଅନଟ୍ରାଏଡ ଫଣ୍ଡ ବଢ଼ାଇବା ପାଇଁ ଦାବି ରଖାଯାଇଛି । ଠିକ ସମୟରେ କେମିତି ସରକାରୀ ଅର୍ଥ ପହଁଚିବ, ତା' ଉପରେ ଗୁରୁତ୍ୱରୋପ କରିବାକୁ କୁହାଯାଇଛି । 2024-25ର CFC ପଇସା ପାଇନାହିଁ BMC । ଫଳରେ ବିଭିନ୍ନ ସମସ୍ୟା ଦେଖା ଦେଇଛି ।"

• ଚିଲିକାକୁ ପୁନଃଉଦ୍ଧାର କରିବାକୁ ଦାବି:
  ପୂର୍ବତନ ଅର୍ଥମନ୍ତ୍ରୀ ତଥା କଂଗ୍ରେସ ନେତା ପଞ୍ଚାନନ କାନୁନଗୋ କହିଛନ୍ତି, "କେନ୍ଦ୍ର ଏବଂ ରାଜ୍ୟ ମଧ୍ୟରେ ଅର୍ଥ ପ୍ରଦାନ ପ୍ରକ୍ରିୟା ଭାଟିକାଲ ଡିଭିଜନ ରହିଛି । ତାହା ଏବେ 41 ପ୍ରତିଶତ ରହିଛି । ଏହାକୁ ବୃଦ୍ଧି କରାଯାଇ 60 ପ୍ରତିଶତ କରାଯାଉ । ରାଜ୍ୟରେ ବୟସ ଅନୁଯାୟୀ ପିଲାଙ୍କ ଉଚତା ବଢ଼ୁନାହିଁ । କାରଣ ରାଜ୍ୟରେ କୁପୋଷଣ ରହିଛି । ମହିଳାମାନଙ୍କ କ୍ଷେତ୍ରରେ ରକ୍ତ ହୀନତା ସମସ୍ୟ ମଧ୍ୟ ରହିଛି । ଏହା ଉପରେ ଗୁରୁତ୍ୱାରୋପ କରାଯାଉ । ସବୁଠାରୁ କମ ଇନକମ ଟ୍ୟାକ୍ସ ଦେଉଥିବା ରାଜ୍ୟ ହେଉଛି ଓଡିଶା । ଏହାର କାରଣ ହେଉଛି ବର୍ତ୍ତମାନ ପର୍ଯ୍ୟନ୍ତ ସଠିକ ଆୟ କରିବାର କ୍ଷମତା ଓଡିଶାର ଯୁବକଙ୍କ ପାଖକୁ ଆସିଲା ନାହିଁ । ଆମ ରାଜ୍ୟରେ ଅଧିକାଂଶ ଲୋକ ଆଦିବାସୀ ଏବଂ ଦଳିତ ବର୍ଗ । ତେଣୁ ଜନଗଣନା ସାଧାରଣ ଭାବରେ ନ କରାଯାଇ ଏମାନଙ୍କୁ ମଧ୍ୟ ଗଣତିରେ ନିଆଯାଉ । ସେମାନଙ୍କ ପ୍ରତିଶତ ହିସାବରେ ସେମାନଙ୍କୁ ଗଣନା କରାଯାଉ ।"
• ସେ ଆହୁରି ମଧ୍ୟ କହିଛନ୍ତି, "ରାଜ୍ୟରୁ କୋଇଲାର ଗୋଟିଏ ଟନରେ 400 ଟଙ୍କା ଆଦାୟ ହେଉଛି । କୋଟି କୋଟି ଟଙ୍କା କେନ୍ଦ୍ର ସରକାର ଆଦାୟ କରୁଛନ୍ତି । ଏହି ଅର୍ଥ ନମାମି ଗଙ୍ଗା ଏବଂ ନମାମି ଯମୁନାରେ ଯାଉଛି । ତେଣୁ ଆମେ ଦାବି କରୁଛୁ ରାଜ୍ୟର ନଦୀକୁ ପୁନଃଉଦ୍ଧାର କରାଯାଉ । ନଦୀକୁ ପରିଷ୍କାର କରିବାରେ ଅର୍ଥ ଖର୍ଚ୍ଚ କରାଯାଉ । ଚିଲିକା ମଧ୍ୟ ପୋତି ହେଇଯାଉଛି । ତେଣୁ ଚିଲିକାକୁ ମଧ୍ୟ ପୁନଃଉଦ୍ଧାର କରିବାକୁ ଦାବି କରିଛି କଂଗ୍ରେସ ।"

• ସ୍ୱତନ୍ତ୍ର ରାଜ୍ୟ ମାନ୍ୟତା ଦାବି:
  
  ବିଜେଡ଼ି ନେତା ଅମର ପଟ୍ଟନାୟକ କହିଛନ୍ତି, "ଆମ ପୁରା ପ୍ରସ୍ତାବ କେବଳ ରାଜ୍ୟର ସ୍ୱାର୍ଥ ପାଇଁ ଥିଲା । ଏଥିରେ କୌଣସି ରାଜନୈତିକ ଉଦ୍ଦେଶ୍ୟ ନଥିଲା । ଯେଉଁ କଥାକୁ ପୁରୁଣା କମିଶନମାନେ ଅଣଦେଖା କରିଥିଲେ, ତାକୁ କାର୍ଯ୍ୟକାରୀ କରିବାକୁ ଆମେ ଜଣାଇଛୁ । ସେୟରିଂ ପାର୍ଟନରେ ବର୍ତ୍ତମାନ, ଯେଉଁ ପରିବର୍ତ୍ତନ ହୋଇଛି ସେ କଥାକୁ କୁହାଯାଇଛି । ସବୁଠାରୁ ମହତ୍ତ୍ୱପୂର୍ଣ୍ଣ କଥା ହେଲା ସ୍ୱତନ୍ତ୍ର ରାଜ୍ୟ ପାହ୍ୟା ମିଳିବା । ଯାହା ବିଜେଡି ପୂର୍ବରୁ କହି ଆସିଛି । ସ୍ୱତନ୍ତ୍ର ରାଜ୍ୟ ମାନ୍ୟତା କିମ୍ବା ସ୍ପେଶାଲ ଫୋକସ ଷ୍ଟେଟ ମାନ୍ୟତା ପାଇଁ ଆମେ ଦାବି କରିଛୁ । ଆମର 40 % ଲୋକ ହେଉଛନ୍ତି ଏସସି ଓ ଏସଟି । ତାହାଲେ ସେମାନଙ୍କ ହିସାବରେ ନର୍ଥ ଇଷ୍ଟର୍ଣ୍ଣ ରାଜ୍ୟ ପରି ସେଠି ସେମାନଙ୍କୁ 90:10 ହିସାବରେ କେନ୍ଦ୍ରୀୟ ସହାୟତା ମିଳୁଛି । ତାକୁ ଆମଠାରେ ମଧ୍ୟ ଲାଗୁ କରିବାକୁ ଦାବି ହୋଇଛି ।"

ସେ ଆହୁରି ମଧ୍ୟ କହିଛନ୍ତି, "ମିନେରାଲସ ଉପରେ ଯେଉଁ ରୟାଲିଟି ବଢ଼ାଇବା କଥା, ବଢାଇବା ପାଇଁ କହିଲୁ । ସେସକୁ ସରକାର ବଢ଼ାଇ ବଢ଼ାଇ ଚାଲିଛନ୍ତି, ସେ ହିସାବରେ ବଣ୍ଟା ହେଉନି । କ୍ଲିନ ଏନର୍ଜୀ ଦିଆଯାଉନାହିଁ ।
ପୂଜା ସ୍ଥଳୀ ଗୁଡିକ ପାଇଁ ସ୍ୱତନ୍ତ୍ର ପାଣ୍ଠି ଦିଆଯାଉ । ପୁରୀରେ ଗୋଟେ ସ୍ପିରିଚୁଆଲ କଲଚରାଲ ସେଣ୍ଟର କରାଯାଉ । ଅର୍ବାନ କ୍ଲଷ୍ଟର 4 ଟି କରିବାକୁ ପ୍ରସ୍ତାବ ଦିଆଯାଇଛି । ବିଜେପି 2014ର ଇସ୍ତାହାରରେ ଓଡ଼ିଶାକୁ ସ୍ୱତନ୍ତ୍ର ମାନ୍ୟତା ଦିଆଯାଉ ବୋଲି ଲେଖିଥିଲା । ହେଲେ ସେ ବିଷୟରେ ପଦୁଟିଏ ମଧ୍ୟ ଏଠି କହିଲେ ନାହିଁ । ଆମକୁ ଆଶ୍ଚର୍ଯ୍ୟ ଲାଗୁଛି ସେମାନେ ମେମରେଣ୍ଡମ ତିଆରି କରିଛନ୍ତି ନା ଆଉ କଣ ? ଫାଇନାନ୍ସ କମିଶନ ଗୋଟେ ବହୁତ ବଡ଼ ତା ସାମ୍ନାରେ ଆମେ ରାଜ୍ୟର ସ୍ୱାର୍ଥକୁ ବଳି ଦେବା କି ବୋଲି ପ୍ରଶ୍ନ କରିଛି । "

ସେ ଏହା ମଧ୍ୟ କହିଛନ୍ତି, "ରାଜ୍ୟର ଆର୍ଥିକ ସ୍ଥିତି ଯୋଗୁଁ ଅଦିନିଆ ବର୍ଷରେ ଚାଷୀଙ୍କୁ ସରକାର କ୍ଷତିପୂରଣ ଦେଇ ପାରୁ ନାହାନ୍ତି । ତାହାଲେ ସ୍ୱତନ୍ତ୍ର ରାଜ୍ୟ ପାହ୍ୟା ମାଗିବାର ଥିଲା । ଫାଇନାନ୍ସ କମିଶନ ସାମ୍ନାରେ ମତ ରଖିବା ବେଳେ ରାଜ୍ୟର ସ୍ୱାର୍ଥ ରଖିବା କଥା । ଏଥିରେ ରାଜନୈତିକ ସ୍ୱାର୍ଥ ରହିବା କଥା ନୁହେଁ । ଏମିତି କି ଡବଲ ଇଞ୍ଜିନ ସରକାର ଅଛି, ଆମେ ବେଶୀ କିଛି କହି ପାରିବୁ ନାହିଁ କହି ତେରଛା ବାଣ ମାରିଛି ବିଜେଡି । ଏ ଡବଲ ଇଞ୍ଜିନ ସରକାର ଓଡ଼ିଶାବାସୀଙ୍କ ସ୍ୱାର୍ଥରେ ନାହିଁ । କେବଳ ନିଜର ସରକାର ବିଷୟରେ ଭାବୁଛନ୍ତି । ଏହା ରାଜ୍ୟବାସୀଙ୍କ ପାଇଁ ଗୋଟେ ଉପହାସ ।"

ଏମିତି କହିଲା ବିଜେପି:

ବିଜେପି ମୁଖପାତ୍ର ସତ୍ୟବ୍ରତ ପଣ୍ଡା କହିଛନ୍ତି, "ବିଜେପି ଆଜି ୧୬ ତମ ଫାଇନାନ୍ସ କମିଶନ ପାଖରେ ବିଭିନ୍ନ ଦାବି ରଖିଛି । ଡିଭିଜିବୁଲ ଟ୍ୟାକ୍ସରୁ 4.5 ପ୍ରତିଶତକୁ ଖସି ଆସିଥିଲା । ତାକୁ 5.1 ପ୍ରତିଶତକୁ ବଢ଼ାଇବାକୁ ଦାବି କରିଛୁ । ଖଣିଜ ସମ୍ପଦ ଭରା ରାଜ୍ୟ ହୋଇଥିଲେ ମଧ୍ୟ ଓଡ଼ିଶାର ଲୋକ ଗରିବ । ବିଜେଡିର 24 ବର୍ଷ ଶାସନ କାଳରେ ଓଡ଼ିଶାର ମୁଣ୍ଡ ପିଛା ଆୟ ସାରା ଦେଶରେ କମ ଥିଲା । ଏହାକୁ କିଭଳି ମୁକାବିଲା କରାଯିବ ସହାୟତା ନେଇ ଫାଇନାନ୍ସ କମିଶନ ପାଖରେ ଦାବି କରାଯାଇଛି । ପ୍ରତିବର୍ଷ ଓଡ଼ିଶାକୁ ପ୍ରାକୃତିକ ଦୁର୍ବିପାକର ମୁକାବିଲା କରିବାକୁ ପଡୁଛି । ଏହାକୁ ନେଇ ଓଡ଼ିଶାକୁ ବିଶେଷ ସହାୟତା ଦିଆଯାଉ ।"

ସେ ଆହୁରି ମଧ୍ୟ କହିଛନ୍ତି, "ଓଡ଼ିଶାର ଆର୍ଥିକ ଏବଂ ବିତ୍ତୀୟ ଶୃଙ୍ଖଳା ନେଇ ଓଡ଼ିଶାକୁ ସ୍ଵତନ୍ତ୍ର ଧ୍ୟାନ ଦେବା ଦରକାର । ବର୍ତ୍ତମାନ ପର୍ଯ୍ୟନ୍ତ ଓଡ଼ିଶା ଗୋଟେ ସରପ୍ଲସ ଷ୍ଟେଟ ନୁହେଁ । ଏହାକୁ ନଜର ଓଡ଼ିଶାକୁ ସହାୟତା ବଢ଼ାଯାଉ । ଓଡ଼ିଶାର କୋଇଲାରୁ ବିଦ୍ୟୁତ ଉତ୍ପାଦନ ହେଉଛି । ସେଥିରେ ଭାରତର ଅର୍ଥନୀତି ପରିଚାଳିତ ହେଉଛି । କିନ୍ତୁ ପ୍ରଦୂଷଣର ସିଂହ ଭାଗ ଓଡ଼ିଶା ଭୋଗୁଛି । ତେଣୁ ଓଡ଼ିଶାରେ ଗ୍ରିନ Energy ର କିଭଳି ପ୍ରଚାର ପ୍ରସାର ହେବ ସେ ନେଇ ଦାବି କରାଯାଇଛି । ବିଜେଡି କଣ କହେ କଣ କରେ ସେମାନେ ଜାଣି ନାହାନ୍ତି । ସ୍ଵତନ୍ତ୍ର ରାଜ୍ୟ ମାନ୍ୟତା ପ୍ରସଙ୍ଗରେ ବିଜେଡି ଆହୁରି ଅଧ୍ୟୟନ କରିବାର ଆବଶ୍ୟକତା ରହିଛି । ଓଡ଼ିଶାର ରାଜନୈତିକ ଦଳ ରାଜ୍ୟ ପାଇଁ ପ୍ରାଥମିକତା ଦେବା ଦରକାର । ନା ରାଜନୈତିକ କାଦୁଅ ପିଙ୍ଗିବା ଦରକାର ।"

ଇଟିଭି ଭାରତ, ଭୁବନେଶ୍ବର