ସମ୍ବଲପୁର: ବେପାର ଛଡାଇ ନେଲା 'ମୋ ବସ'! ସହରବାସୀଙ୍କ ବୃହତ୍ତର ସ୍ୱାର୍ଥ ପାଇଁ ରାଜ୍ୟ ସରକାର 'ମୋ ବସ' ସେବା ଆରମ୍ଭ କରିଥିଲେ । ଏଥିରୁ ସାଧାରଣ ଲୋକ ଉପକୃତ ହେଲେ ସତ । ହେଲେ ଅଟୋ ଚାଳକଙ୍କ ରୋଜଗାର ଉପରେ ଏହା ବଡ଼ ପ୍ରଭାବ ପକାଇଛି । ଅଟୋ ଛାଡ଼ି ଏବେ 'ମୋ ବସ'ରେ ଯିବା ପାଇଁ ଲୋକ ପସନ୍ଦ କରୁଥିବା ବେଳେ ଏଣେ ଅଟୋ ଚାଳକଙ୍କ ବେପାର ଘାଟାରେ ପଡ଼ିଛି । ଧାର କରଜ କରି କିମ୍ବା ଭଡ଼ାରେ ଆଣି ଅଟୋ ଚଳାଉଥିବା ଚାଳକଙ୍କ ରୋଜଗାର ଠପ୍ ହୋଇପଡ଼ିଛି । ତେବେ ଏମିତି ଜଣେ ଅଟୋ ଚାଳକ ହେଉଛନ୍ତି ସମ୍ବଲପୁରର ଲାଲ ମହାନନ୍ଦ । ଯିଏ ଭଡ଼ାରେ ଅଟୋ ଖଣ୍ଡେ ଆଣି ଚଳାଉଥିବା ବେଳେ ଏବେ ମୋ ବସ ପ୍ରଭାବରେ ତାଙ୍କ ରୋଜଗାରେ ସମସ୍ୟା ହେଉଥିବା କହିଛନ୍ତି ।
ରୋଜଗାରରେ ବାଧା ସାଜିଛି 'ମୋ ବସ' !:
ସମ୍ବଲପୁର ସହର ବିନାଖଣ୍ଡିର ଅଟୋ ଚାଳକ ଲାଲ ମହାନନ୍ଦ । B.A ପାଠ ପଢି ମଧ୍ୟ ଚାକିରି ମିଳି ନଥିଲା । ଚାକିରି ନ ମିଳିବାରୁ ଶେଷରେ ଭଡା ଅଟୋ ଚଳାଇ ପରିବାର ଚଳାଉଥିଲେ । ପରିବାର କହିଲେ ପତ୍ନୀ ଓ ଗୋଟିଏ ପୁଅ । ପୁଅ ଷଷ୍ଠ ଶ୍ରେଣୀରେ ପଢ଼ୁଥିବା ବେଳେ ଅଟୋରୁ ଯାହା ରୋଜଗାର ହୁଏ ସେଥିରେ ପରିବାର ଚଳାଇବା ସହ ପୁଅର ପାଠପଢ଼ା ଖର୍ଚ୍ଚ ବହନ କରୁଥିଲେ । ହେଲେ ଗତ ମାର୍ଚ୍ଚ ମାସରୁ ସମ୍ବଲପୁରରେ 'ମୋ ବସ' ସେବା ଆରମ୍ଭ ହେବା ପରେ ଗ୍ରାହକ ସଂଖ୍ୟା କମି ଯାଉଥିବାରୁ ତାଙ୍କୁ ଘର ଖର୍ଚ୍ଚ, ଅଟୋ ଭଡା ତଥା ପିଲାଙ୍କ ପାଠପଢାର ଖର୍ଚ୍ଚ କରିବା ଅନେକ ସମସ୍ୟାରେ ସମ୍ମୁଖିନ ହେଉଛନ୍ତି । ତେବେ ସହରବାସୀଙ୍କ ବୃହତ୍ତର ସ୍ୱାର୍ଥ ପାଇଁ ରାଜ୍ୟ ସରକାର ମୋ ବସ ସେବା ଆରମ୍ଭ କରିଥିବା ବେଳେ ଏହାକୁ ସହର ବାସୀ ସ୍ୱାଗତ କରିବା ସହ ଭଲ ସୁବିଧା ମଧ୍ୟ ପାଉଛନ୍ତି । ହେଲେ ଏହା ଦ୍ୱାରା ଲାଲ ମହାନନ୍ଦଙ୍କ ପରି ଅନେକ ଅଟୋ ଚାଳକଙ୍କ ରୋଜଗାରରେ ବେଡ଼ି ପଡ଼ିଯାଉଛି ଅଟୋ ଚାଳକମାନେ କହିଛନ୍ତି ।
ଏନେଇ ଅଟୋ ଚାଳକ ଲାଲ ମହାନନ୍ଦ କହିଛନ୍ତି, "ମୁଁ ୨୦୦୪ରୁ ଅଟୋ ଚଲେଇ ଆସୁଛି । ଚାକିରି ନ ପାଇବାରୁ ଗୋଟିଏ ଭଡା ଗାଡି ଚଳାଉଛି । ଯେଉଁ ଦିନରୁ 'ମୋ ବସ' ବାହାରିଲା ସେହି ଦିନରୁ ମୋର ଭଡା ଦେବାକୁ ଅସୁବିଧା ହେଉଛି । ଏହାସହ ମୋର ଘର ଖର୍ଚ୍ଚ, ଅନାନ୍ଯ ଖର୍ଚ୍ଚରେ ସମସ୍ୟା ହେଉଛି । ଯାତ୍ରୀମାନେ ଅଟୋକୁ ଛାଡ଼ି ମୋ ବସରେ ଯିବା ଆସିବା କରୁଛନ୍ତି । ସେଥିପାଇଁ ଆମର ବହୁତ ସମସ୍ୟା ହେଉଛି । ଆମର ଖାଇବା ପିଇବାଠୁ ଆରମ୍ଭ କରି ପିଲା ଛୁଆଙ୍କ ପାଠପଢା, ପ୍ରତ୍ୟେକ କ୍ଷେତ୍ରରେ ବହୁତ କିଛି ଅସୁବିଧା ହେଉଛି । ପୂର୍ବରୁ ଗାଡି ଭଡା ଓ ତେଲ ଭରିକି ୨୦୦ରୁ ୩୦୦ ଟଙ୍କା ଘର ପାଇଁ ହେଉଥିଲା । ଖର୍ଚ୍ଚ ବାହାରୁ ଥିଲା, ହେଲେ ଏବେ ତେଲ ଭରିଲେ ଗାଡିଭଡା ନାହିଁ, ଗାଡି ଭଡା ହେଲେ ଘର ଖର୍ଚ୍ଚ ନାହିଁ । ଫଳରେ ଅନେକ ସମସ୍ୟା ଭୋଗୁଛୁ ।"