ଗ୍ବାଲିୟର (ମଧ୍ୟପ୍ରଦେଶ) :ଅକ୍ଟୋବର 6 (ରବିବାର) ବାଂଲାଦେଶ ବିପକ୍ଷରେ ଟି20 ସିରିଜର ପ୍ରଥମ ମ୍ୟାଚ୍ ଖେଳିବ ଟିମ୍ ଇଣ୍ଡିଆ । ଏହା ପୂର୍ବରୁ ମଧ୍ୟପ୍ରଦେଶର ଗ୍ବାଲିୟରସ୍ଥିତ ଶ୍ରୀମନ୍ତ ମାଧବରାଓ ସିନ୍ଧିଆ ଷ୍ଟାଡିୟମରେ ପହଞ୍ଚି ଦୁଇ ଦଳର ଖେଳାଳି ଝାଳବୁହା ଅଭ୍ୟାସ କରୁଛନ୍ତି । ତେବେ ଏହାରି ଭିତରେ ଚର୍ଚ୍ଚାରେ ରହିଛନ୍ତି ଭାରତୀୟ ଯୁବ ବିସ୍ଫୋରକ ବ୍ୟାଟର ରିଙ୍କୁ ସିଂହ ଓ ତାଙ୍କ ହାତରେ ସେ କରିଥିବା ନୂଆ ଟାଟୁ । ଯେଉଁଥିରେ 'ଗଡସ୍ ପ୍ଲାନ୍' ଲେଖିଛନ୍ତି ରିଙ୍କୁ ।
'ଗଡସ୍ ପ୍ଲାନ' ଟାଟୁରେ ଚିହ୍ନିତ ହୋଇଛି 5 ଛକା :-
ରିଙ୍କୁ ସିଂ କରିଥିବା ଏହି ନୂଆ ଟାଟୁରେ ସବୁଠାରୁ ବିଶେଷ କଥା ହେଉଛି, ସେ ଆଇପିଏଲ୍ରେ ଗୁଜରାଟ ଟାଇଟନ୍ସ ବିପକ୍ଷରେ ଶେଷ 5 ବଲରେ ମାରିଥିବା 5 ଛକା ଏହି ଟାଟୁ ଉପରେ ଚିହ୍ନିତ କରାଯାଇଛି । ଭାରତୀୟ କ୍ରିକେଟ ବୋର୍ଡ (BCCI) ଏହାର ଆଧିକାରିକ 'X' ହ୍ୟାଣ୍ଡେଲରେ ପୋଷ୍ଟ କରିଥିବା ଏକ ଭିଡିଓରେ ରିଙ୍କୁ ଏହି ଟାଟୁ ବିଷୟରେ କହିଛନ୍ତି । ସେ କହିଛନ୍ତି, "ସମସ୍ତେ ଜାଣିଛନ୍ତି ଯେ ମୁଁ 'ଗଡ୍ସ୍ ପ୍ଲାନ'ରେ ଚାଲେ । ଟାଟୁରେ ଏକ ସୂର୍ଯ୍ୟ କରାଯାଇଛି । ଭିତରେ 'ଗଡସ୍ ପ୍ଲାନ' ଲେଖାଯାଇଛି । ମୁଁ ମାରିଥିବା ସେହି 5ଟି ଛକା ମୋର ଜୀବନ ବଦଳାଇଦେଇଥିଲା । ଲୋକମାନେ ମୋତେ ଜାଣିବା ଆରମ୍ଭ କରିଥିଲେ । ସେଥିପାଇଁ ମୁଁ ଏହି ଟାଟୁରେ ସେହି 5 ଛକାକୁ ମଧ୍ୟ ଦର୍ଶାଇଛି ।"